عفوا لقد نفذ رصيدكم ..

بقلم : رضوى نجيب

 

الجمله دى غالبا بنسمعها لما بنكون  منسجمييين جدا ومش حاسين بأى حاجه وبنفضل نتكلم حتى واحنا عارفين ان رصيدنا على وشك . بس بيجيلنا احساس غريب كده بأن . لا الدقيقه الاخيره دى هتمُط ويبقى فى بركة وتطرح دقيقتين زياده كمان  . ونفاجأ بأن فجأة (عفوا لقد نفذ رصيدكم )

 

ياترى ايه فى حياتنا بيخلص مننا فجاة من غير ما نحس ، او بيضيع مننا بسرعه بسبب استخفافنا بأهميته او معناه ؟!

يعنى :

• سألت نفسك انا كل يوم بروح الشغل وعادى حفظت احساسى كموظف عامل ازاى ، بس هل سألت احساسك ك عاطل او مرفود بيكون ازاى بردو؟ .. غالبا لا مطمن انك لسه بتشتغل ...

 

• سألت نفسك ايه هى النعم الحقيقيه اللى موجوده فى حياتى اللى لولاها  اكون ولا اى حاجه ؟
• سألت نفسك العلاقه العاطفيه الحاليه اللى انا عايشها وانا حاطط محل بطيخ ف بطنى ومريح ، العلاقه بتدينى ايه انا من غيرها استحاله اخده من تلقاء نفسى ؟ والا لو كان عندك استغناء ذاتى مكنش قلبك هيحتاج احساس خارجى زياده .. احتمال كبير يكون ردك ان العلاقه بتخلينى ف مود حلو طول او اغلب الوقت . بس الحقيقه المود ده انت اللى حطيت نفسك فيه لكن العلاقه اديتك حاجه اكبـــــر بكتيييير من مجرد مود ، اولا اديتك حاجات معنويه خفيه روحك بس اللى تحسها ( أمان ، احتواء ، مسؤوليه طعمها حلو عن حد ، صوت جنب صوتى ساندنى ،غيره حلوة محسسانى انى مختلف ، حب ، تفاهم ، عين مع الوقت بتفهمنى من ابتسامه او غمزة صغيره ) .العلاقه دى لو راحت ، هترجع انسان بيدور ع النجاح الفردى فقط  ..

 

• سألت نفسك اهلك اللى اوقات كتير يشخطوا فيك ويأمروك دول . مستوى صوتهم بيعلى ليه ؟ ولا انت شايفها نرفزة وسطوة وبس ! تخيل لو هما مش ف حياتك ووقعت فجأة ف بيتك فاقد وعيك . أبسط سؤال . مين هيخبط على وشك يشوف لسه فيك نفس ولا مت ؟! مين هيلحقك ؟!
• سألتى نفسك لما بتخرجى بقلب تقولى بابا ، ماما انا عايزة فلوس ويديكى من غير جدال  .. لو البابا او الماما ده مش موجود وانتى مضطرة تستنى لاخر الشهر عشان تقبضى . ابسط احساس هو انك هتدمعى
• سألت نفسك لما بتعمل كل موقف واخوه مع صاحبك وتقول ف عقلك .. اهو طيب وهيسامح ويعدى . لو صاحب ده شخصيه بجد . تفتكر هيقدملك اعذار كتير ولا هيجي لحظه يقفل الباب ف وشك.

 

حاجات ملهاش اول من آخر . احساسنا اليقينى بأنها موجوده ومسلم بيها بيخلينا مع الوقت بنفقد احساسنا الاولانى بمدى روعتها واهميتها ، لكن مع الوقت لما بنفتقدها وبنحس بعدم وجودها بنحس بلحظة وحدة داخليه . وكتير اوى مننا لو قدامه فرصه يجرى ع الشئ ده يخطفه ويحطه ف حضنه هيجرى رهوان يعملها ..

 

الجمله دى مش عشان نترعب .بس عشان نفوق شوية .. لو جنبك حد او ف قلبك حد .بتحبه وبيحبك بجد .. أعمل اى حاجه عشان متخسروش ، وافتكر ان من علامات يوم القيامه ان الخير بيقل والناس الكويسه بجد بتموت .. اى حد حلو ف حياتك هو شئ كويساى معنى ف حياتك جميل هو كويس.. صدقنى لو خسرته والانعره اللى جواك خدتك ف لحظه انك اصلا بيه او من غيره عايش . الانعره هتدوب مع الوقت . وكل حته ف كيانك هتقولك (انا عايز فلان ده رجعهولى ، انا كنت بتنفس راحة بال وسعادة معاه ) .

و ربنا بقدر ماهو رحيم هو حقانى .. لو من رحمته ادالك شئ عشان تستمتع وتسعد بيه . ومحافظتش عليه بكل ما أوتيت من قوةهياخده منك . ويحطه ف ايد حد تانى محتاجه اكتر وهيقدر معناه اكتر .

 

ألحق نفسك قبل ما تيجى لحظه تلاقى الفرصه للامساك بأى شئ كويس ف حياتك اتحولت لـ .. عـفواً قد نفذ رصيدكم