فرمة الساحل

بقلم : زيزي عاصي

و زي ما بيقولوا العيد فرحه و كده ، و بما ان احنا لو قضينا العيد في اسكندرية 

حنقضيه في البيت او من بيت لبيت ، و نرجع من اي مشوار مفرهدين و مش طايقين روحنا .. جوزي حبيبي قرر يوم الوقفه ان احنا نروح نقضي العيد _ زي عليه القوم _ في الساحل في بيت اهله .. و نظرا لطول لساني و شكوتي انا و بنتي ان هو مش بيفسحنا فمقدرتش اعترض .. 

و انا اقل من ذلك ، و في عجاله من امري قمت زي الشاطره حضرت الي حنخده معانا و انا مش عارفه انا حضرت ايه ... كل ما اساله اخد كذا معايا يرد " كل حاجه هناك ، و لو في حاجه ناقصه احنا مش رايحين صحرا نبقي نشتري" ..

علشان الوقت كان ضيق جدا بقيت احط الي له لازمه و الي ملهوش في الشنط !!! اه و الله الشنط ، علي 

قضيت الليل كله احضر الحاجات الي حنخدها معانا ، و اوضب بيتي و اقفله لحد صلاه العيد .. رحنا صلينا و هو روح و انا و بنتي لفينا لفه العيد علي اهلي و قرايبي .. و انا في الطريق للبيت وقفت عند السوبر ماركت اشتريت شويه حاجات و روحت صحيته _ كان نايم طبعا _ فطرنا و احنا نازلين لقيته جايب شويه هدوم في ايده و قالي "حطيلي دول في اي شنطه .. ايه كل الي انتي جايباه ده !!! دول كلهم تلات ايام" ..

مش حطول عليكم نزلنا و اول ما ركبنا العربيه بنتي نامت .. لسه بعدل قعدتي و حغمض عيني راح باصصلي باستغراب اوي و قالي " ايه ده انتي حتنامي و لا ايه !!! وانا حقعد اكلم نفسي طول السكه" ..بصتله و قلتله " لا يا حبيبي و دي تيجي انام ده ايه معقول اسيبك تكلم نفسك طول السكه انا صاحيه اهو ".. قعد السكه كلها منطقش غير كلمه واحد بيقولها كل ما يحس اني عيني بتغمض " انتي حتنامي !!! " 

وصلنا بسلامه الله فتحنا الفيلا و عينك متشوف الا النور .. بصتله و قلتله "هو اخر مره حد جه هنا كان امتي؟؟" ..

رد "حوالي من تلات سنين ".. 

الفيلا مش باين لها ملامح من التراب .. قلتله "طيب متشفلنا حد ينضفهلنا ".. 

قالي " ماهو احنننننا مش حنننننضفها كلها احننننننا حنننننضف فوق بس اي حاجه كده يعني علشان نعرف نقعد فيها " ..

 

" بس شهلي علشان نلحق نطلع علي البحيره البنت تنزل الميه"

 

حرف النون طار في ثانيه و نوها بقت نيها

 

طلعنا فوق حطيت الشنط و استعنت علي الشقه بالله .. بعد زن بنتي ساعه انها عايزه تروح تنزل الميه و بعد الحاح مني علي جوزي و محاولات منه لتوقيف المراكب السايره و محاولاته المضنيه انه يقفلها في وشي و يسد كل ببان الامل انه ياخدها هو و يروح البحيره _ و هي بردو سندت معايا _ انتصرنا في الاخر و نزلوا راحو..

 

قعدت انضف م الساعه2 للساعه7 و كل ده في الوضه الي حنام فيها و الليفنج و الحمامات و المطبخ و البلاكونه .. وعلشان تكمل المايه قطعت معرفتش حتي اغسل ايدي من التراب مفيش و لا نقطة مايه.. قعدنا نستني المايه علشان يستحموا و انا كمان انزل الترب الي عليا ... اخيرا بعد ساعه جت المايه و حميت بنتي و لسه بقول يا هادي و حدخل اخد دش لاقيتهم بيقولولي " ايه ده انتي حتستحمي احنا جعانين نروح ناكل و لما نرجع ابقي استحمي" ..

 

نزلنا ناكل و من كتر التعب مكنش ليا نفس و كنت بنام علي ترابيزه الاكل .. روحنا بعد ما اخدنا بنتي تلعب في جنينه الاطفال شويه ...

 

اخدت دش و قعدت مع جوزي في البلاكونه و صحيت علي صوت جوزي بيقولي " قومي نامي بدل ما انت نايمه علي الكرسي"... قال و انا الي كنت فاكره نفسي بتساير معاه .. فعلا دخلت نمت بهدومي استعدادا للصحيان بدري اوضب باقي الاوض علشان اخويا جي الصبح هو و عائلته .. 

 

قمت 6 الصبح نضفت باقي الاوض و حضرت الفطار قاموا فطروا و قعدنا في انتظار اخويا .. يا دوب جم و حطوا شنطهم و ابتدي زن الولاد انهم عايزين ينزلوا المايه… خدناهم و طلعنا علي البحيره .. جوزي و اخويا نزلوا الميه مع الاولاد و انا و مرات اخويا قعدنا نحرس الحاجه في نقحة الشمس ..مقلكمش علي التان الي اخدناه ..

 

تاني يوم بنتي قالتلي "مامي عايزه اركب الاكوا " ... في الاول مكنتش عارفه ايه دي بس طلعت زحاليق المايه و طبعا علشان هي صغيره ، و انا موسوسه مكنش ينفع تركب لوحدها ، و جوزي رفض رفض باااااات انه يروح معاها ..

 

طبعا انا الي رحت ... حقيقه هي ممتعه جدا بس كانت عايزاني من 10 سنين .. السلالم كتير اوي اوي و علي مدار ساعه و نص مخدتش نفسي كل ما نتزحلق عايزه تطلع تاني .. ناهيكم اني اخدت خبطه في كوعي لحد دلوقتي بتوجعني ..علي كام طفل نزلوا فوق راسي من الزحليقه ، كانوا حيكسرولي رقبتي ، علي كام خناقه علي الدور في الطابور ..طبعا روحت مش نافعه في حاجه خااااااالص… 

 

الرجاله جابت الاكل و اكلنا و طبعا نزلنا جنينه الاطفال و بردوا صحيت علي صوت جوزي بيقولي " قومي نامي علي السرير" قال و انا الي كنت فاكره ان احنا عاملين حفله سمر و بنلعب افلام ..

 

نمت و انا حالفه ايمانات مغلظه اني مش حروح البحيره بكره و حصحا علي مهلي اوضب البيت و الم حاجتنا و اطلع علي بيتي ..

 

بس علي مين .. صحيت 6 الصبح تاني نضفت البيت تاني ووضبت الشنط و فطرت الولاد و اخدتهم و انا اقل من ذلك للبحيره .. رجعت الاولاد استحموا و قفلت البيت و مكنتش مصدقه اني راجعه بيتي اخيرا… الواحد كان زمان لما يروح الساحل كان اهم حاجه يلبس و يتمكيچ و هو خارج بليل يتعشا و يتمشا .. الحاجه الوحيده الي استخدمتها من مستحضرات التجميل كانت الشامبو … و التمشيه في حالتي كانت عايزه كرسي بعجل علشان اتكسحت ..

 

كل الناس شافت فورمت الساحل انا الوحيده الي شفت فرمة الساحل… انا الي زي تاخد عشه في راس البر شاليه في جمصه شقه في بلطيم ..لاكن سااااااااحل تاني نوووووووووووو