أمينة خليل عن غيابها في رمضان: ملقتش ورق يلمس قلبي

تحدّثت الفنانة أمينة خليل عن تفاصيل حضورها أسبوع الموضة في باريس، وحبّها منذ الطفولة للموضة، وكشفت الأسباب التي أدت إلى ابتعادها عن دراما رمضان المقبل.

وعن تجربتها مع أسبوع الموضة، قالت أمينة خلال لقاء لها ضمن برنامج "عرب وود": "كانت تجربة حلوة جدًا وكان حلم بالنسبة لي أحضر أسبوع الموضة في باريس، ومكنتش بعرف أحضر السنين اللي فاتت لأن كان بيبقى عندي تصوير رمضان". 

وأضافت: "عالم الموضة كبير وفخم وملهم إني أتفرج على إصدارات جديدة لمصمّمين كبرنا بنتفرج عليهم في المجالات، ودي حاجة مهمة بالنسبة لي، أنا بحب الموضة من وأنا صغيرة وكان حلم كبير".

أما عن غيابها عن دراما رمضان، فقالت خليل: "غيابي عن رمضان صعب حتى عليّ أنا كمان دلوقتي في الوقت ده خلاص رمضان كمان كام أسبوع وببقى دايمًا أنا في الوقت ده بصوّر وبيبقى إعلان المسلسل بينزل، وفيه حالة حماس يلا عايزين المسلسل ينزل والسنة دي المشاعر جديدة مختلفة غريبة شوية، أنا مش متعودة إني مكونش موجودة لكن بحمد ربنا طبعاً على كل حاجة ومقدرة أوي إن بقى عندي وقت ودي حاجة بقالها كتير أوي محصلتش". 

وأضافت: "ودايمًا بقول عمري ما هاخد شغل غير لو أنا فعلًا مصدقة 100% في اللي أنا بعمله، وطالما ملقتش ورق يلمس قلبي أنا مش هشتغل والسنة دي ملقتش حاجة حسيت إنها تستاهل أشتغل وسنة ونرجع لكم تاني السنة الجاية".