دعم كبير من الرياضيين لأحمد يحيى بعد واقعة سب الجماهير
إيمان عادل
قدم الرياضيون الدعم لأحمد يحيى حارس مرمى فريق الاتحاد السكندري، بعد واقعة سباب الجماهير له أثناء مباراة سيراميكا كليوباترا والاتحاد السكندري في بطولة الدوري.
ربما يعجبك
قال شريف إكرامي حارس مرمى بيراميدز عبر موقع التواصل الاجتماعي تويتر: "أنت مش مسؤول يا يحيي، مش مسؤول عن الجهل والتخلف وانعدام الآدمية، مش مسؤول عن انعدام الإحساس والمشاعر، مش مسؤول عن السعار والهمجية بدل الرحمة والاحتواء والتقدير، أنت مش مسؤول عن حاجات كتير يا ابني، رحم الله أخاك ويرزقك الصبر والأجر والثبات".
وقال حسين الشحات لاعب النادي الأهلي: "البقاء لله يا حبيبي وحش يا أحمد ربنا معاك يا حبيبي ويكرمك في الجاي ويصبرك إن شاء الله، وده حال الدنيا ربنا يهدينا جميعنا إن شاء الله".
بينما قال مجدي عبد الغني رئيس رابطة اللاعبين المحترفين: "كل الدعم لأحمد يحيي حارس مرمي الاتحاد السكندري".
وقال أحمد عيد عبد الملك لاعب الزمالك السابق: "بعيد عن الفنيات أو الكرة عمومًا أحمد يحيى من أنضف وأنقى الشخصيات الي ممكن تتعامل معاه في الكرة أو برة الكرة ولسة من كام ساعة أخوه متوفى ولعب الماتش وفي الآخر لقي نفسه بيتشتم وخرج بالشكل ده الصراحة تصرف مش مقبول بأي شكل".
لم يقتصر الدعم على الرياضيين فقط، قدمت الفنانة لقاء الخميسي الدعم له قائلة: "الحقيقة إن الواحد ساكت بقاله سنين بس اللي حصل النهاردة لا يسكت عليه، الأخلاق راحت فين؟! الإنسانية راحت فين؟ ايه بجد اللي حصل للناس؟!
مشهد بائس ومخيف ولايمت للإنسانية بصلة".
وأضافت: "أحمد يحيى حارس مرمى الاتحاد السكندري حارس مرمى مثابر ومجتهد وإنسان خلوق وشاب في بدايات مستقبله، اتوفى أخوه من يومين ونزل الملعب ولعب ووقف وصد وعمل اللي عليه كله والأخطاء ماتخصوش وحتى لو تخصه ودا مش حاصل، ليه الإهانات ليه الشتيمة ليه التعدي بألفاظ خارجة ليه كل دا، يا عالم دي رياضة رياضة مش خناقة ما بين بلطجية، دى متعة مش تعنيف".
وأردفت: "ايه بقى امتى هاتفهم إن لاعب الكرة بني آدم بيؤدي شغله وبيحس وبيحلم وعنده أهل بيزعلوا أما بيتهان وهما يتهانوا معاه وعنده أم بتزعل وزوجة بتتجرح على جرحه، كفاية بقى كفاية تكرهوا الناس في عيشتهم وشغلهم اللي بيبذلوا فيه مجهود وبيحبوه".
وأتمت قائلة: "ماحدش ليه حق مطلق في الشتيمة والإهانة، أي حد بيشتم هل يقبل إنه يتشتم ويتهان، هل تقبل دا عليك وعلى أهل بيتك".
شهدت مباراة الاتحاد السكندري وسيراميكا كليوباترا، بعد مغادرة أحمد يحيى حارس مرمى زعيم الثغر المباراة أثناء سير اللقاء، بعد تقدم سيراميكا كليوباترا بخماسية نظيفة سباب جماهير الاتحاد الحاضرة للقاء، لحارس المرمى، لتحميله مسؤولية تلقي خماسية.
وأمام هجوم الجماهير خرج الحارس أحمد يحيى من الملعب، وهو يبكي رافضًا استكمال اللقاء، وذلك عند الدقيقة 80 من زمن المباراة، ورفض الحارس ضغوط الجهاز الفني لفريقه، ومحاولات مسؤولي الجهاز الفني لفريق سيراميكا لإثنائه عن قرار مغادرة المباراة.
وحاول أحمد ناجي مدرب حراس مرمى سيراميكا وعامر عامر حارس الأخير مواساة الحارس أحمد يحيى، وتهدئته أثناء خروجه من ملعب المباراة.
واضطر عماد النحاس المدير الفني لاستبدال الحارس أحمد يحيى، ودفع بدلاً منه بالحارس صبحي سليمان، ليستكمل الأخير المباراة.
جوجل نيوز
