ننشر"مرسال".. قصيدة الأبنودي للسيسي عن الفقراء ورجال الأعمال

كتب - عبد الجواد محمود

كتب الشاعر الكبير الخال عبدالرحمن الأبنودي قصيدة جديدة بعنوان"مرسال" موجهة من فقراء مصر الي الرئيس عبدالفتاح السيسي تتحدث عن أحوالهم وضرورة أن يقف بجوارهم وتشير الي تخاذل رجال الأعمال في مساندة الوطن وتقول أبياتها:

 

الشعب عمره ما راح يعود للوهم..

 والرجرجه فى القول والأفعال

المسأله غياب سلوك الحسم ..

فى حرب جبارة جهاد وقتال

المسأله دعم أو مش دعم..

 رايحين لفين أهو ده أهم سؤال

أنا مش مصدق مهما صدق العزم..

 إنك تشيل الميه فى الغربال

كله أخد على البلطجة والخم..

 ومصر مرضانه مرضها عضال

الشهر يسحب خلف منه شهر..

 تقع المروءة مهما هتكون شهم

يا أيها القبطان قانون البحر..

 متخفش على الصارى وخاف على اللحم

والشعب طاشى لا نظر ولا سمع..

 وفضيت الساحه من الحرافيش

الدم متنكر فى صورة دمع..

 والكبد متمزع والقلب مفيش

فاحذر لسان مسموم بـ"قلنا وقال"..

 واخر النهار لا جدعنه ولا مال

عيون قزاز أما قلوبهم شمع ..

والروح حته شقف وضمير خيش

متتكلش على اللى مبيديش..

 طواويس منفوشة هوادج ريش

ويخافوا جدا من حكاية الجيش

 زمان جيه حاكم قلع الطرابيش..

وخد بإيد المنسى فى التهميش

 وانت سمحت ازاى يغلوا العيش..

وسبت أهل النهب والتكويش

ناسك لو انصرفوا هيفضى الكون..

 لو ناديت مش راح يرد سؤال

الفقراء ضاعوا لا مدد ولا عون..

 كأن ما الثورة خيال فى خيال

يلى ضرطت شيطانها الملعون..

 فارس ونعم بسالة الخيال

تحت الفرس قلب الفقير مطعون..

 ولا من سمع أنين فقير الحال

ضحك المرابى وداس على المديون..

 والغالية رايحه ترهن الخلخال

فتحت قلبى وبحت بالمكنون..

 والفقراء بعتنى اليك مرسال