كان فريق الأهلي يحتفل بالفوز بالدوري
العامري فاروق: انقطاع التيار الكهربائي بنهائي اليد "جهل بالقوانين" وأطالب بالمحاسبة
شريف مدحت
رد العامري فاروق نائب رئيس النادي الأهلي، على ما حدث في صالة نادي هليوبوليس، عقب انتهاء مباراة فريق اليد أمام نظيره نادي الزمالك، وقطع التيار الكهربائي أثناء تواجد الفريق داخل أرض الملعب للاحتفال بلقب الدوري.
وقال العامري فاروق خلال حديثه عبر إذاعة الشباب والرياضة: “ما حدث مش خطأ فني ولا حاجة مقصودة، إنما آسف في التعبير هو جهل في اللوايح والقواعد اللي المفروض منظمة للحدث ده، سيبك من الاحتفال، لكن كان ممكن يحصل كارثة، في ناس في الصالة وناس موجودة مينفعش تقطع تيار الكهرباء”.
وأضاف: “ده كلام مرفوض، وده تصرف المفروض نادي هليوبوليس يحاسب المسؤول اللي عمل كده، لأننا توجهنا له بطلب برفع سكينة الكهربا وإحنا في الملعب علشان الناس تعرف تخرج من الصالة، واعتقد أن النائب عمر السنباطي رئيس نادي هليوبوليس قمة في الأدب والاحترام، وهيقف على الملف ده، الناس استقبلتنا بشكل كويس، لكن التصرف ده اعتقد لازم يحاسب عليه الشخص المسؤول عنه، لأنه كان ممكن يبقى في مشكلة”.
وعن بيان هليوبوليس، الذي أشار فيه إلى أنه تم قطع تيار الكهرباء بسبب اقتحام جمهور الأهلي لأرض الملعب، قال العامري فاروق: “الكلام ده غير دقيق ومش مظبوط، أول حاجة المباراة من غير جماهير اللي كانوا موجودين أعداد محدودوة ومبعوتة في الكشوفات ودي مسؤولية نادي هليوبوليس”.
وأضاف: “مفيش حد من المدرجات نزل الملعب، لكن المدير الإداري بتاع الفريق كان موجود فوق جه ينزل اعترضه واحد وخبطه خبطة كانت ممكن تقضي على روحه، بجد مش هزار، وأنقذه دكتور الفريق”.
وأتم العامري فاروق حديثه: “أتمنى إنهم لما كانوا يطلعوا بيان يدرك هو بيقول إيه، الكلام ده مش مظبوط وكلام مينفعش الناس تقوله هنعرض على مجلس الإدارة ونشوف رأيهم إيه”.
جوجل نيوز
