25 رسالة من الرئيس السيسي للمصريين.. "السلع متوافرة وقادرون على تخطي الأزمة"

بعث الرئيس عبدالفتاح السيسي عددًا من الرسائل المهمة، خلال افتتاح المرحلة الثانية لمصنع سايلو فوودز للصناعات الغذائية بمدينة السادات في محافظة المنوفية اليوم.

وطمأن الرئيس السيسي، جمع المصريين، بتوافر السلع وقدرة البلاد على تخطي الأزمة الاقتصادية العالمية، وحرص الدولة على النهوض بالصناعة.

وجاءت الرسائل كالتالي:

1.    الدولة لديها استعداد تام للشراكة مع القطاع الخاص بكل مؤسسات وشركات القطاع العام، والاستعداد الكامل لجهاز الخدمة الوطنية للشراكة مع القطاع الخاص.

2.    "الأمر ده متاح علشان يصل لكل الناس واللي عنده استعداد يخش في شراكة مع الدولة.. منزلين شركتين تبع جهاز الخدمة الوطنية للأطروحات ومستعدين ننزل كل الشركات".

3.    "بنشجع المستثمرين لو عاوزين يعملوا مناطق لوجيستية في الموانئ الرئيسية والهيئة الاقتصادية لقناة السويس".

4.    "مستعدين علشان تبقى مصر في موقعها تقدر تستفيد إنها تكون منطقة لوجيستية في المنطقة والعالم كله.. ماشيين في ده".

5.    "كتير من النقاش اللي بيدور عن أوليات الدولة، إنه كان المفروض تتغير للصناعة بس، وده كلام صحيح".

6.    "الأمور كانت محتاجة جهد في كل المحاور، كان لابد أن نتحرك في كل المجالات في وقت واحد، حتى لو كان عوائدها مش هتبان دلوقتي".

7.    "لما يكون عندك فجوة 30 مليار دولار علشان توفرها بصناعات يبقى.. لازم تعمل شغل مش أقل من 100 مليار دولار.. وده زمنيا يحتاج من 5 إلى 7 سنوات".

8.    "مستعدين لتسهيل الإجراءات الاستثمارية أكتر ومنها الرخصة الذهبية أمام أي مستثمر محلي أو أجنبي"

9.    "لما اتكلمنا عن الوجبات المدرسية كان العدد المستهدف معين ولما اشتغلنا زدنا 2 مليون".

10.    "منظومة التغذية المدرسية مستقرة ومؤمنة.. ومفيش مشكلة في الكلام اللي كان قبل كده". 

11.    "بنحاول تكون عناصر التغذية مناسبة لسن الطلبة وعاوزين نحسن مش باكو بسكوت بس".

12.    "أطمئن الجميع بأن السلع موجودة وما فيش فيها مشكلة، والأزمة اللى مرت علينا خلال 4 شهور إن شاء الله ما تجيش تاني ونكمل طريقنا".

13.    "استمرار خطة الدولة فى توفير المخزون الاستراتيجي للسلع لمدة 6 أشهر، على الرغم من الظروف الاقتصادية الصعبة".

14.     "لازم إحنا كمواطنين لو لقيت المحل ده غالى ما تشتريش منه ونبقا إدناهم الدرس مع جهد الرقابة في التموين ووزارة الداخلية".

15.    "إذا كنا عاوزين نحقق توازن في أسعار المنتجات الغذائية لكل المواطنين محتاجين يكون عندنا عدد أكبر من الكمية المطروحة".

16.    "مستمرين على موقفنا بدعم المواطن، رغم الظروف الاقتصادية الصعبة اللي بتقابلنا".

17.    "المنتجات بتبقى طبقا لمواصفات ومعايير الصحة العالمية وهيئة سلامة الغذاء.. ولا يمكن إقرار أي شركة والتعاقد معها إلا إذا تم إقرارها من هيئة سلامة الغذاء".

18.    بنستورد 2.5 مليون طن زيت وده أكثر من 90% من احتياجاتنا وشغالين في خطة لزراعة 52 ألف فدان فول صويا والعام المقبل 500 ألف فدان".

19.    "متنسوش إن البلد خلال 40 سنة زادت بنسبة كبيرة جدا.. وكمان الدولة مقدرتش تعمل خطط وتنفذها تجابه بها هذا النمو الكبير".

20.    'ما يصحش ننسى وقفة الأشقاء العرب معانا وننساق وراء مواقع محرضة عاوزة تعمل فتنة بينا".

21.    "سياسة مصر تتسم بالاعتدال والتوازن والانضباط الشديد تجاه الجميع في الداخل والخارج".

22.    "بتابع مواقع التواصل وبشوف إنه ساعات حماس زيادة وتجاوز في الكلام عن موضوعات خاصة بعلاقتنا مع أشقائنا، وده لازم أمر ننتبه إليه كويس".

23.    "علاقتنا طيبة بالجميع وده منهج الدولة المصرية ماشيين بيه مش النهارده بس، ولكن من أول ما توليت المسؤولية".

24.    "إحنا دايما مفيش تصريحات سلبية تسيء لأشقائنا وما ننساش وقفتهم.. لو فيه تصريح هنقوله كدولة بشكل رسمي ولو ما قولناش يبقى الأمور ماشية طيبة".

25.    "لو كان فيه خلاف مع دولة شقيقة خلال السنين اللي فاتت كنت عارف إننا هنتجاوزه، حتى الأزمة مع إثيوبيا في سد النهضة بتلاحظوا إننا ما بنقولش كلمة واحدة تسيء".