#قلش_حقيقي

بقلم : عبدالجواد أبوكب

• الأستاذة نشوي الحوفي بتقول انها كل ما يقطع النور تجري ع البلكونة تلعب كوتشينة مع أسرتها لغاية ما ييجي ... ده علي اعتبار إنك بتلعبي بكوتشينة مضيئة مثلا؟!!

 

• فتوي جديدة: قطع الكهرباء يجعل الناس تفكر في ظلمة القبر وتتدبر حكمة الموت... أبوس ايدك اقطع كماااااااااااااان أنا عايز أتوب !!

 

• الأطباء اضطروا لاستكمال عملية إستئصال رحم على كشافات الموبايل بمستشفى الإسماعيلية العام لانقاذ المريضة بعد  انقطاع الكهرباء فجأة، وزارة الصحة قررت مكافأتهم وحولتهم جميعا للتحقيق.. ربنا يديك علي قد ذكائك يا معالي الوزير الجهبذ !!

 

• لوصحت معلومة أن دار الأوبرا وافقت علي استضافة مؤتمر يشارك في تمويله الاخوان ويساهم في تنظيمه اخوان مصر فنحن أمام احتمالين، أولهما أن الحكومة قررت التصالح مع الجماعة أو أن رجال علاء عبدالعزيز ما زالوا أصخاب القرار في وزارة الثقافة؟!!

 

• عندما تصبح الراقصة صافيناز أهم من  نبوية موسي وأشهر من عالمتا الدين آمنة نصير و سعاد صالح وأقوي من ميرفت التلاوي وأكثر نفوذا من حسناء الحكومة  غادة والي وأكثر تأثيرا عند الشباب من جمالات ملكة الكيف ويهزم تواجدها حضور مني ذكي و آيتن عامر و دنيا سمير غانم مجتمعين في أي مكان.. يبقي انت أكيد في مصر؟!!

 

• صعيدي قعد علي قهوة وطلب حاجة ساقعة،القهوجي جابله كانز مكتوب عليها "كوكاكولا أحلي مع سوسو" فاعتبرها "قلة أدب".. قام كسر التلاجة وضرب القهوجي بالجزمة علشان يحترم الزباين ويجيب لهم كانز عليه أسامي رجالي!!

 

• مرتضي منصور:عندنا أحسن لعيبة وهناخد كل البطولات والزمالك ملك أندية العالم بس مبنظهرش كل امكانياتنا مرة واحدة.. "ما تجوم تتطمن علي فريقك يا مرتضي" !!

 

• نائلة.. كانت عمارة وجالها إزالة فـ "إتهدت" !!