زيزي عاصي
الو رقمك كسب معانا
بقلم : زيزي عاصي
ترن ترن ترن ترن
انا: الو
س: الو صباح الخير يا فندم رقم حضرتك كسب معانا هديه قيمه.
انا : بجد يا فرج الله انا عمرى مكسبت حاجه في حياتي ..ده حتى العيال صحابى كانو بيكسبوا فى اكياس الشبسي و اسكرنشيزر الدحلاب ده عارفاه?? و انا عمرى مكسبت
س: الف الف مبروك يا فندم و الله فرحنالك .
انا : ميرسي كتير كسبت ايه هاااا ايه ؟؟
س: بصى حضرتك علشان تخدى الهديه لازم شويه اجرائات بسيطه كده ... احنا شركه بتستورد مكانس كهر.....
انا : قولى و المصحف انا كسبت مكنسه كهربه تصدقى بالله كنت محتاجه واحده و عماله ااجل فيها .. انتى عارفه بقى مصاريف المدارس و كده ...
س: لا حضرتك مش هى دي الهدية.
انا : امال ايه الهديه ؟
س: صبرك عليا بس ما انا بقول لحضرتك اهو.
انا : معلش اصلى فرحانه اوى اصلي عمري ما كسبت.
س: ربنا يسعد حضرتك ديما ... حضرتك عارفه حشره الفراش
انا : لا و الله محصليش الشرف بس ممكن نتعرف.
س: دى بقى حاجه خطر جدا و موجوده في كل بيت و مبتتشافش بالعين المجرده و ....
انا : متقوليش ان انا كسبت ميكروسكوب .. بس حعمل بيه ايه ده.. مش ممكن ابدله بخلاط لو ينفع ??
س: لا يا فندم حضرتك مكسبتيش ميكرسكوب و لا حاجه مش هى دى الهديه ... ما انا حشرح لحضرتك .
انا : ما انتى بتقولى مبتتشفش بالعين المجرده .
س: ما انا حشرح لحضرتك اهو ... المكنسه بتاعتنا بتنضف حشره الفراش و ممكن تنضفى بيها الستاير و الانتريه و بتنضف الخشب و السرميك على الناشف و ممكن بالميه ده غير انها بتغسل السجاجيد و بتشيل الدهون من على دواليب المطبخ والحطان كمان و ممكن تنضفى بيها العربيه لو تحبي ... و فيها كمان ميزه ان حضرتك ممكن تعملي بيها حمام بخار لوشك او شعرك
انا : حشره فراش فى وشي ازى يعنى!!!
س: لا حضرتك الي جانب التنضيف يعني ... بنجي نعملك دمو فى البيت بنضفلك البيت كله و ...
انا : بجد امتى ؟؟؟ ده البيت عندي محتاج يتنضف جدا و ام علي بقلها يجي شهر مبتجيش ... انا موافقه بس ممكن تطبقولى الغسيل ؟؟
س: عسل يا فندم و الله .. المهم الدمو ده مش حيكلفك كتير هو ب٣٥٠ جنيه بس علشان حضرتك حنعملك تخفيض يبقى ٢٥٠ جنيه بس .
انا : و بعدين .
س: و بعدين لو حضرتك عجبك المنتج بتعنا الى هو المكنسه حضرتك ممكن تشتريها .
انا :و لو معجبتنيش ؟؟
س: حضرتك بتستفيدى من الاوفر بتاع التنضيف بس انا واثقه انها حتعجبك .
انا : طيب نرجع لموضعنا الهديه ايه .
س: الهديه عباره عن بشكير كبير مطبوع عليه حشره الفراش و هى حامل فى التاسع ساعه بدايه الطلق بالوان مبهجه و مش بس كده ده قطن مصرى ١٠٠٪ كمان..
انا : بشكير!! طيب استلم الهديه ازى .
س: مندوب من الشركه بيجي يسلم لحضرتك الهديه لحد باب البيت و حضرتك بتستلمى المكنسه .
انا : مكنسه ايه ؟
س: مكنسه حشره الفراش يا فندم .
انا : ااااااااااه يعنى لازم اشترى المكنسه علشان اخد الهديه .
س: تمام .
انا : و بكام المكنسه دى بقى .
س: هى مفروض سعرها خمس الاف جنيه.. بس علشان حضرتك فزتى معانا بنحسبها لحضرتك ب ٤٩٩٥ بس
انا : @&&*|>{{<$€@£&؛
بعد مرور سنه ..
ترن ترن ترن ترن
ماما: الو
س: الو صباح الخير يا فندم رقم حضرتك فاز معانا بهديه قيمه.
ماما : بشكير حشره الفراش صح ?? نفسي فيه.
س: حشره الفراش !!!! لا يا فندم بقول لحضرتك هديه قيمه ...
ماما : يبقى مكنسه حشره الفراش صح ؟؟
س: لا يا فندم ملهاش دعوه بالحشرات خالص .
ماما : طيب كويس اصل انا معنديش حشرات الحمد لله .. كان عندي نمل اصل الاولاد احفاديبيكلوا و يفرفتوا علي الارض ، جبت الشركه رشت و الحمد لله البيت بقي زي الفل ..
س : احنا يا فندم شركه ادوات منزليه و حضرتك كسبتى معانا خلاط.
ماما : يوووووو يا ريتك قدمتي اسبوع اصل الواد حفيدى كان بيلعب فى المطبخ بالكوره ... انتى عارفه بقى شقاوه الاولاد ... اصله بيلعب كوره فى فريق النادى.. عليه شوطه ابن الايه مع انى قيلاله مفيش لعب كوره فى البيت بس مفيش فايده مبيسمعش الكلام جيل ما يعلم بيه الا ربنا .. حنعمل ايه بس .. المهم علشان مطولش عليكى الكوره جت فى الخلاط دشته .. و جبت واحد جديد .. فى ايه تانى غير الخلاط ؟؟
س: نامت
ماما: الو الو
س: اسفه يا فندم معاكى ... فى كبه .
ماما : كبه ده انا عندى اتنين اصل عيد الام الى فات بنتى جابتلى واحده جديده ، قال ايه بتاعتى قدمت .. مع انها كانت شغاله و زى الفل .. بس صممت تجيب واحده جديده .. مع ان بتاعتى القديمه احسن بس مردتش اكسفها .. اهى فلوس على الارض جيل مبزر بس حنقول ايه اهى مركونه و بستعمل بتاعتى القديمه .. بس مقلتلهاش علشان بتتقمص .. مفيش حاجه تانيه
س: نامت.
ماما: الووووووو
س: معاكى يا فندم ... فى مضرب كهربا .
ماما: هو لسه حد بيستخدم مضرب الكهربا ده يا بنتى ... ده ولادى حبايبي ربنا يبارك لهم ، جايبنلى عجانه تحفه بعمل فيها الكيك و بعجن فيها كل حاجه ... عملت فيها الكحك السنه دي كان تحفه احلى من القرف الى فى السوق ده ... غالى و لا ليه طعم و لا ريحه ... جيل مبيفهمش فى الاكل ده احنا كنا زمان نقعد تعمل الكحك قبلها باسبوع ، و كان من حلاوته يخلص قبل العيد .. بس المر دى قسيت عليه فى السوا شويه لحد ما الملبن نشف ... مفيش حاجه تانيه ؟؟
س: نامت
ماما: الووووووووو
س: ايوه يا فندم معاكى ... طيب حضرتك عايزه ايه و احنا نجيبهولك
ماما: انا مش عايزه حاجه شكرا ... عندى كل حاجه ... انا ست كبيره لسه حجيب جديد ... بس ان كان و لا بد ممكن اخد البشكير الى عليه حشره الفراش بس يكون لون غاااامق الفاتح بيتمرمط .
س: يا فندم احنا شركه ادوات منزليه معندناش بشكير .
ماما: طيب عندكم ايه؟؟
س: انا حستقيل و مش حشتغل الشغلانه دى تانى ابدا..
ماما: اه و الله يا بنتى عندك حق .. شوفيلك شغلانه تانيه احسن الشغلانه دي قله قيمه ... حتبعتولى البشكير امتى علشان الصبح بنزل السوق ه
خبر هام
انتحار فتاه فى العشرين من عمرها تعمل كمندوبه لشركه ادوات منزليه فى ظروف غامضه
اي حد عايز ينتقم ادوله نمره امى
جوجل نيوز
