"حسيت بحزن ربنا ما يوريه لحد"..أحمد السعدني عن لحظة تلقيه خبر وفاة والده وطليقته

تحدث الفنان أحمد السعدني عن تلقيه خبر وفاة والده، ووفاة أم أولاده، وذلك في حواره مع الإعلامي الإماراتي أنس بوخش.

 

وقال أحمد السعدني: أنا في مسلسل اسمه زي الشمس كنت بمثل دور عمر وعندو بنت وولد ومراته توفت وبيقولهم في مشهد ان مامتهم ماتت، المشهد ده كان قبل وفاة أمل بحوالي ٣ شهور أنا حرفيا مثلت المشهد ده بعد المسلسل مع ولادي وأنا بقولهم إن مامتهم ماتت".

 

 

وتابع: "هما كانو معايا في الساحل على البحر وجالي الخبر قولتلهم إن واحد صاحبي مات ورجعت بالمايوة وحافي خدتهم في العربية، مكنش معايا فلوس لأني كنت بالمايوة وعاوز أحط بنزين دخلت لمدير المكان قولتله حصل كذه كذه وأنا معييش فلوس وتفهم الوضع وروحنا، بس فكرة انى أتحمل الخبر والصدمة وانى لازم أقول لولادي هي مسيؤليتي أنا ودي مش سهلة أبدا بس المواقف والحياة بتخليك تتحط في مواقف عمرك متخيلت إنك تتحط فيها".

 

 

وعبر أحمد السعدني عن مدى حزنه، وقال: "لما طليقتي اتوفت، حسيت بحزن كبير جدًا، وربنا ما يوريها لحد، حسيت في لحظة إني كبرت 10 و15 سنة، وكان هناك إحساس بالندم وتأنيب الضمير، لكني تغلبت عليه وعرفت أحلل الموضوع بعد الصدمة".

 

 

 

ووجه السعدني رسالة للشباب بشأن الزواج في عمر صغير، قائلًا: "منصحش حد يتجوز غير لما يمر بالمراحل دي ويتحقق في عمله قبل اتخاذ الخطوة. أنا مكنتش بشتغل وكنت باخد مصروف، وبعتبر نفسي كنت عيل صغير، لذلك أي أخطاء حصلت مكانتش مقصودة".

 

 

كما تحدث عن تلقيه خبر وفاة والده الفنان الراحل صلاح السعدني، وقال: "أسوأ حاجة في الدنيا، كنت في البيت وكنت نايم فجأة لقيت ترزيع على الباب برة فأنا قايم من النوم خلاص وعارف إن فيه مصيبة، وأغبى حاجة في الدنيا لما حد يصحيك ويقولك خبر وفاة، ده يعتبر أسوأ حاجة في الدنيا".

 

 

وأضاف أحمد السعدني: "أنا لما كنت صغير مكنتش فاهم أبويا أوي، أولاً راجل مثقف جدًا وجميل، وبيقول كلام مش فاهم منه حاجة، ولما ابتديت أكبر وأعدي الـ 13 ابتديت أفهم، طول عمري طبعًا بحبه بصفته أبويا، وابتديت أحب البني آدم ده أكتر كل ما بكبر وبفهمه أكتر، وأول ما قلت له عايز أمثل كانت أهم نصيحة صدق جدًا اللي أنت بتعمله، لو صدقته الناس هتصدقه".