غادة عبد الرازق: "ما عنديش استقرار نفسي ولا عاطفي ودمرت ناس حواليا"
سلمي السلنتي
كشفت الفنانة غادة عبد الرازق عن عدم استقرارها النفسي خلال لقاء في برنامج "كلمة أخيرة" الذي تقدمه الإعلامية لميس الحديدي، وقالت: "ما عنديش استقرار نفسي ولا عاطفي انا ست بتتعامل علي انها مريضه من 35 سنة".
ربما يعجبك
وتابعت غادة: "احنا بندخل التمثيل وبنبقي عايزين حاجات كتيرة جداً من أول ما بتمثل رغبتنا هي النجاح والشهرة والماديات، كل دول احنا بنوصلهم عن طريق واحد، وقصاد ده أخد مني أنا حاجات كتيرة جداً، وبشوف ناس تانيين عندهم حاجات تانيه وبحسدهم على الاستقرار والزواج والأطفال وكل حاجة."
وأكملت حديثها قائلة: "ساعات كتير بحس إن ده كان سبب إني دمرت ناس تانية حواليا، منهم بنتي لأن في يوم من الأيام بنتي دي كان عندها استقرار في بيتها، ثم انفصلت لأنها كانت متزوجة فى يوم وممكن جداً ومحتمل أكون أنا السبب وقصرت في هذا الجانب."
مما جعل الاعلامية لميس الحديدي لمقاطعتها قائلة: "لية بتحملي نفسك المسؤولية دي كلها"، فردت غادة: "كل راع مسؤول عن رعيته وروتانا بنتي تحت بند أنا الراعي بتاعها لأنها من طفولتها هي مش مستقلة ومرتبطة بيا، حتى لم يكن لديها بيت مع زوجها السابق وأنا بحترمه وبقدره جدا لأنه هو السند الحقيقي لينا، لكن أنا ممكن أكون السبب إنى بوظتلها حياتها".
ثم تابعت: "ممكن تكون دي الحقيقة الحلال والحرام بين، مش لازم ندخل الأمور في بعضها، أصعب حاجة إننا نضلل أنفسنا وبنقول كلام مش حقيقي زي ليه بتلوم نفسك، لأن أكيد الإنسان عمل حاجة غلط فلازم صارح نفسه".
وفي سياق ذات صلة، قالت الفنانة غادة عبد الرازق عن تعدد زيجاتها: "كل اختياراتي في الرجالة كانت غلط وعمري ما اخترت راجل صح، بعيدا عن والد روتانا أما بقية الاختيارات فهي لم تكن صحيحة بعض منهم منحني ماديات والبعض الآخر حفلات والآخرين حب وحاجات كتيرة جداً لكني لم أعتمد عليهم بشكل كامل".
يذكر أن مسلسل "صيد العقارب" تم عرضه في السباق الرمضاني لعام 2024، من بطولة الفنانة غادة عبدالرازق، محمد علاء، رياض الخولي، سيمون، أحمد ماهر، ميار الغيطي، مي القاضي، أحمد الشامي، عزوز عادل، ريم المصري، عفاف رشاد.
جوجل نيوز
