أنت شايفنى ازاى ؟
كتبت : رضوى نجيب
من أصعب المواضيع اللى كتبتها الحقيقه . لاننا دايما بأستمرار بنكون متخيلين ، لو هتكلم عن كل جنس على حد سواء يعنى . انه فاهم الجنس التانى جدا . ده لانه اتعامل معاه ف مواقف كتير يعنى :
الولد اتعامل مع بنات كتير ف شغله وجيرانه واصحابه واخواته والشارع ، والبنت نفس الموضوع
بس الحقيقه ان كل جنس ليه ثوابت ف صفاته ، وليه حاجات تختلف باختلاف الاشخاص .(وجهة نظرى )
وفى سؤال مهم جداااا لينا كلنا .انت شايفها ازاى البنت اللى بتتمنى ترتبط بيها؟ وانتى كمان باصاله او فكرتك عنه ايه ؟. هل حاطين مواصفات معينه . ولا بتتقبلوا المتاح وعندكوا امل انكوا تغير ما يختمل تغيره ف الاخر ؟!
لان كل سؤال من دول اجابته هتمشيك ف اتجاه مختلف تماما عن التانى .
اللى محدد هدفه مش محتاج كلام هو عارف طريقه . واللى مش محدد بيواجه الحاجات اللى جايه دى كلها :
بيشرب سجاير .. وانا مستحيل ارتبط براجل بيدخن
بتحط ماكياج كتير .. وانا مينفعش اتجوز واحده عامله فاترينه ف وشها
بيغير زياده ورافض شغلى .. وانا ليا حياتى لازم يتقبلها
نكديه اوى .. وطول الوقت بتشتكى هتجوزها ازاى
طيب سؤال . هل انت لما شوفت العيب ده فى الشخص اللى انت مرتبط بيه . حاولت تناقشه فيه ؟!
يعنى على سبيل التدخين . سألتيه بتدخن ليه ؟! رغم ان الاجابه مش مقنعه اللى هى (ضغوط الحياه ،او اتعودت ، او بتمتص غضبى ) ماهو ف الاف غيرك بيواجهوا نفس الاسباب دى ومش بيدخنوا . بس هو مقتنع بأسبابه
و لعلمِك ان ف علم النفس فى تفسير للتدخين ده .(طبعا مش هيكون شماعه لكل المدخنين ولكنه تفسير ) ان الراجل بيشرب السجاير من باب اثبات رجولته اللى مش قادر بحكم الظروف المحيطه بيه يثبتها بشكل قوى .فبالتالى بيدخن لانها كمان عاده مرتبطه بالرجاله اكتر من النساء . ناهيكى اصلا . عن ان التدخين بضروا هو (ف جسمه ، واعصابه ، وقدراته بعد كده ). ( وده بردو مش مبرر للشرب )
ملحوظه : لو انتى رافضه للسجاير م البدايه مترتبطيش بشخص مدخن ، لكن لو عندك القابليه انك ترتبطى ومع الوقت اما تبطليهاله او تقبليه بيها . فهذا لكى
هل حاولتى بقى وانتى البنوته الجميله اللى هو مرتبط بيها . تمنعيه عنها بشكل لطيف زى مثلا . ليه متروحش الجيم ( لان مفيش جسم سليم واعصابه متينه وبيدخن ، مش هيلاقى وقت اصلا ليها ) ، او تدورى معاه على شغل ليه لو مبيشتغلش يعنى ! و لو ف مشاكل ف شغله تساعديه ف حلها . ماهو انتى زوجة المستقبل بردو .
وعلى سبيل الماكياج الاوفر او اللى انت شايفه اوفر (تختلف ف تقدير كل حد فيكو ) هل فكرت تسألها ليه بتزودى الماكياج ف وشك كده ؟ ولا انت شوفت منظرها د وقررت اذن هى بنت مش مؤدبه او متحرره شكلاً .
معلومه ليك : بعض البنات بيحطوا الماكياج ده محاولة لاثبات انوثتهم ، وانى بنت اهو وجميله ، ايا كان السبب . عشان عريس او عشان الناس تبصلها بنظرة لطيفه .(مش هدفها المعاكسه يعنى ) وانما تقدير انوثتها .
لكن جرب كده انك انت بكل الطرق تاكدلها مدى رؤيتك لانوثتها وحبك لشكلها كده وانها اجمل نساء الدنيا . وشوف هتحط ميكاب بنفس الدرجه ولا هتقلله . وربما تشيله خالص . (حاول تشبع الآنا عندها بأنها ماليه عينك جدا )
ولو ع سبيل شغلها . انت ليه رافض شغلها حتى لو ف فترة الخطوبه ؟ عشان بتغير عليها ، وان مفيش زميل ليها يبصلها بنظرة لطيفه . بتجننك انت وتشعلل النار جواك (دى تخصنى ) !
طيب ما انت لازم تتأكد انك انت ( كحبيب ليها لو مالى عينها وقلبها ، لو قدمها توم كروز بنفسه ، مش هتبصله اصلا ، لان قلبها مرتاح ) مع ان توم كروز امور بردو هههه
ده غير انك لو كنت عرفتها وهى بتشتغل . فأذن حبيتها وتقبلتها بوضعها الحالى ، ليه عايز تطبق عليها (قاعدة البيت الجبريه ، ليه تقتل طموحها . مش ف مصلحتك انت كمان على فكرة الخطوبه دى . ده لو هى وافقت .
وبعدين . خليك ذكى ، هل فى شخص يكره ان مراته تكون ذو حيثيه او شخص فعال ف المجتمع ؟
و لو ع سبيل شغله ، وانه مش بيكلمك وقت طويل . سؤال رفيع . هو بيشتغل لمين ؟! مش ليكوا . لانجاز موضوع الجواز لانه نفسه تكونى ف بيته ؟
لو انتى بصحيح شايفاه مشغول عنك جدا .. بصنعة لطافه . وصليله انك محتاجه تشوفيه تكلميه .
أهم حاجه من غير نكد وعصبيه .
لان الرجل مخلوق يكره النكد . لو فضلوه بين (صمتك ونكدك ) هيختار صمتك . اهو اهون .
وكمان البنت مخلوق يمقت التقليل منه ، لو خيروها بين الاحب او رجل ف حياتها ولكنه مقل لتقديرها ودعمها . هتختار الا حب .
بدل ما تكون داخل فى علاقتك بالطرف التانى ده على اساس . يا اغيروا يا ابعد عنوا (حرب مسبقه) ، أدخل من منطلق المحبه . انك عايز تشوفه افضل ، وتحطه ف أحسن وضع .
لو كل واحد فى علاقته بالطرف التانى تخيل ان العلاقه دى عباره عن ( شخص راغب فى تغيير شكله نوعا ما ، وحابب يعمل نيو لوك للأفضل ) العلاقه دى هتنجح .
متقولهاش لبسك ضيق .. قولها الطقم د هيبقى احلى عليكى ، وهاتلها عقد او شنطه للطقم ، عشان تحبه وتتقبله اكتر .
متقوليلوش متبصش للبنات الحلوين ... اهتمى بشكلك وكلامك ، مش هتديله فرصه يبص بره ( لان البصبصه مش هوايه ولكنها رغبه لرؤيه الافضل ، خليكى الافضل ف نظرة ) ولو هو فيه داء . مبيبطلوش . ابعدى افضلك وافضله
متقولهاش متشتغليش ، انتى اصلا مسيرك لبيتك ... ادعم طموحها . واتأكد ان مرحله البيت دى هتيجى ف وقت معين . خليها تيجى بقرار منها بمساعدتك . مش بالاجبار .
لما تيجى تقيم شخص بشكل عقلانى . اكتب مزاياه وعيوبه . وفاضل بينهم . لو لاقيت المزايا اكتر م العيوب . تقبل . ماهو مفيش شخص كامل . ولو العيوب قابله مع الوقت للتعديل .يبقى يا بركة الله .
قاعده عامه :لا للرفض فى المطلق ونعم للبدائل .
جوجل نيوز
