دينا: تزوجت 9 مرات وهذا هو أكبر حب في حياتي

روت  الفنانة دينا مواقف محرجة تعرضت لها أثناء قيامها بالرقص، وسقوطها، قائلة: "بعض الوقعات بتبقى تلقائية وصدفة لكن بعض منها بيبقى مقصود فذات مرة زمان واحدة كعبلتني عن قصد ورجعلتها قلتلها ليه؟ هتستفيدي إيه؟  قالت بهزر".

وروت دينا مواقف أخرى خلال لقاء عبر برنامج "كلمة أخيرة" الذي تقدمه الإعلامية لميس الحديدي على قناة "ON": "مرة اتكعبلت في سلك فيديو وطرت وأنا بطبعي بقع وبقوم حتى لو موجوعة من شدة إحراجي لاني بتكسف اوي من السقوط لازم أقوم واكمل الفقرة، المهم لما اقع وأنا برقص اقوم عشان لازم أقف وأكمل وبعد انتهاء الفقرة كنت ببدأ أكتشف الآلام وتورمات وكدمات وأصعب الإصابات كنت عندما انزلقت، وأصبت بتمزق أربطة القدم وكنت بحط مسكن وبكمل لأن فيه ناس بتبقى منتظراني في ليلة العمر هتعب ساعة بس ما ضيعش فرحة يوم العمر لأي بني آدم".

وأكملت: "أنا بعشق الرقص وهو أكبر حب في حياتي لكن لا يفوق حبي لابني علي، ورغم كل المسيرة دي بس لسه بخاف من مواجهة الجمهور وبعمله حساب وببقى قلقانة لسه وأنا بطلع المسرح قبل ما أشتري أي فستان وعاوزه أعرف رأي الناس والرقص هو حياتي وبستمتع طول الوقت بالرقص وعشان كده بدرب رقص دلوقتي عشان أفضل أرقص لما  تغيب الأضواء".

عن نظامها الغذائي وسر رشاقتها ولياقتها، قالت: "بقالي ثلاثة أو أربعة أيام بجرب نظام جديد، وهي أني أوقف كل العيش والألبان والفراخ والبيض وأكل بس سمك ولحمة وعيش الردة ومربة وشوكولاته وأيس كريم بس مش باكل التورت ولا الجاتوه وباكل الجبن المطبوخة لكن الرومي منعناها".

وقالت الفنانة دينا إنها لم تفكر يوما في إمكانية توقفها عن الرقص حتى تحت ضغط المجتمع قائلة: "طول الوقت وأنا قافلة على نفسي بالونة وبعمل الفن اللي بحبه وبحاول طول الوقت ترسيخ صورة أخرى في المجتمع عن فكرة الرقاصة المنحلة، وأن ثمة فارقا بين كلمة رقاصة وراقصة حاولت أخلي كل اللي حواليا يحترموني عشان الناس يعيدون النظر في فكرة "الرقاصة"، وإنها عديمة الأخلاق وخطافة رجالة واللي عنده حلم وواثق من نفسه ومش بيعمل حاجة غلط هيوصل.. حتى لو المجتمع كله قالك إنت غلط".

ولفتت دينا إلى أنها تزوجت تسع مرات، قائلة: "مش كتير تسع مرات وفيه ناس تانية تزوجت 13 مرة مثل تحية كاريوكا وأقل جوازة لي مكثت سنة وأكثرها  كانت خمس سنوات وسامح الباجوري والد ابني توفي بعد مرور سنتين من زواجنا وغيبه عني الموت".  

وأشارت دينا إلى صعوبة مهنتها وأنه من الصعب أن تتنازل عنها من أجل زوج: "مهنتي صعبة وببدي المهنة على الحياة لأني لو تنازلت عن شيء بحبه عشان حد هطلب منه حاجات كتيرة مش هيبقى قادر عليها ولا هيعرف يعوضني عنها وساعتها لو تخليت عن الرقص مش هبقى أنا هبقى واحدة مكسورة فقدت شيء كأن حد أخده منه ابنه".

وكشفت عن أنها كانت تشترط على أزواجها شرطين، وهما عدم تركها للرقص وألا يخونها، قائلة: "أنا كنت بقولهم لن أترك الرقص وكنت بقوله لو فكرت تبص على حد غيري ما تعملش كده تعالى قولي وأنا همشي.. أنا اتخنت كتير بسبب طبيعة شغلي المستمر لساعات لحد 6 الصبح".

وواصلت: "كنت بعرف لوحدي أني بتخان لكني لا أواجه بمشي خاصة أن الزيجات مكنش فيها ولاد ولو كان فهي أولاد ممكن نديله فرصة، لكن طالما مافيش أولاد هتناقش ليه أمشي وخلاص".

وكشفت دينا عن أنها سريعة في اتخاذ القرارات ولا تندم، قائلة: "سريعة جدا في اتخاذ القرار ولا أندم لأن القرار يأتي بعد استحمال كبير جدا يؤدي لاستنزاف الطاقة فباخد القرار في الحال".

وأشارت دينا إلى أن أكثر الصفات التي لا يمكن أن تتحملها في رجل بعد الخيانة هي صفة "البخل"، قائلة: "مش بستحمل أشوف راجل بخيل"، وأكملت: "أنا ست بيت شاطرة وبوفر ومش بجيب طباخ ومش باكل من إيد حد غير من إيدي وأنا لوحدي وعلي مسافر للدراسة الجامعية في باريس".

وكشفت عن أن نجلها يدرس الطبخ في باريس، قائلة: "عاوز يبقى طباخ وأنا معجبة بالجيل الجديد أنه بيخترق مجالات مختلفة ومتطورة وفيها إبداع".

وكشفت عن أن شخصيتها تغيرت كثيرا ولم تعد عصبية مثل السابق، قائلة: "كنت زمان أتعصب وعروقي تبان وأتنطط دلوقتي بقيت هادية وبفكر في الحل لأني أمنت أن الموضوع ما يستحملش"، مؤكدة أن أصدقاءها من خارج الوسط: "أصحابي القريبين من بره الوسط، وفيه ناس مع بعض من ابتدائي والجامعة".

ولفتت دينا إلى أن أقرب أدوارها لقلبها هو "الطوفان"، لأنه دور مختلف، وأنها تحب التمثيل والرقص  بالمساواة، قائلة: "أنا بحب التمثيل والرقص زي بعض بس الرقص خدني من التمثل كتير وحاسة لحد دلوقتي أن جوايا طاقة فن نفسي حد يطلعها من جوايا".

وعن الرقاصات الروس، قالت: "أنا اللي جبت أوكسانا من روسيا.. والراقصات الأجانب لما نزلوا اشتغلوا بقيوا وحشين عشان جريوا ورا الزبون عايز إيه".