تعالوا نعمل من الفسيخ شربات

بقلم : زيزي عاصي

كنت زمان بسمع  الناس تقول الست ديه شاطره دى تعمل من

 

الفسيخ شربات  .... او فلان ده جدع ده يعمل من الفسيخ شربات ....اقول ايه العك ده هو فى حد  يعمل من الفسيخ شربات ....و ايه الشطاره فى كده ....و قلت طيب ما اجرب و احاول يمكن يطلع حلو و ابقى شاطره انا كمان ....قعد اتفحص و اتمحص و جبت كتب طبيخ اد كده ....ملقتش لا وصفه عن طريقه عمل شربات الفسيخ

....

قلت يمكن القيها على جوجل بما انى بجوجل كل شئ دلوقتى ...كتبت كيفيه عمل شربات  الفسيخ ....طلعت نتائج البحث " مثل شعبى خيالى " " معتقدات باليه " "مريض  بمستشفى المعموره يحاول يعمل من الفسيخ شربات " عائله باكملها   تنقل الى مستشفى قصر النيل اثر  احتسائهم مشروب و رجال البحث الجناتى و الطب الشرعى يؤكدون  ان هذا المشروب ذو رائحه  كريهه تشبه الفسيخ"و اخيرا " مين المجنون الى عايزه وصفه عمل شربات  الفسيخ " قفلت النت و قلت اجرب كده قناه فتافيت .. برضو مفيش فايده

 

قلت فى عقل بالى هو يعنى اختراع نضرب الفسيخ فى الخلاط على ضعف الكميه سكر و شويه لمون علشان الزفاره يبقى شربات فسيخ و ابقى عملت من الفسيخ شربات

 

 نزلت السوق و جبت كيلو فسيخ و 2 كيلو سكر و مكسبات طعم و لون و لبست البلطو الابيض و الجونتى و الكمامه و دخلت المعمل – قصدى المطبخ  - علشان لما يجى جوزى افجأه بموضوع شربات الفسيخ ده يمكن يقول عليه شاطره

 

قعدت انضف فى الفسيخ و بعدين حطيته فى الخلاط على شويه سكر و ليمون اخذ الموضوع ده منى من 3 الى 4 ساعات ... رجع جوزى من الشغل و انا كلى حماس انى اثبتله انى ست شاطره و ممكن اعمل من الفسيخ شربات

 

دخل جوزى و قالى : حضرى الغذاء انا واقع من الجوع .... 

يا نهار ابيض ده انا ملحقتش اعمل اكل ...

رديت وانا مبتسمه ابتسامه بلهاء: "اصل يا حبيبى ملحقتش اعمل اكل النهارده " 

رد بعصبيه " : ايه ... و ملحقتيش تعملى اكل ليه بقى ان شاء الله بتعملى ايه طول النهار " 

رديت بحماس : "اصلى محضرالك مفاجأه "  

قلى : "طيب اقليلى بيضتين لحسن حموت من الجوع " رديت " حاضر من عنيه " 

اكلنا و بعد الاكل حطيت له الشربات و قلتله : "يله دوق وقلى رأيك " 

قلى : "ايه ده و مال ريحته عمله كده ليه " 

قلتله دوق بس و شوف شطارة مراتك حتدعيلى " 

شرب جوزى بق من الكبايه و لقيته بيدعى و يقول حسبى الله و نعم الوكيل ايه القرف ده هى ديه المفاجأه

 

قمت فى عصبيه و قلتله " اهو انتم كده يا رجاله لو الواحده ادت لكم صوبعها شمع بردو ميعجبكمش العجب ده انا قعدت طول اليوم احاول اعملك من الفسيخ شربات و برضه مش عجبك " 

بص فى الكوبايه الى معاه و قال بصوت خافت و هو بيبلع ريقه بصعوبه : "هو ده شربات فسيخ " 

قلتله "ايوه ، كل الناس بتقول على الى بيعملوا من الفسيخ شربات ناس شاطره و جدعه و انت مستخسر فيه كلمه حلوه"

 

رد و قالى "ديه كنايه يا متعلمه يا بتاعه المدارس " 

و قام الراجل يضرب كف بكف و يقول لا حول و لا قوه الا بالله و قعد يجى ساعه يبرطم و يحسبن

 

استغربت جدا بس استوقفنى كلمه كنايه .....انا سمعت الكلمه دى قبل كده فين اااااااااااااااااااااااااااه اناسمعتها فى اولى ثانوى فى حصه الجغرفيا لا لا فى حصه الاحياء مش الكنايه ده الى جنب الكبد ؟؟...هو جوجل مفيش غيره

 

اتصورو مطلعتش جنب الكبد و لا حاجه ...كنايه يعنى انك تقول شئ تقصد بيه معنى  تاني و لقيت ان معنى المقوله ديه انك تعمل من الحاجه الوحشه حاجه كويسه ....قعدت افكر شويه لقيت ان فى حياتى عملت كتير من الفسيخ شربات

 

لما عرفت انى حامل بعد طول انتظار كنت حتججن من الفرحه و قعدت طول فتره الحمل احلم بمولودى و اختارله اسم   ...

اسامى بنات و اسامى اولاد و لما عرفت انه بنت كنت مبسوطه و بعد مناقشات و محاورات مع جوزى ريسينا على اسم رقيه ، و قلنا اسم جميل و دلعه كتيير و كمان على اسم بنت الرسول صلى الله عليه و سلم ...بس حقيقه جوزى حبيبى فاجئنى و سماها على اسم والدته "ساميه" وقع عليا الخبر كالصاعقة ...

بس انا عايزه اسمى بنتى اسم على الموضه و اسم ساميه ده قديم و مش موضه ...قعدت اعيط و اولول كل ما امسك شهاده الميلاد ...بقى بنتى الى كنت بتمناها من الدنيا فى الاخر يبقى اسمها ساميه ... و حقيقه الاصدقاء و الاقارب الا قليل منهم سودوا الدنيا فى وشى ...تخيلوا كده كل ما حد يجى علشان يباركلى او يكلمنى فى التليفون و يسالنى سمتيها ايه اقول ساميه و انفتح فى العياط و هاتك يا ولوله و لطم و يردوا عليا معلش متزعليش قوليلها اسم تانى دلعيها و قوليلها يا سوسو او يا سمسم ...و بدل ما اتلقى التهانى كنت بتلقى الاسف و المواساه ...لحد ما واحده من اعز اصدقائى قالتلى الله سااااااااااامية - و نطقته باللغه العربيه  - ده اسم جميل اوى و جديد و مش منتشر

 

قعدت افكر اه صحيح ده لما بيتنطق صح فعلا اسم جميل اوى و معناه كمان جميل .. و بقيت كل ما حد يسالنى بنتك اسمها ايه اقول سااااااميه و انا كلى فخر و منفوشه و لا الديك الرومى ...  الناس ترد الله ده اسم جميل اوى اول مره نسمعه جبتيه منين يا اروبه ...اقول فى سرى انا مجبتهوش ربنا الى بعتهولى ...و يقيت اعشق الاسم ده و لو جوزى نفسه حب يغيره انا مش حرضه

 

كان موقف بالنسبه لي كئيب و محزن بس بمد الالف اصبح جميل و مبهج يعنى بمد حرف واحد بقى الفسيخ شربات ...طب كان ليه النكد و الغم ؟؟؟؟ مكنتش مستهله

 

كلنا بنمر بظروف كئيبه و كلنا فى حاله حزن على الى البلد فيه موقف "فسيخ"فقررت انى اكتب الى احسه بطريقه ساخره و مضحكه ..اضحك و اضحك الناس و نخرج من جو الكأبه الى احنا فيه " شربات "

 

ما انا شاطره اهو و بعمل من الفسيخ شربات ..قررت انى احاول كل ما يقع فى ايدى فسيخ اعمله شربات ....وحتى لو معرفتش و ايه يعنى هو الفسيخ وحش ده حتى الكيلو بقى اغلى من كيلو اللحمه

 

ما تيجو نستغل الازمه الى احنا بنمر بيها و نحولها لحاجه مفيده ...ازاى ؟؟؟معرفش بس تعالو نحاول نحاول نحسن الوضع تعالو نحاول نشتغل اكتر و نتغير للاحسن تعالو  نعمل من الفسيخ شربات و اللهى الموضوع مش صعب و الوصفه سهله

 

مرفق بالمقال طريقه عمل من الفسيخ شربات

 

-          ثق بربك بلا حدود و اعلم انه اذا ابتلاك فانه يحبك و برضو حتفرج

 

-          ثم ضع كميه كبيره من الثقه فى نفسك و قدراتك لان ربنا جعل فى كل واحد فينا ما يميزه عن الاخرين كلنا فينا حاجات حلوه حتطلع فى الوقت المناسب

 

-          ثم اضف كميه كبيره من التفاؤل الحماس و يحلى الخليط بالامل و الاجابيه

 

وبالهنا و الشفى