نص الحوار الأهم للرئيس عبدالفتاح السيسي
اسراء علاء الدين
تصريحات غير مسبوقة للرئيس عبدالفتاح السيسي، في حوار إنساني، فريد من نوعه، المحاورون عشرة من شباب مصر وأطفالها القادرين باختلاف، والمجيب عن التساؤلات هو الرئيس عبدالفتاح السيسي رئيس الجمهورية، وشهوده هم ضيوف احتفال “قادرون باختلاف”، بمركز المنارة، وملايين المصريين وغيرهم من مشاهدي الاحتفال وفي القلب منه الحوار الذي اذيع على الهواء مباشرة.
ربما يعجبك
"بوابة روزاليوسف"، تقدم لقرائها نص الحوار الذي أداره الفنان أشرف عبدالباقي، وطرح فيه الأسئلة على عشرة من زهور مصر الذين أثبتوا بما لا يدع مجالًا لأي شك أنهم قادرون حقًا باختلاف.
الرئيس في هذا الحوار تحدث عن مثله الأعلى في الحياة، وعن أمنيته الشخصية والعامة، وعن أصعب وأسعد اللحظات في حياته، وعن حلمه الذي سعى إلى تحقيقه في طفولته، وعن الكثير من تفاصيل شخصيته وحياته وأمنياته لمصر.
وإليكم نص الحوار الأهم:
الفنان أشرف عبد الباقي لـ"علي" عرف نفسك؟
علي: أنا على هاني أحمد بطل الجمهورية في ألعاب القوي حاصل على 49 ميدالية دهب وفضة وبرونز، عندي 15 سنة، وبلعب في مركز شباب الجزيرة.. سؤالي لحضرتك يا سيادة الرئيس، ما أجمل لحظة وأصعب لحظة مرت عليك في حياتك؟
الرئيس السيسي يجيب: سؤال صعب أوي يا علي، أصعب لحظة الفترة اللي حسيت فيها ان بلدنا ممكن تروح دي أصعب لحظة، يا على، أحيانا يكون فهمك مشكلة ويعذبك، يعنى لو انت بتفهم اوي وبتعرف اوى بتتعذب أوي، لأن هتشوف حاجات مفيش حد غيرك هيشوفها وهتعرف حاجات محدش يعرفها غيرك، ليه خوفت يا على...خوفت على ناسي واهلي وكل الناس اللي موجودة في مصر عددنا كبير ومشاكلنا كتير وظروفنا صعبة، فلو البلد راحت الناس دي هتروح فين، أما أسعد لحظة لسه مجتش...وهو الحلم اللي انا بحلمه لبلدي برضه.. يا رب بيكو وبمصر وبالمصريين وبالشباب والكبار وقادرون باختلاف اللي أنا بعول بيهم امام الله وبرجو من الله أن يساعدنا.
أشرف عبد الباقي لعلي: أنت إيه أسعد لحظة بالنسبة لك يا علي؟
علي: مصر فازت على الكونغو في كأس العالم 2018.
ونفسي أقابل محمد صلاح "أبو مكة" ولو دقيقة واحدة.
الرئيس السيسي: نجيبه.. هو بطل ودايمًا مع مصر.
أشرف عبد الباقي ينتقل إلى نورهان ويطلب منها أن تعرف نفسها.
نورهان: أسمي نورهان عثمان، عندي 20 سنة، طالبة في 3 إعدادي، أول بطلة للتزحلق على الجليد في "قادرون باختلاف"، ولاعبة سلة وعارضة أزياء.
الرئيس السيسي: أهلًا يا نورهان.
نورهان: أهلًا وسهلًا يا فندم.
ووجهت نورهان سؤالها للرئيس السيسي: إيه أكتر أمنية شخصية حضرتك بتتمناها وإيه أكتر أمنية لمصر حضرتك نفسك تحققها؟
الرئيس السيسي: يا رب الكلام ده يوصلكم، أكتر أمنية شخصية إن ربنا يرضي عنى، دي أكتر أمنية شخصية، بالمناسبة يا نورهان دي أمنية عزيزة، عارفة رضا ربنا يعنى ايه، ربنا عظيم السماوات والأرض...صاحب الكون كله.. صاحب الملك كله.. يرضى.. يا ريت، اما بالنسبة لأمنيتي لمصر، فأنا بحلم بيها وليها، وليكوا ولكل الناس، مشينا خطوة من الالف، فاضل ألف خطوة يعملوها المصريين.
وسأل الفنان أشرف عبد الباقي نورهان عن أمنيتها الشخصية.
فقالت نورهان: نفسي أكون مذيعة وممثلة وموديل وأمنيتي العامة محدش يقول علينا إحنا ذوي الهمم إحنا ذوي احتياجات خاصة إحنا ذوي قدرات خاصة، بل إحنا "القادرون باختلاف".
وعلق الرئيس السيسي على إجابتها قائلُا: استاذ أشرف عنده مسرح جميل وقدم شباب كتير.. وأنت يا أشرف بتدير الحوار يلا بقي.. فرد الفنان أشرف عبد الباقي: تنوري يا نورهان.
وانتقل الفنان أشرف عبد الباقي بحواره إلى ريتاج، وسألها اسمك إيه بالكامل؟
فردت ريتاج جمال عيسوي محمود، عندي 12 سنة.
وسألت ريتاج الرئيس: إنت مبسوط وإنت قاعد معانا؟
فرد الرئيس السيسي قائلًا: هقولك بجد وربنا وحده يعلم اللي في نفسي، أسعد يوم ببقي فيه اليوم اللي بشوفكم فيه وأبقى وسطيكم واللي بيسعدني كده هو وجودكم وربنا بينزل على قلبي البهجة والسعادة والسرور والرضا.
ريتاج: شكرًا.
الرئيس السيسي: أنا سعيد جدًا بيكى يا ريتاج ومبسوط إني معاكم.
ريتاج: مبسوطة وأنا قاعدة معاكم.. أنا بحبكم.
الرئيس السيسي: وأنا كمان بحبكم جدًا ومبسوط وأنا ببقي معاكم، شكرًا ليكي إنتي يا حبيبتي.
وانتقل الفنان أشرف عبد الباقي بحواره إلى ملك.. وقال لها عرفي نفسك؟
فأجابت ملك: ملك محمد، عندي 9 سنوات، بطلة مصر في السباحة في نادي الشمس، بتعلم بيانو وبسمع أغاني عمر خيرت بغني وبحب التمثيل والتأليف وبغني في دار الأوبرا.
الرئيس السيسي: ما شاء الله.
ملك: مبسوطة بوجود حضرتك النهارده معانا.
الرئيس السيسي: ده أنا اللي مبسوط.. وإنتى يا آية...هتسمعينا حاجة؟
ملك: هسألك سؤال دلوقتي.
الرئيس السيسي: بس ميكونش صعب عليا.
ملك: مين مثلك الأعلى؟
الرئيس السيسي: سؤال مهم أوي، دايمًا الناس في السؤال ده يا ملك يقولوا فلان، لكن أنا في الحقيقة مثلي الأعلى نماذج كتيرة من الناس، يعني مخدتش حد لوحده، لا، والحقيقة أول من تأثرت بيهم وكانوا نموذج بالنسبة لي هي أسرتي اللي أتربيت في كنفها والدي ووالدتي.
والدتي كانت شديدة الحكمة والصبر يعنى مش عايز أكون منحاز وأقول مشفتش نموذج زي كده – كل الناس بتحب أمهاتها وكل الناس بتشوف إن امهاتها أحسن أمهات لكن هي حتى علمتني ضمن حاجات كتير أتعلمتها منها "التجرد"، يعني أشوف الأمور بمعيار بعيد عن الهوى والانحياز والتمييز، فأنا أول ما علمتني كده وكبرت بقيت أحكم عليها وأوزنها بالتجرد، فملقتش أعز منها ولا أكرم منها ولا أحكم منها.
والدي كان شديد الهمة، فضل يعمل من الفجر حتى الساعة 12 صباحًا، رغم أنه كان ميسور الحال، لكنه كان يحب العمل في أمور كتيرة عايزة أقولها وفي أمثلة كتيرة جدًا.
كان ليا عم شديد الكرم -شديد الرفق بالناس لم أر في حياتي نموذج مثله، فكان كريم جدًا مع الأطفال والبنات والضعاف، وأنا أخدت منه دي، مخدتش نموذج لوحده واتعلمت من محيطي حقيقي النماذج كانت طيبة ودلوقتي هم عند ربنا دلوقتي، أتمنى من الله أن يجازيهم خيرًا ويرحمهم.
وسأل الفنان أشرف عبد الباقي ملك قائلًا: إنتى مين مثلك الأعلى وليه؟
أجابت ملك: مثلي الأعلى طه حسين، لأنه تخطى كل الظروف والصعوبات مع أنه كان كفيف وكبر وحقق حلمه، وكان وزير، وأنا لما أكبر نفسي أكون وزيرة الثقافة.
الرئيس السيسي: ممكن تكوني وزيرة الثقافة من غير ما نشيل حد يعني، تبقى وزيرة الثقافة بتاعت السن بتاعك.
ملك: أقول لحضرتك نفسي أكون وزيرة الثقافة ليه، علشان عايزة أمثل.
الرئيس السيسي: استاذ أشرف النهارده عنده فرصة كبيرة جدًا، بقت مسؤولية كبيرة عليه جاي يقدم وجاي ياخد مواهب.
أشرف عبد الباقي، كده طلعت بفرقة يا فندم.
وانتقل أشرف عبد الباقي إلى الطفل أنس.
أشرف عبد الباقي: عرف نفسك يا أنس؟
أنس: اسمي أنس سعد عندي 8 سنين بلعب بيانو السلم الموسيقي، بسأل الرئيس.. حضرتك لسه بتكلم صحابك اللي كانوا معاك في المدرسة أو في الكلية؟
الرئيس السيسي: والله يا أنس مبقاش في فرصة إني أكلم صحابي صحيح يعني حتى ويمكن أسرتي وده تقصير مني بس أنا الظروف هي اللي عاملة كده، ظروف الوظيفة يعني.
لكن أنا غلطان علشان مش بسأل ولا بتصل.. رديت كده كويس.
وسأل الفنان أشرف عبد الباقي الطفل أنس.. أنت نفسك تبقي إيه بقى؟
أنس: ضابط.
الرئيس السيسي: ده إحنا نتشرف بيك يا أنس.
أشرف عبد الباقي يعطي الكلمة للطفلة بسملة.
عرفي نفسك؟
بسملة: اسمي بسملة محمد عندي 10 سنوات في سنة رابعة، بحب الرسم والتمثيل ونفسي أطلع كابتن طيار.
وسؤالي للرئيس.. حضرتك منورنا النهارده يا سيادة الرئيس.. وعايزة أسالك بتشتغل كام ساعة في اليوم؟
الرئيس السيسي: طب ما تسألي بتنام كام ساعة في اليوم أحسن.. عايزة أقولك معرفش أقعد من غير شغل لأني بحلم وعايز كل الناس تحلم ولما تحلم تجري على حلمها، ولازم ربنا هيساعدها أي حد فينا كلنا يحلم ويقول يا رب ويجري لازم ربنا هيساعده.
ده اللي بيشتغلوا معايا زهقوا مني، د. مصطفى مدبولي قالي أرحمني بقي بس هنعمل إيه ما إحنا نفسنا نشوف بلدنا أحسن بلد في الدنيا.
بسملة: ربنا يعينك.
الرئيس السيسي: ربنا يسمع منك.. نفسنا نعملكم أحلى حاجة في الدنيا وربنا يعلم.
بسملة: حضرتك بتعرف تسوق طيارة؟
الرئيس السيسي: إنتي غاوية موضوع الطيران ده جدًا بس أنا هقولك بقي إني هطلب من وزير الدفاع إنه يسمح لبسملة أنه تركب طيارة ثنائي مع أحد الطيارين مادام إنتي حابة أوي، وهنصورك وتوري الناس بسملة وهي في الطيارة.
بسملة: شكرًا يا سيادة الرئيس، ممكن أتصور معاك.
الرئيس السيسي: لازم أتصور معاكم، أنا هاجي أتصور معاكم.
وانتقل الفنان أشرف عبد الباقي بحواره إلى الطفلة مكة.
أشرف عبد الباقي: عرفي نفسك؟
مكة: اسمي مكة عصام عندي 6 سنين وبحب الرسم.. إزي حضرتك يا سيادة الريس.
الرئيس السيسي: أنا بخير يا مكة علشان إنتى موجودة، البركة والرحمة والنصر.
مكة: حضرتك كان نفسك تطلع إيه وأنت صغير.
الرئيس السيسي: وأنا صغير كان نفسي أطلع طيار، صحيح، دخلت الثانوية الجوية سنة 70 علشان الحلم ده، لكن لم يتحقق ورضيت بقضاء الله.
أشرف عبد الباقي: وإنتى نفسك تطلعي إيه يا مكة؟
مكة: نفسي أطلع مهندسة، يعني ابني بيوت وعمارات كتيرة أوي.
وانتقل الفنان أشرف عبد الباقي بحواره إلى الطفل محمد.
أشرف عبد الباقي: أزيك يا محمد.. عرفنا بنفسك؟
محمد: اسمي محمد عندي 9 سنوات بطل الجمهورية في السباحة والخماسي.
الرئيس السيسي: ما شاء الله عليك يا محمد.
أشرف عبد الباقي: إيه السؤال اللي نفسك تسأله لسيادة الرئيس يا محمد؟
محمد: مشرفنا يا سيادة الرئيس.
الرئيس السيسي: ده أنت اللي مشرفنا أنتم وأسركم مشرفنا سواء اللي معانا هنا أو في البيوت ببعتلهم كل التحية والاعتزاز والتقدير ولا تنسونا من طيب دعائكم لينا ولمصر.
محمد: حضرتك إيه اللي نفسك تعمله تاني في "قادرون باختلاف"؟
الرئيس السيسي: اللي نفسه أعمله كتير أوي ليكم، لأن كل شخصية منكم لها، المفروض أن إحنا كدولة وكشعب وكمجتمع نقدم ما يمكن تقديمه، وبالتالي بقول لـ د. مصطفى مدبولي ومجلس النواب ومجلس الشيوخ محتاجين نعمل تشريع يحط لينا في صندوق "قادرون باختلاف" رقم مش كتير، لكن لما كلنا ندفع فيه هيحقق مساهمة تخلينا نقدر نعمل حاجة كبيرة ليكم، وعايز كل الناس ينتبهوا إلى الكنز الموجود لديهم، وهو أنتم، فأنتم الكنز الحقيقي داخل أي بيت.
أشرف عبد الباقي: نفسك تبقي إيه لما تكبر؟
محمد: ضابط جيش.
الرئيس السيسي: هنعمل رحلة ليكم كلكم لكلية الشرطة أو الكلية الحربية ويوم نقضيه كلنا هناك.
وانتقل الفنان أشرف عبد الباقي بحواره إلى آية.
أشرف عبد الباقي: عرفي نفسك يا آية؟
آية: اسمي آية شلتوت عندي 19 سنة بطلة ألعاب قوى وتنس أرضي وتنس طاولة طالبة في 3 ثانوي قسم أدبي، كنت ملكة جمال مصر وبحب التمثيل والإذاعة.
أشرف عبد الباقي: آية السؤال اللي نفسك تسأليه لسيادة الرئيس؟
آية: إزي حضرتك يا ريس.. مين أكتر شخصية تاريخية حضرتك بتحبها؟
الرئيس السيسي: أكتر شخصية تاريخية بحبها هو النبي محمد صلى الله عليه وسلم وأصحابه اللي هم مثل جميل للإسلام والمسلمين كانوا رحماء وطيبين وفاهمين وقادرين، وإحنا في الحقيقة اللي حصل خلال السنين اللي فاتت ظهر ناس كانوا ليسوا مثل جميل للإسلام والمسلمين، لأنهم مارسوا الإرهاب والتطرف والتشدد، وأنا أكره التطرف والتشدد والغلو كفكرة لأنها بتدي كقبح شديد لإنسانيتنا، علشان كده بعتبر النبي محمد صلي الله عليه وسلم وأصحابه علامة وقدوة هائلة بالنسبة لي.
أشرف عبد الباقي: مين الشخصية التاريخية اللي بتحبيها يا آية؟
آية: خالد بن الوليد، لأنه قائد قوي وبطل زي حضرتك.
وانتقل الفنان أشرف عبد الباقي بحواره إلى أحمد.
أشرف عبد الباقي: عرف نفسك يا أحمد؟
أحمد: اسمي أحمد طارق محمد جميل سني 25 سنة، شاعر وبطل سباحة وألعاب قوى وفنان كوميدي.
الرئيس السيسي: لازم تقدم لنا فقرة كوميدية بقي دلوقتي.
أشرف عبد الباقي: إيه السؤال يا أحمد اللي نفسك تسأله لسيادة الرئيس؟
أحمد: إيه الرياضة المفضلة لحضرتك وبتمارسها؟
الرئيس السيسي: الرياضة اللي بحبها جدًا هي لعبة الكاراتيه ومارستها لوقت طويل، وكانت من 50 سنة لعبة جديدة، وهي لعبة شديدة الانضباط وشديدة الأدب والخلق الحسن، وبتعلم صاحبها مبادئ وقيم منضبطة للغاية، وتستطيع أن تخرج نموذج فريد في السلوك والتعاون والقدوة والاحترام، لكن لما كبرت في السن لم أمارسها الآن، لكن حافظها وعارفها جيدًا، وقعدت عمر كبير أمارسها.
أحمد: هل حضرتك مبسوط بوظيفة رئيس جمهورية مصر العربية؟
الرئيس السيسي: سؤال صعب أوي، صحيح، لكن دايمًا بقول يا رب، والأمر كله لله سبحانه وتعالى يعطيه وينزعه ممن يشاء، فعندما يؤتي الله سبحانه وتعالى الملك لأحد الدنيا تتجهز جميعها للأمر "يؤتي الملك من يشاء وينزع الملك ممن يشاء"، ودايمًا بقول يا رب زي ما حملتني المسؤولية ساعدني وأعطيني وقدرني أسعد الدنيا كلها، لو قدرت أعمل كده هبقى راضي إني توليت الوظيفة.
أحمد: بس أنت طيب علينا أوي يا ريس، وبفتكر كلمة حضرتك دايمًا مصر أم الدنيا وهتبقى أد الدنيا.
الرئيس السيسي: بفضل الله سبحانه وتعالى.
أشرف عبد الباقي: إيه اللي نفسك تحققه يا أحمد؟
أحمد: نفسي ألعب سباحة في النادي الأهلي.
الرئيس السيسي: لازم النادي الأهلي ياخدك دلوقتي يا أحمد، والنادي الأهلي كله دلوقتي فرحان بأنك هتكون عضو معاهم، والكابتن محمود الخطيب بعت تأكيد دلوقتي.
وانتقل الفنان أشرف عبد الباقي بحواره إلى عبد الرحمن.
أشرف عبد الباقي: عرف نفسك يا عبد الرحمن؟
عبد الرحمن: اسمي عبد الرحمن أشرف، عندي 17 سنة، بطل مصر في السباحة حاصل على منحة أكسيس من الجامعة الأمريكية لسنة 2020، بحب التمثيل أوي أوي.
أشرف عبد الباقي: إيه السؤال اللي نفسك تسأله لسيادة الرئيس؟
عبد الرحمن: متشرف بوجود حضرتك وسطينا يا سيادة الرئيس.
الرئيس السيسي: أنا اللي متشرف بيكو وبأخواتك اللي قاعدين وموجودين معانا النهارده.
عبد الرحمن: إيه أكتر مشروع أنشئ أو لسه تحت الإنشاء حضرتك شايف إنه ليه دور مهم لمصر؟
الرئيس السيسي: أنا أتصور إن أكتر مشروع ممكن يكون له تأثير كويس أوي هو "حياة كريمة"، فرصة يا أحمد علشان أقولك ان المشروع مهم مش علشان إحنا أطلقناه أو بنديله دعم، لا، علشان هو بيمس 60 مليون مصري، وبنستهدف منه تيسير حياة الناس، ولو قدرنا نعينهم على دنياهم هيبقى عملنا حاجة كبيرة أوي، لأن إحنا بنتكلم عن كل قرى الريف المصري.
لو أنت في بيت مفيش فيه مياه شرب بانتظام أو كهرباء بانتظام أو صرف صحي غير متوافر متصور حجم المعاناة، اكيد الحياة في البيت هتبقى صعبة، وأيضًا في البيوت المجاورة له، أيضًا تخيل شكل البيوت بدون طريق أو مدرسة أو مستشفى أو خدمات، إحنا كدولة وشركات ومجتمع مدني لازم نعرف أد إيه قيمة مشروع "حياة كريمة"، وإزاي هو هيعود بالنفع على الناس وتبقى عارف يعني إيه إنك تخلي واحد نايم في بيته سعيد كل يوم، وكل يوم تدخل عليه تحقق له اليسر والسعادة، ده قيمته عند ربنا سبحانه وتعالى كبيرة جدًا.
وإنسانيًا ليه قيمة كبيرة، فمشروع "حياة كريمة"، هو أحسن وأكبر وأعظم مشروع، ولو نجحنا في إنجازه لأنه تحدي وعلينا كدولة أن ننجح في تحدينا أمام الناس، فهو مرتبط بـ60 مليون إنسان وإنسانة.
عبد الرحمن: هل يا ترى أي مشروع حضرتك بتفكر فيه معمول حسابنا فيه، "قادرون باختلاف"؟
الرئيس السيسي: شوف إحنا بنعمل صندوق "قادرون باختلاف"، كل حاجة عايز تعملها بتبقى عايزة قدرات مالية علشان نقدر نعملها، وبرضه بقول إن وعي الناس وإننا نعرف أوي نتعامل مع بعض بالحب والاحترام ده لا يقدر بمال، التعامل بما يليق بين الناس وبعضهم البعض، لو ده أتحقق الدنيا هتبقى مختلفة تمامًا حتى لو الظروف الاقتصادية مش كفاية، وبأكد مفيش تمييز بين المصريين أنتم ولادها وحبايبنا وعلى راسنا كلنا.
جوجل نيوز
