ياسمين العبد عن شخصيتها في لام شمسية: لم أكن خائفة منها

كشفت الفنانة الشابة ياسمين العبد أنها قرأت دور "زينة" الذي قدمته في مسلسل "لام شمسية" لأول مرة وهي في الخامسة عشرة من عمرها.

 

وقالت ياسمين العبد: "كنت لسه عندي 15 سنة لما قريت بعض الحلقات، ومن ساعتها وأنا بتمنى أشتغل مع المخرج كريم الشناوي"، معبرة عن فخرها بالتجربة قائلة:"فخورة جدًا إني اشتغلت مع كريم الشناوي، وأتمنى أكرر التجربة معاه كتير".

وعن كواليس تقديم شخصية "زينة"، قالت: "كنت متوترة طبيعي، مش عارفة أعمل الشخصية إزاي في البداية، لكن ماكنتش خايفة منها. اعتمدت في التحضير على الفريق كله، وكلنا كنا بنشتغل بروح واحدة".

علّقت الفنانة الشابة ياسمين العبد على مشاركتها في مسلسل "لام شمسية"، من خلال شخصية "زينة"، وقالت: "أنا هتمّ 19 سنة في يونيو الجاي. بحب الفن من وأنا صغيرة، وكان عندي ثقة إن ده هيحصل. بدأت أهتم بالكورال والباليه، والكواليس اللي كنت بشوفها فيهم خلتني أكتشف إن ميولي الحقيقية هي التمثيل."

وتابعت: "كنت بتفرج على مسلسلات ديزني، ولفت نظري المشاهد اللي بتتكلم عن الكواليس. عرفت إن فيه مخرج وفيه كاتب، وبدأت أحس إن التمثيل هو حلمي"، مضيفة: "بدأت أزن على أهلي عشان أبدأ، وكان أول رد منهم هو الرفض، لأن مافيش حد في العيلة ليه علاقة بالفن. كانوا شايفين إني شاطرة، بس مش عارفين أبدأ منين".

وأشارت إلى أنها بدأت مشوارها الفني بالإعلانات، ثم شاركت في أول دور لها بفيلم قصير بعنوان "ظل القاهرة"، يتناول قصة فتاة تتعرض للتحرش: "وقتها حسيت بمسؤولية الفن في طرح القضايا المجتمعية، وإن التمثيل ممكن يكون صوت لقضايا حقيقية."