لو عندك دم .. استقيل!

بقلم : ياسر صادق

وزير التربية و التعليم الدكتور محمود ابو النصر اذا كان عندك دم استقيل !..في اوروبا و امريكا واليابان و الصين عندما يخطئ الوزير يبادر بالاستقالة علي الفور و بدون اي ضغوط.. لكن عندنا الوزير ماسك في المنصب بيده و اسنانه " و لازق في الكرسي بغرة " .. كل يوم منذ ان توليت المسئولية في شهر يوليه من العام الماضي و المصائب نازلة " ترف " ..يعني اكثر من 25 طالب ماتوا بسبب الاهمال منهم من وقع زجاج المدرسة  عليه و اخر سيارة الاغذية " دهسته " و ثالث بوابة المدرسة وقعت عليه..الخ لو كان عندك دم كنت قدمت استقالتك..حتي المدارس التي تم ترميمها عام 2012 بها مشاكل كثيرة و لو مش مصدق اذهب و اسأل يا دكتور ماذا يحدث في محافظة المنوفية .. غير حالات الاصابات و التسمم من الواجبات الغذائية الفاسدة مثلما حدث مع 9 طلاب في مركز الغنايم بمحافظة اسيوط ..و لا فضيحة اختيار 30 الف معلم من بين 600 الف تقدموا للمسابقة والتي سيطر عليها الوساطة و المجاملات و لا توجد اي معايير و اذا وجدت فهي علي الورق فقط لا يتم تطبيقها لدرجة ان حملة الماجستير لا يوجد مكان لهم ..و الفضيحة ان الكهرباء تم قطعها خلال اجراء احتبار الكومبيوتر للمتسابقين و قبل ان ينتهوا من الامتحان و بدلا من ان تبادر وزارة التربية و التعليم باعادة الاختبار عملت ودن من طين و اخري من عجين و " طز " في كل الذين انقطعت الكهرباء عليهم و هم يؤدون الامتحان .. و بعدين ايه حكاية مجدي امين وكيل الوزارة الذي يعمل  باربع مناصب في وقت واحد مدير المركز القومي للامتحانات و مدير اكاديمية المعلمين و عضو لجنة الترقيات و عضو مجلس ادارة فروع الوزارة..و ايضا تعيين شخص اخر يدعي محمد سعد اخصائي اجتماعي في منصب مدير عام التعليم الثانوي ثم رئيس الادارة المركزية للتعليم الثانوي ثم رئيس عام امتحانات مصر و يقال انه رسب بالثانوية العامة !.. الغريب ان الافندي انتفض عندما نزل خبر بالمواقع الالكترونية اعتزامه تقديم الاستقالة وسارع لنفي الخبر و قال ان الجندي لا يهرب من المعركة .. لكن لما يكون الجندي " خيبان "  زي حالاتك بيتم احالته للاستيداع ..لما يكون الجندي هيخسر المعركة و الحرب يبقي لازم يتم استبعاده و الحقيقة العيب مش عليك العيب علي الذي اختارك و هو رئيس الوزراء السابق حازم الببلاوي و علي الذي ابقي عليك و هو ابراهيم محلب .. يعني انا مش عارف ما هي علاقة واحد خريج كلية هندسة و استاذ في جامعة عين شمس ان يأتي وزيرا للتربية و التعليم و لا هو تم اختياره علشان عمل شو اعلامي عندما قدم استقالته من رئاسة قطاع التعليم الفني لوجود اخوان في الوزارة ..و الحكاية ليست درجات علمية حصل عليها الوزير و حتي لو هذا مهم فان الاهم هو ان يكون ممارس للمهنة و ان يكون جاء من قاع المجال و يعرف دهاليزه و اسراره و من الاخر " اتمرمط فيه " مش قاعد في التكييف و يدير الوزارة من خلال تقارير كله تمام يا فندم!.. و بعدين الافندي بيقول ان المناهج هيتم تغييرها في 2017 هو انت هتقعد حتي هذا التاريخ  واضح انك عايز تقضي علي البقية الباقية .. و الاغرب ان تجد اعلامي  و كاتب صحفي مثل ابراهيم حجازي بيدافع عن ابو النصر طيب ليه يا عم ابراهيم ؟! وبتقول عليه وزير ناجح طيب قول لي امارة..و لا هو زي حسن حمدي الذي مؤسسة الاهرام بأكملها بتهاجمه و انت الوحيد الذي تدافع عنه علشان من " شلة " واحدة ! ..المشكلة ان ثقافة الاستقالة أو الاعتذار لا يعرفها المسئولين عندنا ..طيب هو يستقيل ليه .. هو هيلاقي احسن من كده فين دكتور علي درجة وزير و شو اعلامي و سفريات يمين و شمال في اكبر الدول و حاشية و منافقين حوليه بيطبلوا له يبقي يستقيل ليه..تقريبا احنا اللي معندناش دم !