لا عزاء للسيدات

بقلم : زيزي عاصي

لا عزاء للسيدات كلمة كنت بقرأها زمان ومش بفهمها ... يعني أية لا عزاء للسيدات ... ليه يعني ناقصين ايد ناقصين رجل ... بس لما كبرت عرفت ليه … 

الفراق شئ مؤلم جدا ربنا ما يكتبه علي حد و لازم الواحد يقف جنب اصحابه في الظروف دي و من هذا المنطلق رحت اول عزاء في حياتي…  و انا حلوه كده بنت العشرين احد الاصدقاء المقربين من عليه القوم توفي جدها و انا كنت بعز الراجل ده اوي… قلت لازم اروح اعزي ولحزني الشديد قررت اني اتلفح بالسواد … ادور علي حاجه سوده عندي مفيش بعد طول عناء ملقتش غير بلوفر اسود صوف تقيل و كنا في اواخر الشتاء و الجو ابتدي يحرر.. حاولت امي جاهده انها تقنعني اني حفطس من الحر و يمكن احصل الراجل في تربته لو لبسته و انا راسي و الف جزمه الا انكل عبد العزيز لازم البس اسود .. يهديكي يرضيكي مفيش فايده .. غسلت وشي و اتسودت من ساسي لراسي و شديت الرحال للعزاء .. دخلت و يا ريتني ما دخلت مبدئيا انا الوحيده في كل العزاء بما فيهم اهل المتوفي الي لابسه اسود .. الوحيده الي غسله وشها و لمه شعرها و الوحيده الي مش لابسه اي المظات .. ابص للستات الي قاعدين كلهم لابسين الحته الي علي الحبل و نازلين علي سنجه عشره بمكياچ حفيف الشعر معمول عند الكوافير و بيلعلطوا المظات و انا شبه ام ابراهيم الغساله… كان هاين عليا اقف في وسط العزاء و اقولهم ان بنت ناس يا ناس و عندي لبس نضيف و شيك و عندي المظات بردو بس كان سوء تقدير مني.. قدمت واجب العزاء و قعدت في مكاني مكبوسه كبسه المدمس و منطقتش كلمه و عماله اصب عرق و حفطس من الحر و حموت من الكبسه… كانت تجربه اليمه بس عدت… لاكن اتعلمت الدرس… العزاء الي بعده كان عزاء خال احد الاصدقاء من اصول صعيديه ، اجدع ناس.. لبست طقم ازرق عندي اخر شياكه و ظبطت شعري و لبست حتتين الصيغه الي حيلتي و طلعت علي العزاء… دخلت و يا رتني ما دخلت .. نظرات قرف و مصمصه شفايف و تعويج بق و كل الي قلبك يحبه .. اديت واجب العزاء و قعدت في مكاني مش قادره ابص لحد.. الكل مغمور بالسواد و هاتك يا شحتفه .. و كل واخده تدخل العزاء ترقع تلتين صوت كده مجامله من علي الباب و يرد عليها باقي المعزين بستين صوت ..و انا اتنفض من مكاني و اقع من علي الكرسي من الخضه .. اهدا و يادوب الملم شتات نفسي تدخل الي بعدها بالتحيه .. شويه صويت و لا سارينة الاسعاف و باقي المعزيين يردوا التحيه و انا اتنفض من مكاني و اقع من علي الكرسي من الخضه بردو..و مابين كل راقعه صوت و التانيه كان بيكون فيه نفحات من الندب علي خفيف كده واحده تقوووول يا لاااااااااهوي ترد التانيه تقول " يا ميت لهو علي لهوي ياخويااااااااااا" .. علي نص العزاء خدت علي كده .. و علي اخر العزاء كنت برد علي التحيه و ارقع كام صوت علي خفيف كده .. روحت من العزاء ده في حيره من امري و مش فاهمه المواضيع بتمشي ازاي .. و بما اني بصاحب كل الخلق البيه صاحبي و الفقري مره علي مره ابتديت اعرف افرق كل عزاء اروحه شكلي عامل ازاي .. و بالرغم من الاختلاف الطبقي بين العزيان الا انه في عامل مشترك بينهم الا و هو رغي الستات .. كل عزاء فيه قصص و حكاوي عن الميت قد ايه هو كان طيب و حنين و انه اتخطف و انه حبيبي كان حاسس انه حيموت ده طلع مرتين يسلم عليا .. و هو اصلا طلع المره التانيه علشان كان ناسي موبايله و خاف يخلصوله الباقه .. او انه و هو نازل سلم علي العماره كلها .. و هو اصلا لف علي شقق العمارة علشان يلم منهم فلوس الجمعيه … هو في حد بيحس انه حيموت !!! ده مكنش حد غلب .. اي رغي و السلام.. مره رحت عزاء كانت واحده من اهل الميت بتحكي قد ايه ابنها تاثر بموت جده و انه قعد يعيط و يحكي عن جده و قد ايه هو كان مرتبط بيه و انا في قمه تاثري بالحكايه و ابتديت اتشحتف و طلعت المناديل و حديها قامت واحده قاطعه الحكايه و راحت قايله " هو الحوت " انا رحت متدوره و بصلها في محاوله مني اني افهم و لسه حسال هو المرحوم بلعه حوت?? هو مش كان عيان !! راحت واحده رده عليها قايللها" لا برج الحوت طيب بس مش عاطفي تعرفي انا كده انا كمان بس انا جوزاء" ردت التالته و قالت " انا مش كده خالص اصلي دلو " .. و انا ابص لكل واحده فيهم و اكرمش عنيا و لا برج اللوح في محاوله يائسه مني اني استوعب هما بتكلموا في ايه .. مره تانيه رحت اعزي صديقتي من ايام الطفوله في حماها و كان تقريبا كل الدفعه بتاعتي هناك ناس بقالي سنين مشفتهاش... قعدنا نجيب الجديد و القديم و الوقت سرقنا ...جوزي كلمني لما اتاخرت و سالني جايه امتي البنت عايزه تتعشي و تنام .. قلتله عشيها و نيمها انا مش جايه دلوقتي اصل القاعده حلوه اوي و عايزه اقعد شويه .. قالي هو انتي فين انتي مش قلتي رايحه عزاء قلتله اه بس القعده احلوت .. الراجل بقي يضرب كف علي كف قاعده ايه الي حلوت يا ست انتي تعالي عشي بنتك و نيميها .. و الله الستات دي يتفتلها بلاد 

فعلا الراجل الي اخترع كلمه لا عزاء للسيدات كان عنده نظره مبعديه هو صاحبتها