حقيقة استبعاد منة فضالي للفنانة وفاء عامر من أحد الأعمال الفنية

كشفت الممثلة وفاء عامر حقيقة استبعاد الممثلة منة فضالي لها من أحد الأعمال الفنية على خلفية وجود خلاف بينهما.

وأوضحت وفاء عامر، بقولها: "محدش يقدر يستبعدني غير ربنا سبحانه وتعالى والشغل رزق، وحتى لو فيه وقيعة وأنا زعلانة معاك هل من الشرف إني أستبعدك؟ يعني لو الكلام ده عليا أنا فهل ده من الشرف والأمانة والدين، بالعكس المفروض ما استبعدش حد وأساعده ياكل عيش".

وأثنت وفاء عامر على أداء منة فضالي في مسلسل "جعفر العمدة" الذي عرض في رمضان الماضي: "ربنا يزيدها ويكرمها ومش تستبعدني بس لأ تستبعد كل الزملاء، ولو هي استبعدتني فشكرا ليها، وأنا أشدت بها في مسلسل جعفر العمدة وكتبت أنها عاملة خطوة مهمة مع محمد سامي ومش هغير رأيي".

وأضافت وفاء عامر: "وأحسن حاجة يكون الواحد قادر يكون عارف قيمة نفسه وعارف إنه ما ينفعش يكون له بديل، ومنة أكيد لو قالت كده فمش قصدها ومش عاوزة أظلم حد، لأننا اتعلمنا نحترم بعض".

كما تطرقت عامر إلى شائعة إنجابها شقيقتها الفنانة آيتن عامر، معلقة: "كنت في تانية ثانوي وفيه حاجة اسمها كمبيوتر واللي هيزور حاجة هيروح في ستين داهية، ومش عارفة الشائعة دي كان هدفها غيرة ولا إيه؟ ده أنا لما بكون وسط مجموعة برفض الكلام على الناس وبرفض أن حد يشتم على حد".

وأكملت وفاء عامر: "والحمد لله فيه ناس كتير بتدافع عني واللي بيكرهوا شوية صغيرين خليهم يمشوا يدوسوا على ضلي.. وتعيش يا ضلي وتكعبل الناس، وتعيشي يا ضحكتي وتفرسي كتير، دلوقتي مش بزعل وزمان كنت بزعل واكتئب".

وتحدثت وفاء عامر عن زوجها المنتج محمد فوزي، وفي هذا الصدد لم تتمالك وفاء دموعها، مشيرة إلى أنها تحزن عندما تشعر بأن زوجها لم يشتق لها، وقالت: "بزعل لما جوزي يتأخر عليا وما أوحشهوش أو أحس إنه مش شايفني، ولما يبطل يشوفني، لأن الراجل لما يشوف مراته طول الوقت، وكأن مفيش غيرها وبيكون عاوز يبسطها ويقول لها كلمة حلوة بيفرق معاها".

ومضت عامر، تقول: "لو وزنتِ كنوز العالم قصاد الكلمة الحلوة، الكلمة الحلوة ترجح، ولما يقول لها وحشيتني وهو لسه نازل من البيت، وأنا بحب أي علاقة حلوة بين اتنين، علشان كده بارقي أي اتنين بيحبوا بعض وبنصحهم علشان ما يتحسدوش لأني بخاف على العلاقات الحلوة"، موضحة أن سر استمرار زواجها لـ22 عاما، هو أنها لا تفشي حياتها الخاصة لأي شخص، وتتعمد الكتمان.

وتابعت وفاء عامر: "كلمة السر في استمرار زواجي إن ما حدش بيعرف حاجة عن مشاكلي مع جوزي، ومفيش حد مش بيتخانق والحياة مش وردي مع كل الناس ولكن الأهم إنها ما تطلعش بره البيت".

وأشارت وفاء عامر إلى أنها كانت تتجه بشكل دائم لمراقبة هاتف زوجها ومعرفة تصرفاته وتحركاته من خلاله، لكنها ابتعدت عن هذا التصرف، عندما علمت أن الدين الإسلامي يحرم ذلك ولا يحبذه، معلقة: "فيه آية بتقول: "يا أيها الذين آمنوا لا تسألوا عن أشياء إن تبدَ لكم تسؤكم".

كما حرصت وفاء عامر إلى توجيه نصيحة للسيدات بالابتعاد عن "النكد": "ليه تنكشي على النكد؟ أنت ممكن تروحي للمأذون بسبب رسالة، ليه مثلا أقول له جارتنا وهي طالعة لما قالت لك إزيك ليه رديت بابتسامة؟ الراجل مش بيحب الست الزنانة".