زحمه يا دنيا زحمه

بقلم : زيزي عاصي

كنت قاعده فى لحظه تجلى كده و بفكر فى حال البلد و انا  فضلت خيركم بقمع نص كيلو الفاصوليه وبسمع الراديو ، اصلى ساعات كده احب و انا بشتغل فى المطبخ اسمع الراديو يسلينى ... و لسه بقول فى عقل بالى احنا بقينا كتييييييير اوى مع ان الله يمسيها بالخير الست فطنه عيد لسنها دلدل و ريقها نشف و هى بتكلم حسانين و بتقوله شوف محمدين حلو و شاطر ازى جايب ولد و بنت مش زى الارنبه مراتك كل سنه جايبلها عيل... و انا  قاعده كده لا بيا و لا عليا باخد و ادى مع نفسي ،دخل عليا الاستاذ احمد عدويه باغنيه زحمه يا دنيا 

زحمه و دار بينا هذا الحوار 

 

عدويه : زحمه يا دنيا زحمه وتاهوا الحبايب

انا : اه و الله يا استاذ احمد كل يوم و التانى اولاد تايهه 

بسبب موضوع الزحمه ده ... و  الخطف على ودنه ، عارف و لو دخلت على الفيس بوك حتلاقى صفاحات عن الاولاد المخطوفه ... تلاقى صوره كده لطفل نايم على كتف ست و يكتبو على الصوره " لو بتحب ربنا انشر ، شكل الولد مش ابنها و خطفاه  ، الولد شعره اصفر و هى شعرها كستنائى غامق "و كده يعنى يلا ربنا يستر على اولدنا

عدويه : زحمه ولا عادشي رحمه مولد وصاحبه غايب

انا : اه و الله ما عدش رحمه تصدق يا  احمد ياخويا  عاملين مشروع كده فى وسط اسكندريه شاللها تماما اهى دى الزحمه الى على اصولها صحيح ..المشكله ان محدش عارف هو ايه بالظبط ... ناس تقولك حيجيبو دلافين و يعملولهم حمام سباحه علشان لما حماده يجي يصيف فى اسكندريه يركب على ظهره  و يتصور و هو بينط بيه.... و ناس تقولك لا مشروع قومي بينشط السياحه فى اسكندريه و حيدر ربح كتير و محدش فاهم حاجه ، اهو كله بيهرى و صدعونا و مش رحمنا من الفتى

عدويه  : اجي من هنا زحمه واروح هنا زحمه

 

هنا او هنا زحمه

انا : لا متحولش كل الشوارع زحمه ابو قير زحمه و الكورنيش زحمه و الترام زحمه اعمل زى انا مبخرجش من البيت خالص

عدويه : زحمه وانا رايح له وانا وسط الزحام

انا : احمد ربنا امال لو شفت الراجع انا منك ابات مرجعش النهارده

عدويه: عايز يسمع واقله ما بيوصلشي الكلام

انا : تبقى اكيد شركه يوسفندى الى كانت بصراحه الواحد طهق تقضل طول المكالمه تقول الو الو و لا انت سامع حاجه و لا الطرف التانى سامع  جبت خطين تانين واحد من شركه مكالمات و التانى فودافول و مفيش فايده بردو ، اقولك ابعتلاها واتس اب

عدويه : بيني وبينه معاد وحيروح المعاد

انا : خد ميعاد تانى

عدويه : زحمه ومعطلاني وان رحت وما لقيتوش

 

اخاف اروح له تاني في معادي وما القاهوش 

انا : طبعا مش حتلقيها هى حتستناك كل ده ... لازم تعرف ان ستات اليومين دول  سترونج و اندبندنت و مبيستنوش حد... 

عدويه: كتير الناس كتير وانا عايزاركب واطير

انا: بس يبقى مفيش قدامك   غير الميكرو باص هو ده فعلا الى بيطير بعيد عنك سواقين الميكروباص دول قلبهم ميت محدش يقدر يوقفهم على طول طايرين

عدويه: الساعه الا تلت ومعادي معاه تمنيه

 

لا من السكه دي رحت ولا لا قي سكه تانيه

انا : و لما معادك  تمنيه نازل متاخر ليه ... معادك تمنيه يبقى تصلى الفجر و تنزل تاخد الطريق   و تاخدسكه واحد مهى المرقعه دى هى الى حتخليك تروح متاخر و تزعلو لما البنت  تقفش و تقولو نكدين  

يلا نهايته اسيبك انت تلحق المزه و اقوم اعلق على الرز  لحسن سى الاستاذ جوزى طالع من شغله اول امبارح و زمانه على وصول