سارة التونسى تكتب: رحلة البحث عن السعادة

لو سالنا مجموعة من الاشخاص ايه اللى ممكن يخليهم سعداء او ايه مفهوم السعادة بنسبالهم كل واحد هيكون ليه رد مختلف اكيد ، فيه اللى هيقولك شغل معين و فيه اللى هيكون اجابته شخص معين، فيه اللى هيقولك فلوس اكتر، عربية اجدد، وظيفة احسن، فيه اللى هيقولك الاجابات المحفوظة زى الصحة و راحة البال، و كتير غيرهم من الاجابات اللى ملهمش عدد ! ساعات بقعد و افكر ايه هى السعادة وبييجى فى دماغى الجمل الكليشيه زى السعادة قرار من جواك و انت اللى بايدك تكون سعيد او تعيس، و جمل شبه رضا ربنا ورضا أهلي و غيرهم و غيرهم، عمرى ما قدرت اتوصل لاجابة ترضينى، مره كنت بتكلم مع حد من صحابى و قالى انا مش عارف امتى اخر مرة كنت مبسوط او سعيد، الحقيقة الجملة  تبان عادية و بنسمعها كتير، بس فعلا ايه اللى ممكن يخلى حد ميفتكرش اخر مرة اتبسط فيها للدرجادى حياته تعيسة و لا احنا اللى معايير السعادة عندنا ارتفعت و اختلفت و مفهومها بقى معقد و اصعب من ان حد يحس بيه !!

طيب انت لو متخيل ان السعادة فى العربية الجديدة دى طب لو باظت ولا لا قدر الله عملت حادثة ؟

لسه هتكون شايف ان السعادة فيها؟

طب لو السعادة كانت بالنسبالك شخص معين طب لو الشخص ده عمل تصرف معين او اتغير معاك، مفهومك عن السعادة هيتغير؟ السؤال اللى دايما بسأله لنفسى هو احنا ليه حاصرين السعادة و الانبساط بحاجات معينة و ليه حابسين نفسنا فى الدايرة دى و مش عارفين نخرج او بمعنى اصح مش عايزين نخرج منها ! بدأت اقتنع ان موضوع السعادة قرار من جواك دة مطلعش كليشيه و لا حاجة و ان فعلا الواحد هو اللى بايديه يختار يكون سعيد و مبسوط او لا بغض النظر عن اى حاجة تانية...طب تفتكروا ساعات بنكون مبسوطين بس مبنقولش اننا مبسوطين او يمكن خايفين او حتى ممكن نبقى مش عارفين هل هى دى السعادة بجد ولا لأ، و هل ممكن نبقى فعلا مش عارفين بسبب مشاغل الحياة او غيره من الاسباب و نسينا نسأل نفسنا احنا مبسوطين ولا لأ ،،،!!

وصفت باحثة علم النفس (سونيا ليوبوميرسكي) مفهوم السعادة في كتابها (The how of happiness) على انه تجربة من الفرح، الرضا، و الاطمئنان او الرفاهية الايجابية ! يا ترى ده معناه ان السعادة ممكن تكون رفاهية للاسف الاجابة هتكون اه لنسبة كبيرة من الناس، ده مش معناه انهم تعساء لا مش بالضرورة بس ممكن يبقوا زى ما بنقول فى العلوم كده Neutral  يعنى مش حاسين بشعور معين ولا هو سالب ولا هو موجب هما ماشيين فى الحياة و خلاص معندهمش الرفاهية انهم يفكروا هما سعداء ولا لأ،،، من وجهة نظرى اللى اتوصلتلها بعد تفكير كتير ان السعادة شيء نسبى و مش حاجة ثابتة، هو شعور ايجابى جميل بيخليك مطمن لكن انت اللى فى ايدك الشعور ده و هو فعلا قرار من جوانا واحنا اللى قادرين نتحكم فى مشاعرنا  و محدش غيرنا هيخلينا نحس بيه .. دور جواك شوف ايه اللى هيخليك مرتاح و سعيد واعمله بس متقصرش السعادة فى اشياء معينة ومتحبسش نفسك فى دايرة مش هتعرف تخرج منها طول حياتك.