من مدة وأنا بركن عربيتي في جراج… بس من كام يوم كده و لظروف ما ركنت حوالي الساعة الثامنه مساءا تحت بيتي بالظبط…. صحيت تاني يوم نزلت حوالي الساعة اتنين الظهر مكان ما كنت راكنه العربية ... فين العربية ؟؟ مفيش عربية... تخيلت ان اخويا بما ان معه مفتاح للعربية جه اخدها لسبب ما ...اتصلت بيه و سالته "انت خدت العربية" ؟؟ كانت الاجابة لا…. قفلت معاه و كلمته تاني و سالته نفس السؤال بنفس الطريقه و كانت الاجابه لا بردو ... قفلت و كلمته تالت و سالت نفس السؤال رد عليا "هو في ايه الشريط سف؟؟؟ قلتله لا العربية اتسرقت "دخلت للمحل الي انا راكنه قدامه و قلتله "انا عربيتي كانت راكنه قدام المحل و مش لقياها" قالي "انا شفت حضرتك و انتي بتركني بس و انا بقفل الساعه 12 مكنش في عربيات قدام المحل"… خرجت من المحل و ببص لقيت ازاز مكسور علي الارض…و بذكائى المعهود استنتجت ان العربية اتسرقت قبل الساعه 12 بليل ...و المحلات فاتحه ...علما اني ساكنه علي الترام يعني منطقه فيها حركه كتير… كلمت اخواتي و جوزي و قبلوني في القسم وبدأت الرحلة…. طلعت للظابط .. عرفته بنفسي و قلتله عربيتي اتسرقت .. كان ذوق و مهذب جدا .. خد مني كلمتين وبعدين بعتني لامين الشرطه يعملى محضر سرقه… و محدش يسالني الكلمتين الي اخدهم مني عمل بيهم ايه…
امين الشرطه قبل ما يعملي المحضر قالي "متخفيش حتلقيها "رديت عليه بفرحه و قلتله" بجد و الله" قالي "اه متخافيش حيكلموكي" سالته ببلاهه" هما مين" قالي "الي سرقوها "قلتله و "بتقولي متخافيش "قالي" يا مدام عادي حيخدوا قرشين و يسلموكي العربية" قلتله "و النبي جد "!!!" طمنتني "
خدت الاخطار و رحت علي مدرية الامن قسم سرقة السيارات .. عملولي محضر فقد و نزلوا رقم السيارة علي الكمبيوتر للبحث.. و اداني ورقه اروح بيها المرور ارفع الملف بتاع العربية علشان ميعرفوش يبيعوها…
قبل ما امشي دخلت انا و جوزي للظابط النباطشي , شاب محترم رحب بينا و قالي ان الحرمي حيكلمني و يطلب فلوس و قالي انه حيكون عربي من البدو يعني و نصحني اني اتفواض معاه… لو طلب تسليم العربيه قبل الكيلو 21 حينزل معايا بنفسه بس لو بعد الكيلو 21 معايا ربنا… و سالني هي العربية فيها حاجه مهمه قلتله "لا ابدا الرخصه بس .. ااااااه فيها فرشة الشعر بتاعتي " جوزي راح زغرلي و الظابط بصلي باستغراب و اعتبرها نكته… .عجايب !!! نهايته
رحت تاني يوم رفعت الملف و قعدت انتظر الحرامي يكلمني… رن التليفون رد عليا واحد عرفت من لهجته ان من العرب قالي" انتي فلانه" قلتله" ايوه" قالي" انت ضايع منك عربية كذا" قلتله "ايوه" قالي" عربيتك عندي" قلتله "اامر" قالي "هاتي 25 الف جنيه و اسلمك العربية" قلتله "مش كتير شويه طيب خد اخويا معاك"
اخويا كلمه و قاله طلاباتك… قاله" تجيب 25 الف تاخد العربية" قاله "كتير يا عم 25 متبحبحها شويه" زغدت اخويا و قلتله 25 ..25 العربيه كان فيها فرشه الشعر بتاعتي…" . اخويا بصلي بشماناط و كمل كلامه رد الحرامي "و الله ما ينفع يا باشا… " اخويا قاله "معلش هزها بس شويه" الحرامي "و غلاوتك يا باشا ما ينفع ".. قاله "يا عم صاحبي الاسبوع الي فات دافع 15 بس هي العربية تبها كده" الحرامي" الاسبوع الي فات يا باشا اديك شايف الدنيا بتغلي ازي"… من هنا لهنا الحرامي ربنا يكرمه نزل 4 الاف جنيه و قال لاخويا بين السارق و المسروق يفتح الله… . اخويا قاله" خلاص اديني يومين ادبر المبلغ" الحرامي "لا هو يوم واحد المخزن الي راكن فيه بياخد الف جنيه في اليوم"…
بعد ما قفل سالت اخويا اتفقتوا علي ايه حكالي الي حصل قلتله "طيب ربنا معاك و متنساش تساله علي الفرشه "بصلي من فوق لتحت مش عارفه ليه .. و عدي اليوم تليفونات رايحه جايه ما بين الحرامي و اخويا بيتفقوا علي المكان و الزمان و كيفيه التسليم و الاستلام.... راح اخويا و معاه اتنين قعدوهم في بيت في سيدي كرير و عمللهم شاي... دفع اخويا الفلوس و رجع بالعربية و الحرامي اطمن عليه انه وصل بالسلامه ...ناس ذوق ذوق ذوق حقيقه لو اني واخده علي خاطري منهم يعني بعد التليفونات الي رايحه و جايه دي خلاص مفروض ان احنا عشره كان مفروض يعملولنا خصم و يرجعوا الفرشه… بس الحرامي وعده المره الجايه لينا وضع تاني و حيعمل احلي واجب معانا… . تاني يوم اخدتها كعب داير من المدرية للقسم للمدرية للمرور علشان اعمل محضر عثور و كف بحث…
الحرامي خد عربيتي و هو باشا… رحنا لحد عنده ادناله الفلوس و هو باشا…. و الفلوس اتوزعت علي اصحاب النصيب و هو باشا....و زمان مراته بتسبسب شعرها بالفرشه بتاعتي.. و انا اخدتها كعب داير علشان متمسكش بعربيتي الي انا مبلغه انها اتسرقت هي و الفرشه....
اللطيف في الموضوع انهم في القسم و انا بعمل المحضر امين الشرطه كتب ان"تم العثور علي العربية في محيط القسم"" قلتله "عندك !!!! انت كاتب كده ليه " قالي "و حتستفيدي ايه لو كتبت الي حصل" قلتله "اكتب الي انا حقوله متكتبش الي علي مزاجك "طبعا اخد اقوالي علي مضد بعد اصرار مني .. و بجملت البجاحه طلب مني الحلاوه ده علي اساس انه لقاها في محيط القسم واني مدفعتش دم قلبي و انهم جابولي الفرشه… اديته الي فيه النصيب و كمان معجبهوش فعلا الي اختشوا ماتوا .... بعد 3 ايام من القلق و الخوف و التعب قاعده مع بنتي بتسالني "ماما العروسه بتاعتي فين" قلتلها" معرفش دوري عليها ....اخدت التليفون بتاعها و عملت نفسها بتتكلم في التليفون و لقيتها بتقول" الو لو سمحت حضرتك الحرامي, انت اخدت العروسه بتاعتي" و راحت بصالي و قالتلي "ماما الحرامي عايز 10 الاف جنيه علشان يرجعلي العروسه" مبقتش عارفه اضحك و لا اعيط… .
و الله مش زعلانه علي الفلوس الي اندفعت بدون وجه حق ...و لا زعلانه اني عربيتي اتسرقت و الله اعلم اتعمل بيها
ايه !!!???و لا زعلانه انها اتبهدلت و محتاجه فلوس كتير علشان تتصلح… .انا زعلانه علي الحال الي وصلنا له وو قلبي بيتقطع علي الفرشه بتاعتي … التجربه دي حسستني بعدم الامان.... بقي عندي حاله من الرعب و مش عايزه انزل من البيت خايفه علي بنتي و خايفه علي ابويا و امي و كل حبايبي… قدر الله و ما شاء فعل و الحمد لله ابتلاء بسيط بس اكتر حاجه حزه في نفسي الفرشه الي اخدوها من العربيه اصلي كنت بحبها اوي اللهي يا رب الي يسرح بيها يتقرع
الدروس المستفاده:
اولا: ابقي سيب نمره تليفونك في العربية متدوخش الي حيسرق علي نمرتك مهماش فضينلك
ثانيا : متتعبش نفسك بتفاصيل مش مهمه في المحضر علشان اغلب الظن انت الي حتروح تجيب عربيتك بنفسك
ثالثا: ابقي احتفظ بنمره الحرامي علشان لو احتجتها تاني او حد من اصحابك احتجلها
اخيرا و ليس اخرا متنساش حاجه مهمه في عربيتك زى لاب توب تليفون او فرشة شعر مثلا ربنا يسلمكم من كل شر ..
و دخل الحرامى و انا صاحيه شوف ذوقه و ادبه
جوجل نيوز
