بعد هجومه على صلاح.. مجدي الهواري يوضح ويصحح
محمد إسماعيل
أصدر المخرج مجدي الهواري بيانا لتوضيح اللبس حول المنشور الذي انتقد فيه لاعب نادي ليفربول الإنجليزي، محمد صلاح.
ربما يعجبك
واستهل الهواري حديثه قائلا: "توضيح وتصحيح لبوست محمد صلاح"، وأضاف: "المفروض ان معروف قد ايه انا بحب محمد صلاح مش محتاج اقول ده! لأني بشجع النادي اللي بيلعب فيه بس علشانه، وقبل كده كنت بشجع روما وقبلها تشيلسي برضه علشانه، وحاطط صورته فوق سرير بطل مسلسلي طول الـ30 حلقة علشان يبقى قدوة لكل جيل والشباب اللي بيشوفوا المسلسل ومنهم ولادي، وأنا واحد من الناس اللي شايف أنه مش واخد حقه وقولت ده كتير! سواء في فرصة الكرة الذهبية ولا حتى في مرتبه اللي بيخده حاليا!!".
وأضاف الهواري: "بس رأيي مش مهم جنب المعاير العالمية لفرصة الاتنين، بس جات الفرصة في العروض اللي بتتعرض عليه في نوادي تانية بالرقم اللي هو عايزه ويمكن اكتر سواء في باريس سان جيرمان او الريال وهو عارف ان ليفربول مش يدفعوا الرقم ده لحسابات كتيرة.. واكتر رقم هيدفعوه هو الـ400 الف، وانا كتبت قبل كده اوعي تمشي يا صلاح من نادي عملك نشيد! المشكلة مش هنا، ولا المشكلة في الانتقال! المشكلة في الحسم! في القرار! علشان صلاح يركز في الكورة.. والله ده كان قصدي، المشكلة في سبب كتابة البوست الانفعالي جدا".
وتابع: "علشان مصلحته في اللي كتبته! المشكلة ان ابننا صلاح تركيزه في المباريات بيقل لما يكون في حاجة تانية شغلاه ومحدش ينكر ده! لدرجة إن الخصم بقى يلعب على ده وواضح ان مدير اعماله مش باعد عنه كل كلام المفاوضات ومخليه بيفكر طول الوقت معاه.. لازم يشتغل على نفسه في الموضوع ده زي ما اشتغل على نفسه في حاجات كتيرة وبقى قدها واتخلص منها! زي اتقان اللغة وتحديات كتيرة جداً وتدريباته المستمرة على رفع كفاءة الاداء، بعدين مع كارثة كمان خروجنا من كأس العالم اللي لحد دلوقتي مأثرة عليه واحساسه بالمسؤولية امام الشعب المصري كله. مش بس جمهور الكورة اللي احنا نفسنا واضح نسيناها وهو الوحيد اللي لسه متأثر بيها! مع الفرصة الضايعة في الكورة الذهبية تاني! لانه معملش حاجة لمنتخب بلده، واللي مخليه مش بينام بسببها".
ومضى الهواري، يقول: "الله يكون في عونه الصراحة احلام كتير بيفكر فيها وافكار كتيرة بترن جواه ومخلياه مش في الفورمة بقاله شوية حلوين! هو انتم كمان مش معايا انه من ساعة ما رجع من إفريقيا وهو مش تمام؟! ولا مش متابعين الفرص الكتير الضائعة منه اليومين دول ولا كلوب لمًا قال صلاح بنعالجه بعد رجوعه.. قولوا كلمة حق بقى! لصالحه بس اليومين دول يومين حسم الالقاب ياابو صلاح مفيش دلع دوري بعد ماتش تعادل توتنهام/ وابطال اوروبا وماتش الريال والثأر القديم! ولقب الهداف اللي سون قرب منه بعشرين جون! وتركيزك في الانتقال والمفاوضات.. علشان كده بقولك انت في خطر! ركزززززززززز".
وأنهى الهواري، بقوله: "اعتقد ان كلامي كده وضح ياجماعة اني خايف على صلاح وده سبب في انفعالي لانه الحاجة الوحيدة الحلوة اللي حيلتنا.. ولا ايه؟! أانا عايزه يركز في الكورة في الملعب لانه ده هو اللي هيجيبله ويجيب لنا كل الخير.. مساء الخير يا صلاح وزي ما تريكه بيقوله! ركز ياصلاح.. أشوفكم بعد ماتش الريال! مباراة الحسم! أتمنى عودة صلاح بكأس أبطال اوروبا يا رب يبقى كلامي حماسي للفرعون الصغير فخر قلبنا".
جوجل نيوز
