يا انا يا انتي يا شغالتي

بقلم : آيات الصبان

الحلقة التامنة

أمتثال

بما ان جوزي الحبيب صاحب شركة استيراد وتصدير و شغله بيتطلب سفر كتير فهو يا قلبي كان عايش معايا كل الافلام بتاعت الشغالات على التليفون، كان كبيره يشوف الشغالة يومين تلاتة و يسافر يرجع ميلاقيهاش و يلاقي واحدة تانية ،  ساعات كان بيفتكرني بأبالغ و يقولي عمرك ما هتعيشلك شغالة، بطلي عصبية و استحملي شوية، وانا اقوله حرام عليك انت عشان مش بتشوف تصرفاتهم بعينيك  فمش متخيل حجم الأستفزاز، المهم جوزي العزيز كان موجود و مش مسافر و حضر قصة مكتب الخدم الجديد و قالي احسن نتعامل مع مكتب معروف مكانه بدل سيد ده اللي لا نعرف اصله و لا فصله، اهو لو حصل حاجة نعرف نجيبهم ،  و قعد ينتظرني  في البيت لما رحت  اجيب امتثال من المكتب طبعا عشان الستات منقبات و كدهو ، المهم وصلت و قابلوني بحفاوة و سألت على امتثال قالولي مستنياكي، اندهوا امتثال المدام جت.

اول ما خرجت امتثال من المكتب انا حصلتلي نوبة من عدم التصديق و عشت في حالة انكار شوية و بقيت اقول لنفسي اكيد مش هي أكيد مش هي ، امتثال كانت شبه كومبارس مشهورة في السينما المصرية اسمها فايزة روسيات (عشان بتضرب روسية في الدماغ تكوم البطل في كل الأفلام المصرية) ناس منكم ممكن يفتكروها و دول ممكن يقدروا الحالة اللي انا كنت فيها، قلت لها : فايزة؟ قصدي امتثال؟ قالت لي: ايوة يا مدام، سبحان الله يخلق من الشبه اربعين حتي الصوت يا ربي ، هي فايزة بغباوتها.

قلت للسكرتيرة ممكن كلمة على انفراد، قالتلي اتفضلي  ، سألتها هو انا لازم اخد فايزة قصدي امتثال، قالت لي لأ مش لازم بس معنديش النهاردة غيرها، هي مالها عيبها ايه ، انتي لسة مجربتيش خيرها من شرها، قلت لها مش القصد، انا عندي اطفال صغيرين و دي شكلها يرعب بلد و صوتها كمان، و بعدين ملامحها لا تعبر عن اي طيبة، مش قصدي حاجة وحشة بس ملامحها اجرامية حبتين، انتي متأكدة ان دي أسلامية، قصدي يعني مش سوابق ، ضحكت و قالت لي: كلهم تم اختبارهم و كويسين جدا و بنكشف عنهم في امن الدولة، احنا لينا حبيابنا هناك ، و مبناخدش حد عليه سابقة ابدا، قلت لها بس شكلها مش مريح، قالت لي خديها جربيها يومين تلاتة مشي نفسك بيها، عجبتك خدتيها ، ما عجبتكيش نجيبلك غيرها، حسيت اني اتدبست، بس ريحني ان جوزي في البيت، يعني مش هأبقي معاها لوحدي و هو هيقرر معايا نخليها و الا نمشيها ، قلت لها طب ينفع اكمل العمولة بعدين؟ قالت لي لأ مفيش شغالة تطلع قبل العمولة ما تدفع، انتي ضامنة حقك بالعقد اللي معاكي و احنا لازم نضمن حقنا، قلت لنفسي صح ، مظبوط ، انا معايا عقد بلاش القلق و سوء النية.

امتثال كانت لابسة عباية سودة و طرحة سودة و شبشب بصباع و شايلة كيس بلاستيك فيه هدومها، و عندها بشلة تحت عينها، في العربية سألتها ايه اللي تحت عينك ده؟ قالت لي المنيل جوزي هو اللي علم لي وشي كدة ، كان بيضربني ضرب يا مدام هو انا سبته من شوية قلت لها انتي بتضربي، اومال الستات العادية يتعمل فيها ايه؟، ده اكيد مفتري جدا؟، قالت لي جدا، ينيله كان بيشك في خياله، اتطلقت منه بالتيلة و خلصت منه و سبت له العيال و نزلت مصر، استغربت بيشك فيها دي، ده اكيد ما عندوش نظر وقلبه ميت ، قلت لها اومال انتي كنتي عايشة فين اصلا؟ قالت لي في الزقازيق ، سبتهم كلهم و نزلت هنا عند واحدة صاحبتي كنت اعرفها من زمان و كانت بتشتغل معايا قبل ما اتجوز، المهم الحوار اتقطع هنا لأننا وصلنا، بس الحوار هداني شوية، لقيتها مستأنسة و بتتكلم عادي لأ والأنكت  بتنضرب كمان يعني في فرصة تطلع طبيعية، و اتولد جوايا الأمل من جديد.

اول ما فتحت باب الشقة جوزي كان قاعد في الصالة بيشرب قهوة و متسلطن اوي، اول ما دخلنا كان بياخد شفطة قهوة لكن تقريبا من الخضة شفطها من مناخيره ، لقيته قعد يكح و يشرق الراجل كان هيروح فيها، جبتله مية و خبطتله على ضهره و هو يبصلي و عنيه بتسألني ايه الشئ ده الله يخربيت عقلك ، قلت له ردا على اللي بيدور في دماغه، امتثال هنجربها كام يوم و انشالله تكمل ، بصلي بصة انا فاهماها كويس معناها لفي وديها مطرح ما جبتيها بدل ما تباتوا انتوا الأتنين عالسلم، رديت عالنظرة بكلمة واحدة: على فكرة دول خدوا العمولة ، بصلي بصة معناها حسبي الله و نعم الوكيل فيكي يا شيخة، تجاهلت البصة و خدت امتثال علي جوة، كدة كدة الدعوة بتلف و ترجع لصاحبها.

الدور كان على العيال جوة، ابني الكبير اول ما شافها مسك فيا و قالي هي دي كمان عندها عفريت زي مني؟ قلت له لأ يا حبيبي دي امتثال و هي طيبة جدا ، طبعا امتثال مكنتش فاهمة يعني ايه العفريت،  و ابني مصدقش حكاية طيبة دي ، بصلي هو كمان بصة معناها انتي بتعملي فيا كدة ليه هو انا مش ابنك و الا لاقياني على باب جامع، طنشت البصة خاااالص و قلت عيل و بكرة يفهم، فضل الصغير و ده ما أتكلمش خالص، اول ما شافها رقع بالصوت و هاتك يا عياط و صريخ و يمسك فيا و بيبصلي بصة هو كمان بيقولي فيها انتي اكيد مش مجنونة خالص و رايحة منك و ناوية تسيبيني معاها ، هديته و حضنته لحد ما سكت  و قلت لنفسي انا هعمل ايه طيب اجيب لهم شغالة تفصيل منين بس ، امتثال ساعتها قالت لي ما تقلقيش يومين تلاتة و هيحبوني خالص، انا عارفة انهم مش متعودين عليا لسة، بس هتشوفي هما و البيه هيحبوني ازاي، قلت لها و هو ده المطلوب همتك معايا بأة ، قالت لي و لا يكون عندك فكر.

ابني الصغير كان عنده  استشارة عند الدكتورفي نفس اليوم و كان لازم انزل جري، ابني الكبير شبط فيا، و جوزي كان بيتفرج على ماتش كورة، قلت لجوزي خلاص هأخد الولدين و انزل اروح للدكتور و مش هأتأخر ، جوزي كان قلقان من امتثال بس طبعا ما ينفعش يبين ، قالي ماشي بس ما تتأخريش، قلت له حاضر، عادها تاني، اوعي تتأخري انا بقولك اهو ، قلت له لا تقلق مسافة السكة و خللي التليفون جنبك عشان لو حبيت تكلمني ، حس اني باتريق فلم الدور و سكت.

يا دوبك وصلت عند الدكتور و دخلت الكشف لقيت جوزي بيكلمني ، انتي فين يا هانم؟ قلت له عند الدكتور في اوضة الكشف، قال لي اول ما تنزلي كلميني، خلصت بسرعة و نزلت اجري و كلمته قالي الشغالة اللي انت جايباها وقفتلي بعد ما نزلتي عالعامود اللي في نص الشقة و هي لابسة جلابية محزقة و عاملة فيها هيفا و ماسكة في ايدها سيجارة و بتقولي معاك ولعة، انا طلع عليا رد فعل غريب اوي، مت من الضحك ،  جوزي الوسيم اللي عمره ما شرب سيجارة في بوئه و لا حتي جرب ينفخها في الهوا و المتعلم في بلاد برة و ما بيعجبوش العجب بتخيله و امتثال بشلة بتعمله اغراء و واقفة له على عامود و بتقول له ممكن تولعلي هههههههه اكيد هيحتاج معالج نفساني بعد الموقف ده، قالي انتي بتضحكي يا هانم، هي دي مجايبك، هي دي الأسلامية، قلت له باين عليها اسلامية مغشوشة ، طب انت عملت ايه؟ قالي قلت لها انتي اتهبلتي ؟ اولعلك ايه يا بجحة انتي ، البيت ده مفيهوش حد بيشرب سجاير و خشي جوة استني المدام ، قلت له عموما انا خلاص تحت البيت و طالعة اهو.

اول ما دخلت لقيته بيقولي خشي مشيها،  قلت له بكرة عشان اسلمها بنفسي في المكتب و اخد فلوسي او واحدة تانية، لو مشتها دلوقتي احنا الخسرانين، قالي دي مش طبيعية، تقولي كدة!!! دي مجنونة و الا ايه، قلت له احكيلي بالتفصيل ايه اللي حصل؟ قالي انا قاعد في امان الله و طبعا مقلق منها اصلا، قلت له ايوة انا حسيت ، قالي شكلها يقطع الخميرة من البيت ، وانتي حسابك عند ربنا عسير، ضحكت و قلت له سيبك مني انا دلوقتي ، هي عملت ايه؟ قالي بتضحكي، ليكي نفس تضحكي، عموما و انا قاعد لقيت دي غيرت هدومها و لبست جلابية محزقة و مفتوحة من الناحيتين و لا نانسي عجرم في زمانها، تركيبة الجلابية مع الخلقة مش راكبة خالص ، قلت مش اشكال ملناش دعوة، خدت بالي انها ضاربة اوكسجين في شعرها و مسيباه تحت ايشارب و شكله عامل زي غزل البنات او مقشة المطبخ و هي كلها عاملة زي الساحرة الشريرة   قلت ماشي ملناش دعوة، عمالة تطرقع في لبانة بصوت عالي و رايحة جاية حوالية مش فاهم ليه، طنشتها خالص، المهم وترتني مبقتش عارف هي ايه، شكلها يوحي بقصة و تصرفاتها بقصة تالتة خالص، فجأة لقيتها وقفت على العامود اللي وسط الصالة و هي حاطة ايد في وسطها و ايد سنداها عالعامود و فيها سيجارة و راحت بصالي و قالت لي ممكن ولعة يا بيه؟ انا بصيت لها حسيت ان نفسي غمت عليا، قلت لها ولعة، ولعة ايه؟ انتي بتشربي سجاير؟ قالت لي يقطعه الداء ده ، اصله كيف يا بيه، و الكيف غلاب، طريقتها في الكلام فكرتني بنعمة مختار في فيلم المرأة التي غلبت الشيطان لكن على شكل ميمي باباي، انا طبعا مقدرتش كنت فطسانة على نفسي من الضحك و هو بيحكي و محروق اوي كدة ، قالي بتضحكي على ايه مش دي مجايبك الزفت، لو ضحكتي مش هكمل الحكاية، قلت له لأ و النبي كمل ، انا هخرس خالص اهو، قالي كنت هقوم اضربها قلمين و انتف لها الشعرتين البرتقاني اللي فرحانة بيهم دول لكن اكتفيت بأني قلت لها ما تحترمي نفسك يا ولية انتي، ايه التقصيع ده، احنا هنا ما بنشربش سجاير و ممنوع شرب السجاير ، امشي على جوة اقعدي ما شفش وشك لحد ما تيجي المدام، حاولت تتكلم قلت لها و لا كلمة خشي على جوة بدل ما اتعصب اكتر من كدة، قلت له و انا بضحك طبعا اللي عصبك انها مش شبه نعمة مختار، قالي لأ طبعا، انها مش شبه نانسي عجرم، خبطته في كتفه فضحك و قالي واضح انها لما قالت لك اطمني البيه هيحبني كانت فاكرة انها شادية و البيه عبد الحليم حافظ.

.

  الحقيقة حبيت اسمع من امتثال، الست شكلها  صاحبة مزاج و بتشرب سجاير ، عايزة اعرف حكايتها ايه، كدة كدة هأرجعها بكرة و مش هينفع تكمل، الفضول قتلني، شخصية جديدة عليا، جودزيلا بتحاول تعلق جوزي اول يوم تخش فيه البيت، و ده مالوش غير معني واحد و بس، انها متعودة دايما. دخلت لأمتثال لقيتها بتعيط، قلت لها بتعيطي ليه؟ قالت لي البيه زعل مني، اصلي انا بشرب سجاير و ملقتش كبريت في المطبخ قلت اسأله قام شخط فيا جامد اوي، و حسيته مش طايقني، قلت لها و انتي ليه بتشربي سجاير انتي لاقية تاكلي، مش خسارة الفلوس اللي في الأرض دي  ، قالتلي الهم علمني يا مدام ، قلت لها ازاي، قالتلي زمان قبل ما اتجوز كنت جميلة و رشيقة و كان ليا مستقبل في الفرقة، قلت لها فرقة؟ فرقة ايه؟، قالت لي فرقة فنون شعبية، خبطت على صدري و شهقت كالمعتاد شهقة سمعها الجيران و سألتها انتي كنتي رقاصة؟  قالت لي ايوة ده زمان و انا صغيرة ما تخافيش من بتاع 20 سنة كدة، قلت في عقل بالي و نعم العمالة الأسلامية ، كملت كلامها و قالت لما قابلني المنيل جوزي  سبت الفرقة و اتجوزته ، وشفت المر، لا بيصرف و لا بيتنيل، فكنت بانزل عند صاحبتي من ايام الفرقة اللي عايشة في مصر اغضب عندها و تنزلني اشتغل معاها كام يوم ، قلت لها في الفرقة؟ قالت لي لأ ما هي كمان سابت الفرقة، قلت لها اومال كنتوا بتشتغلوا ايه؟ قالت لي شفيعك النبي ما تفهميش غلط، اصلها شغلانة مش قد كدة، حسيت انها هتقولي مصيبة، قلت لها لأ قولي ما تخافيش، قالت لي كنت بأشتغل فتاحة، قلت لها فت... ايه؟ يعني ايه فتاحة دي؟ قعدت متلخبطة شوية كدة و قالتلي كنت باروح معاها كازينو في شارع الهرم زباينه تجار في السبتية و روض الفرج ايشي في سوق الخضار و بتوع حدايد و بويات ، كان دورنا نقعد معاهم نسايرهم و نخليهم يفتحوا لنا ازايز خمرة يشربوا و يشربونا معاهم، و هي بتحكي  انا احوليت تماما ، حسيت اني في فيلم عربي رخيص اوي و ناقص تقولي واحد خبطني بازازة في رقبتي ، سكتت شوية فقلت لها كملي، فقالت  و الكازينوطبعا كدة  بيكسب لكن و النعمة بشرفنا، بنروح اخر الليل وحدينا، و ناخد عمولتنا، انا كنت مبرقة و عينيا خارجين متر، و صوتي اتحاش ، ووصلت لأعلي مراحل الأنبهار يعني انا جايبة من مكتب العمالة الأسلامية شغالة كانت رقاصة و بعدين فتاحة ازايز في كازينو حقير في شارع الهرم  و جاية تغري جوزي و تشرب سجاير في بيتنا ، يا صلاة النبي احسن .

قالت لي بس خلاص كتر الهم خلاني زي ما انتي شايفة كدة و مبقتش انفع للشغلانة دي فكان لازم اشتغل في البيوت ، هو انا لو اتأسفت للبيه ممكن يسامحني ؟ قلت لها انسي البيه خالص، البيه لو خرجتيله هيطوحك من البلكونة ،  بس قوليلي هي نورا سكرتيرة المكتب تعرف الكلام ده؟ قالت لي صراحة هي تعرف بس قالت لي ما اقولش، لكن انا زي التروبش باقول كل حاجة اصلي انا قلبي ابيض، قلت لها و كنتي بتشربي سجاير هناك ؟ قالتلي اومال ايه ، اصلا معظمهم بيشربوا سجاير، قلت لها و شغلوكي في حتة قبل كدة؟ قالت لي لأ اول مرة، انا لسة عارفاهم من يومين  قلت لها بقولك ايه ما تزيدي النبي صلاة في قلبك كدة، وتنامي و انا ليا بكرة تصرف تاني. ليا تصرف واحد ، دانا هاخنقهم بالنقاب اللي على وشهم ده.