عفاف شعيب: إيه المشكلة إني ألبس ألماني.. عاوزني أمشي مجربعة؟

انتقدت الفنانة عفاف شعيب شائعات وفاتها على مواقع التواصل الاجتماعي، موضحة أنها على مدار ثلاث سنوات يطلقون الشائعات بوفاتها.

وتابعت خلال مداخلة تلفزيونية: "اشمعنا الجيل بتاعنا القديم تطلع عليه الشائعات وهي أفكار شيطانية وناس فاضية والموت والحياة بإيد ربنا كلنا هننتقل محدش هيخلد فيها بس ليه كده؟".  وواصلت: "الدنيا اتقلبت بعد الشائعة والناس قعدت تكلمني وتبعتلي وتقلي إنتي بخير؟ لأن الشائعة اتعملت بكل تفاصيلها وأن الجنازة تخرجت.. ربنا يسامحهم ودول ناس قاعدة للساقطة واللقطة".

ولفتت إلى أنها هاتفت نقيب المهن التمثيلية الدكتور أشرف زكي وأخبرته بضرورة التحرك ووكل محامي النقابة باتخاذ الإجراءات القانونية: "الموضوع معدش يتكست عليه".

وأوضحت أن المجتمع بات في تعامله أكثر قسوة، قائلة: "فيه ناس لسه الخير فيهم وكويسين ومحترمين بس القسوة والشراسة زادت مش بس كده ده فين ناس بتتكلم أني محجبة وبشتغل بقوة وأنا هدخل الفردوس الأعلى بالشائعات دي".

وحول جدل اقتنائها ملابسها من الخارج، قالت: "معلش ومش عاوزة حد يزعل مافيش مقاس في الصناعة المصرية مظبوط في المقاسات أنا بقيت بلف مصر كلها عشان أجيب بلوزة أو جاكت أو بنطلون وبجيب من محل بيجيب ملابس ألماني وهو الوحيد المظبوط، ولبسي شيك ومحترم، مبلاقيش البدل اللي أنا عايزاها إلا في الملابس الألمانية، هما عاوزني أمشي مجربعة ولا إيه ".

وعن عدم تكريمها في مهرجان الدراما، قالت: "مش أنا اللي زعلت على عدم التكريم بس الناس هي اللي زعلت وفيه ناس اتصورت معايا وقالولي إنت أصل الدراما العربية ولم يتم تكريمك ولكن التكريم من الله، ومش أنا بس يعني كفاية إن الفنان الكبير رشوان توفيق لم يدع ولا عفاف رشاد والمفروض كل ذي حق يأخذ حقه فيه ناس كتيرة كانت تستحق وناس لا تستحق، وفيه ظلم بيّن ولكن أنا شخصيا مش محتاجة التكريم واتكرمت كتير وعندي شهادات مش عارفة أحطها فين لكن زعلي على الفنانين الآخرين فين كمال أبو رية وأحمد عبد العزيز".