ردوا الجميل لصندوق تحيا مصر.. ومهزلة بمطارات أمريكا
بالصور.. رحلة مصرية من نيويورك إلى مصر
هند عزام
إيثار كمال، مواطنة مصرية في أمريكا، شاءت الأقدار أن تكون عالقة مع انتشار الفيروس الوبائي كورونا المستجد في أنحاء المعمورة، وعادت إلى مصر من أمريكا يملؤها الفخر ببلادها انها دعت للتبرع لصندوق “تحيا مصر” لمساندة بلادها في مواجهة فيروس كورونا.
ربما يعجبك
“بوابة روزاليوسف” ترصد تفاصيل رحلة إيثار من أمريكا إلى مصر ومكوثها في الحجر الصحي.
في هذه السطور تحكي تفاصيل الرحلة، قائلة: "تعالوا احكي لكم عن رحلتي للرجوع إلى بلدي مصر من نيويورك.
الخطوة الأولى: قمت بتأجير سيارة للانتقال إلى واشنطن، وقمت بمسح وتنظيف شامل بالمناديل المعقمة لكل جزء في السيارة من الداخل.
الخطوة الثانية: قمت بتسليم السيارة المستأجرة في المطار، وركبت أوتوبيسًا لمطار دالاس. عمري ما شفته فاضي ومهجور زي النهارده.
الخطوة ٣: لبست ماسك لأول مرة. بقالي ٢٤ يوما في البيت، وفعلًا شيء غريب إزاي إحنا بنتعود على أي حاجة؛ إحساس إني محاطة بأشخاص أغراب.
الخطوة ٤: روحت على مصر الطيران ومضيت ورقة إني موافقة على العزل في أي مكان تقرر الحكومة تعزلنا فيه. من يومين قرروا أن العزل بدل القاهرة يكون في مرسى علم "مدينة سياحية على البحر الأحمر".
الخطوة ٥: قمت بالمرور من الأمن (TSA) وغريبة انهم كانوا عادي مش قلقانين من المسافة، مقربين قوي ولا أحد منهم لابس ماسك، جوانتيات بس وبيحسسوا بأيديهم على حجابي.
الخطوة ٦: الركوب إلى الطيارة الزحمة جدًا. مسحت بالمناديل المعقمة كل حاجة. المضيفات والمضيفون وزعوا علينا ماسكات لكل حد مش معاه. المفاجأة الحلوة أن أغلب المسافرين كانوا لابسين الماسك بتاعهم.
الخطوة ٧: بعد ١١ ساعة ومشاهدة ٤ أفلام، وصلنا مطار مرسى علم. كل ٢٠ شخص بس هم المسموح لهم ينزلوا ويركبوا باص واحد كل مرة. وزعوا علينا ماسكات وكل الهاند باجز اترشوا.
الخطوة ٨: قاموا بقياس درجة الحرارة لكل شخص قبل ما ندخل قاعة الانتظار. أكثر من مرة أذاعوا من فضلكم اقعدوا وبلاش تتجمعوا مع بعض. أنا رحت قعدت في ركن بعيد.
الخطوة ٩: استقبلونا بالورد ومعجنات وشاي ومياه وعصير. أكثر العاملين لابسين زي الحماية من الميكروبات، والجميع لابسين ماسكات.
الخطوة ١٠: بعد حوالي ساعة بعد وصولنا قاعة الانتظار وبعد ما أكلت اتنين معجنات "أنا سمعت بس مش قادرة أؤكد إنه كان على الطيارة حوالي ٣٥٠راكبا" وصلت إلى غرفة الاختبار.
الخطوة ١١: الحقيقة مش عارفة إيه الاختبار بالضبط "ممكن يكون اختبار لمضادات الفيروس في الجسم" لكن هم شكوا صباعي وبعد ١٠ دقائق قالوا: أنا سليمة وتمام.
الخطوة ١٢: عديت من الجوازات في ثواني، أخذت كل حقائبي "اللي اترشت قبل ما تنزل على سير الشنط" وبعدين الجمارك. وبعدين رشوا الحقائب مرة ثانية قبل ما يحطوها في أتوبيسات مكيفة. من الطيارة للأتوبيس حوالي ٣ ساعات.
الخطوة ١٣: الأوتوبيس أخذ حوالي ١٥ دقيقة علشان يوصل الفندق. وطلبوا مننا نملأ ورقة بالمعلومات المطلوبة للأوتيل علشان ميحصلش أي زحام. الأوتوبيسات وقفت طابور ونزلوا الناس من أوتوبيس واحد واحد لتجنب الزحام. في الحقيقة أنا انبهرت بالتنظيم، فاق توقعاتي.
الخطوة ١٤: بعد حوالي ٤٠ دقيقة نزلنا من الباص بتاعنا وقاموا برش الحقائب بتاعتنا للمرة الثالثة، واحنا كمان المرة دي رشونا وقاموا برش الجزم بتاعتنا من فوق ومن تحت. مش بهزر لو قلت إنه في أقل من نص دقيقة أخذوا باسبوري وأعطوني وثيقتين ومفاتيح الغرفة.
٢٥ ساعة من ساعة ما رحلت من شقتي في نيويورك ووصلت غرفة الأوتيل على البحر.
الخطوة ١٥:
مفيش أي حد طلب مني ادفع أي فلوس، ولا حتى طلبوا كارت الائتمان علشان أي حاجة زيادة ممكن أطلبها. الغرفة فيها كل حاجة: مياه، شاي، قهوة، صودا، وورق تواليت. حاجات تكفي عائلة كاملة. فيه ترابيذات صغيرة خارج كل غرفة حيث يوضع عليها الوجبات ٣ مرات يوميا بانتظام "فراخ وخضار وسلطة وجبن ومخلل وأرز وعيش وكنافة وفاكهة وآخر دلع"، وفي رقم نكلمه لو محتاجين حاجة من الصيدلية أو السوبر ماركت.
أنا تركت أحسن حاجة للآخر: المنظر الجميل على البحر
يا ترى كام دولة عملت كده لمواطنيها علشان يرجعوا بلدهم؟
في الحقيقة عمل رائع يا مصر
ـــ
مصر وقفت الطيران رسميا حتى ١٥ إبريل، لكن الحكومة رتبت ونظمت طائرتين تغادران من واشنطن لاسترجاع مواطني مصر، وأنا ركبت طائرة ٤ إبريل.
ــ
الحكومة بتستخدم فلوس صندوق تحيا مصر علشان تدفع مصاريف العزل. إن شاء الله أنا وأتمنى من كل المصريين اللي كانوا على الطيارة القادرين أن نقوم برد الجميل ونتبرع للصندوق أول ما نوصل القاهرة بالسلامة حتى يتم استخدام هذه النقود لدعم الأشخاص الأكثر احتياجا.
هكذا سردت أيثار قصتها مصحوبة بالصور على صفحتها الشخصية بموقع التواصل الاجتماعي "فيس بوك" باللغتين العربية والإنجليزية.
جوجل نيوز
