سحر الكرسي!

بقلم : ياسر صادق

هو مش اي كرسي .. و مش اي احد يصل اليه .. لازم تخوض حروب و حروب علشان تقعد عليه.. و الحقيقة مش اي حروب .. و علشانه قامت حروب .. و دبرت مؤامرات و انقلابات و اغتيالات و قامت ثورات .. و هناك من ازاح اباه من اجل ان يجلس مكانه..و يكاد الجميع ان يتسابق في نفاق من يجلس عليه..و تقديم القرابين وكمان التطبيل.. و ماله ما هو مش اي كرسي.. فلا تندهش عندما تجد مرشح اسمه سامي عنان يدبر محاولة مفبركة لاغتيال نفسه من اجل كسب شعبية يضيع بها تاريخه في القوات المسلحة وعندما تفشل المحاولة يقرر الانسحاب ..اوان تجد مرشح اخر مثل حمدين صباحي فشل في ادارة جريدته "الكرامة" والذي لا يعمل بها اكثر من 50 واحد ثم تجده يريد الترشح للرئاسة..وبعدين هو انت فاهم علشان بتلف علي المقاهي و بتقعد مع الناس في الشارع و تأكل معاهم تبقي دي مؤهلات الرئيس.. ده يبقي نص الشعب يرشح نفسه! ..ايه هي خبراتك الاقتصادية و العسكرية و أيه هي رؤيتك للسياسة الخارجية والداخلية وكيف ستتعامل مع امريكا و اسرائيل و الغرب و ايضا العرب و ملف اثيوبيا ..ايه هو برنامجك وما هي الحلول التي ستقدمها لحل ازمات ومشاكل مصر المستعصية في البطالة و الزبالة و الكهرباء و رغيف العيش والمرور..الخ..والحكاية ليست كلام و تقديم برامج لكن المهم التنفيذ علي ارض الواقع..ومش معقول علشان عايز تبقي رئيس تغامر بشعب قوامه 90 مليون يدخل معاك في تجربة لا يعرف احد عواقبها و ان تكون مصر حقل تجارب لعبده مشتاق .. يا عم حمدين الكرسي اكبر منك وواسع عليك انت و عنان و حتي اللي غاوي شهرة المدعو خالد علي..الجميع علي استعداد ان يفعل اي شئ من اجل الوصول للكرسي..اما الشئ الغريب ان حمدين  يقول ان مشروع المليون وحدة سكنية والذي اعلنه السيسي دعاية انتخابيةّ!..يا عم حمدين بدل ما تقول كده ما تخرج علينا بطلعتك البهية و تقول انني نجحت في الاتفاق علي بناء مليون وحدة سكنية اخري و تبقي دعاية انتخابية ايضا لكن المستفيد هو الشباب والفقراء والراغبين في الزواج من بناء 2 مليون وحدة سكنية مليون منك و مليون من السيسي .. لكن ان تخرج علينا لتنتقد فقط يبقي انت لا تصلح لان تكون رئيس مركز شباب!ما تعمل زيه يا أخي!

و بالرغم انني اري ان السيسي هو الافضل و الاقوي لمصر في الفترة القادمة الا انني كنت اتمني ان اجد منافسة قوية و حقيقية مع مرشح اخر حتي نظهر بشكل جيد امام العالم و يقال اننا بنمارس شوية ديمقراطية! لكن للاسف لا يوجد احد منهم مقنع بالنسبة لي يكون لديه فكر و برنامج و اليات تنفيذ كلهم عاشقين للكرسي فقط يريدون ان يقال عنهم الرئيس راح.. الرئيس جاء أو ان يحصل علي لقب المرشح الرئاسي السابق ..والشئ المحزن هو تعرض اي مرشح منافس للسيسي للهجوم الشرس لمجرد انه فكر وتجرأ بترشيح نفسه امام المشير وهوما حدث مع الفريق احمد شفيق الذي انتقد القوات المسلحة باتخاذ موقف منحاز لصالح السيسي ..طيب فيها ايه يا جدعان ؟! انتم مش عايزين حد يقول رأيه؟ ..ليه عايزين الامور تسير كلها في اتجاه واحد دون تنوع في الاراء والاقكار هذا يضر البلد اكثر  ما  يفيدها!