شريف سرور.. «النوبي» نجم إعلانات منتدى شباب العالم

حوار - محمد يوسف

سرور: إعلان منتدى شباب العالم نقلة عملاقة في أعمالي وفخر إني بمثل جيلي والشباب

 

البداية.. بعد تخرجي من كلية تجارة إنجليزي بجامعة عين شمس، في 2013 بدأت في العمل بمجال اللياقة البدنية، لأني كنت بتمرن من عام 2007 وعندي من الخبرة ما يؤهلني للعمل في المجال ده.. والحمد لله عملت نتائج طيبة كتير لمدة عام واحد فقط، لأني بعد كده اتجهت لكورس محاسبة، وقدمت في أحد البنوك واتقبلت وهو ده عملي الأساسي من 2014 حتى الآن.. وفي عام 2015 قررت أدخل كورس CFT-ISSA  في GOLD'S GYM عشان ادخل مجال التدريب في الچيم واكتسب خبرة جديدة أقدر أكسر بيها روتيني كموظف في بنك.

 

 

 

وفي عام 2016.. قررت أشترك في بطولة مستر أولمبيا للهواة بالكويت، التجهيز كان في 4 شهور بتمرين صباحي وليلي، مطالب بأكل معين كل 3 ساعات بواقع 6 وجبات يوميًا بدون تقصير.. كان شيئًا مُكلف جدًا بتوقيتات معينة وضغط عالٍ، محروم من أي أكلات بحبها، وكل التجهيزات دي على حسابي بدون تمويل خارجي، حتى تذكرة الطيران والإقامة، لكن إنجاز المشاركة في بطولة عالمية مع عمالقة اللعبة بالإضافة إلى إني أكون في المراكز الـ10 الأولى، يكفي إني أكون فخورا بالتجربة وشهادة المدربين والمشاركين إن لي مستقبلًا لو تعمقت فيها وركزت بشكل أكبر، لكن صعوبتها في التجهيزات والتمويل.

 

 

 

 

أنا بحب التصوير جدًا وتفكيري دائمًا في الفترة الأخيرة متجه لمجال عارض الأزياء"MODELING"  وبالصدفة من عام ونصف زميلي في البنك قرر يوجهني للطريق الصح، وقدمنا في مكتب إعلانات "CASTING AGENCY" وبالفعل صورنا معاهم واتكلمنا على بياناتها في فيديو بسيط جدًا، بعدها بـ3 شهور المكتب كلمنا عشان أعمل إعلان لمنتج "سيراميك" ودي كانت البداية اللي فهمتني كل حاجة عن مجال الإعلانات.

بدأت أدخل على الإنترنت وأبحث عن مكاتب الإعلانات، وبالفعل قدمت فيهم، وبعدها طلبوني لإعلان مدرب في الچيم، وهو نفس المكتب اللي رشحني لتصوير إعلان منتدى شباب العالم في نسخته الأولى 2017، لكن محصلش نصيب.

أول نقلة حقيقية لي كانت دوري في كليب الفنان الكوميدي الكبير أحمد مكي، "وقفة ناصية زمان".. كنت موجود في مشاهد كتير من الكليب سواء في العربية أو جنب مكي على السلم، وده فرحني جدًا لأن قبل ما يجمعني به عمل مشترك على أرض الواقع وأكتشف إنه فنان محترم جدًا.. وذوق في التعامل.. أنا أصلاً من أشد معجبيه فنيًا.

 

 

اتجهت لفكرة موديل للعلامات التجارية الشهيرة في مجال الملابس، وطلبت من صديقتي في العمل، تصورني بالكاميرا الخاصة بيها مجموعة صور تبرز موهبتي كموديل، من حيث الوش والطول والعرض، وبالفعل جمعت الصور المناسبة وعملتCV  كموديل فقط، وقدمت في مكاتب أو وكالات إعلانية وبعدها بفترة عملت فعلاً فوتوسيشن لبراند مشهور بدون أجر، بس الاستفادة منه إنها بداية في مجال جديد وصوري انتشرت على جدران كل المولات التجارية.

شاركت في فيلم "الكويسين" اللي اتعرض في عيد الأضحى، وبعدها صورت كليب مع المطربة "أحلام"- لم يُعرض بعد- وإعلانات لشركة طيران واتصالات وأورنج وسبرايت، وأخيرًا وليس آخرًا إعلان منتدى شباب العالم 2018، اللي اتصور في يوم كامل مليء بالتفاصيل، خاصة لأنه مؤتمر يحوز اهتماما عالميا.

 

 

 

 

صورت جنب الأهرامات ولبست زيًا "نوبيًا" مناسبًا لبشرتي السمراء مع الملامح المبهجة المعروفة عن أبناء النيل، بعدها بأيام اكتشفت أن الإعلان نزل واللي نبهني ليه زميل في الچيم، فرحت جدا مع أن كل شاب بيظهر في الفيديو لقطة واحدة بس، لكن كفاية إنه عمل عظيم وانتشاره مش مجرد في أماكن محدودة بالعكس ده في الطرق والمحافظات وعلى القطارات والاتوبيسات.. فرحت جدًا لما اكتشفت كل ده من صور التقطها أصدقائي في محافظات كتير للإعلان ده اللي انتشر على الطرق بشكل أكبر من مواقع التواصل الاجتماعي.

إعلان منتدى شباب العالم مش بس نقلة عملاقة في أعمالي، ده كمان فخر إني بمثل جيلي والشباب من عمري في مؤتمر شبابي عالمي يشرف بوجود رئيس الجمهورية وقامات من كل دول العالم.

 

 

في النهاية.. بحلم بالتعمق في المجالين سواء عارض الأزياء أو كمال الأجسام.. ومتأكد من مقدرتي على الموازنة والتفوق.. لأني بعمل أكتر حاجة بحبها فعلاً ومعاها دعم والدتي وأختي وخطيبتي وأصدقائي.. هستمر ومتأكد من وصولي قريب للمستقبل اللي بحلم به.