حسسنا إننا أبطال مش أقل من حد
رقية محمود بطلة "قادرون باختلاف": الرئيس السيسي خلى الناس كلها تشوفنا وتعرفنا
حوار- محمد خضير
مازحها الرئيس عبد الفتاح السيسي رئيس الجمهورية في حفل النسخة الخامسة لـ"قادون باختلاف"، وقال لها: "كلامك جميل أوي يا رقية، أنا سعيد إني بشوفك، مش تساعدي الفنانة رنا رئيس".. بهذه العبارات الداعمة لبراءة الأطفال وقدرتها على الإلقاء أمام رئيس الجمهورية على الهواء مباشرة، كان أملا وتمنيا كبيرا لدى الطفلة رقية محمود وهي أحد أبطال "قادرون باختلاف".
وفي فقرة إلقائها بمسرح المنارة أمام الرئيس عبد الفتاح السيسي والحضور، ظهرت الطفلة رقية بصحبة الفنانة رنا رئيس، لتؤكد "أن مصر طول عمرها مبتتأخرش على حد"، ليرد عليها الرئيس عبد الفتاح السيسي: "شاطرة يا رقية شاطرة"، وفي هذا الحوار المهم نتعرف على العديد من الجوانب في حياة رقية وهي إحدى طالبات المرحلة الابتدائية، والتي أصبحت محل اهتمام أكبر ودور بارز في القدرة والتحدي والإرادة.. وتفاصيل أخرى فيما يلي:
- في البداية نود التعرف على الموهبة والتلميذة رقية محمود؟
- أنا اسمي رقية محمود عبد الله الكريتي.
عندي ١٠ سنين، في سنة رابعة ابتدائي بمدرسة الزهراء عين شمس، بحب الشعر والتمثيل والرسم.
-كيف طورتِ من موهبتك وقدرتك على الإلقاء؟
- بابا عنده فريق اسمه "تحويجة فن" وكان بيدرب الناس على التمثيل والإلقاء، وأنا كنت بحب أروح معاه وأتدرب معاهم، وكمان مثلت معاه في حفل قبل كده.
- كيف استقبلتِ خبر دعوتك للمشاركة في حفل "قادرون باختلاف"؟
- كنت مبسوطة جدا إنهم اختاروني أكون في الحفل، لأني كان نفسي أقابل سيادة الرئيس عبد الفتاح السيسي، رئيس الجمهورية لأني بحبه جدا.
- كيف استعددتِ للحفل وما قدمته من كلمة مع الفنانة رنا رئيس وانطباعك عنها؟
- إحنا كنا بنعمل بروفات من شهر سبتمبر الماضي في مركز شباب الجزيرة ومسرح الجلاء ومسرح المنارة، وكنا بنتدرب كتير أوي من المستر أحمد جمال والفنان هشام جمال والأستاذة دينا طارق والمهندسة أمل مبدي، وفريق المتطوعين، أما الفنانة رنا رئيس، فأنا بحبها جدا عشان هي جميلة وطيبة وكانت بتاخدني معاها الأوضة بتاعتها ونقعد نحفظ مع بعض، وكانت بتقول لي: أنت شاطرة يا رقية ووعدتني إني هامثل معاها وأنا بحبها أوي.
- ما شعورك وأنت بتقدمي فقرة أمام الرئيس عبد الفتاح السيسي رئيس الجمهورية؟.. وكيف استقبلت ترحيبه وتشجيعه لك؟
- أنا كنت خايفة جداً في الأول بس مبسوطة أوي إن الرئيس عبد الفتاح السيسي شايفني وبتكلم قدامه، بس لما سيادة الرئيس صفق لي وقال لي: أنت شاطرة يا رقية، أنا سعيد جدا إني شوفتك يا رقية"، حسيت إني كويسة ومش بقيت خايفة أوي، وبابا كان بيقول للفريق وأنا معاهم قبل أي حفلة مش عايز حد يخاف وهو على المسرح، لازم تكونوا واثقين من نفسكم، بس برضه في الحفلة كنت خايفة.
- وإيه طموحك.. نفسك تطلعي إيه في المستقبل؟
- أنا نفسي أكون ممثلة مشهورة وأمثل مع الفنان أحمد حلمي في فيلم زي فيلم "مطب صناعي"، وأمثل كمان مع الفنانة رنا رئيس، وأكون إعلامية كمان وأقدم حفلات كتير وعايزة أكون مهندسة ريبوتات.
- احكِ لنا كيف تقضين يومك يا رقية؟
- باختصار يومي إني بذاكر شوية وبلعب شوية كتير أنا ومريم أختي، وبجنن بابا وماما كل شوية من كتر اللعب، وبحب أعمل مقالب في بابا جدا.
- هل تساعدين والدتك في أعمال المنزل؟
- طبعا أنا اللي بلخبط الشقة وماما هي اللي بتنضفها، بس أحيانا بقشر بطاطس وبعمل توم.
- ما دور بابا وماما في حياتك؟
- بابا وماما تعبوا معايا أوي في كل حاجة في المذاكرة وبيودوني المدرسة ولما بروح أعمل عملية في المستشفى، خاصة أنا لحد دلوقتى عملت ٧ عمليات وكمان بابا بيعلمني التمثيل وإلقاء الشعر.
- ما هدفك في المستقبل؟
- نفسي أكون مهندسة ربوتات وممثلة مشهورة وإعلامية كمان، وأقدم حفلات في التليفزيون.
-أمنية أو حلم تسعين لتحقيقه؟
- نفسي ألاقي علاج للعظم الزجاجي عشان أعرف أمشي وألعب مع مريم أختي استغماية واستخبي منها وأكون ممثلة معروفة، وأمثل مع أحمد حلمي ورنا رئيس.
- حدثينا عن الكلمة أو الطلب اللي طلبتيه من الرئيس السيسي ورده على طلبك؟
- أنا كنت بقدم مع الفنانة رنا رئيس فقرة عن إخواتنا في غزة وقلت للفنانة رنا رئيس "مصر عمرها ما تتأخر عن حد يا رنا".
والرئيس عبد الفتاح السيسي قال لي: شاطرة يا رقية شاطرة كلامك حلو يا رقية وفي الآخر بقول ودلوقتي هانشوف فيديو عن غزة وبنقول لهم من قلوبنا بنحبكم وبندعيلكم وربنا معاكم.
أنا ماطلبتش طلب من الريس بس إن شاء الله الحفلة الجاية هاطلب منه بس أصحابي في الحفلة طلبوا من الريس والريس قال لهم حاضر، وكمان هايخلينا نروح العاصمة الإدارية نتفرج عليها.
- ما رأيك في اهتمام الرئيس السيسي بـ"قادرون باختلاف"؟
- انا بحب الريس أوي خلى الناس كلها تشوفنا وتعرفنا، خلانا نحس إن أبطال قادرون باختلاف مش أقل من حد، لأننا مميزين كمان ونقدر نعمل حاجات حلوة كتير.
- كلمة تريدين قولها للرئيس السيسي؟
- شكرا يا ريس على كل حاجة حلوة عملتها لينا، وبحبك أوي ونفسي اشترك كل سنة في "قادرون باختلاف" عشان أشوف حضرتك.
- كلمة أو رسالة أخيرة في نهاية حوارنا؟
- بقول للناس اللي بنقابلهم في الشارع إحنا مش أقل منكم، ويا ريت تعاملونا حلو إحنا ربنا خلقنا عندنا مشكلة ودا مش بإيدينا، كان ممكن أنتم كمان تكونوا كده.. حبونا وعاملونا كويس.
جوجل نيوز
