مات في حضني.. سحر رامي تكشف اللحظات الأخيرة في حياة حسين الإمام

كشفت الممثلة سحر رامي، تفاصيل اللحظات الأخيرة في حياة زوجها الممثل الراحل حسين الإمام.

وقالت زوجة حسين الإمام، في لقائها مع الإعلامية ياسمين عز: "حسين الإمام مات في حضني، كنا في البيت يوم عيد ميلادي حوالي الساعة 6.30 مساء، والجو كان حر، هو طلع الحمام واتأخر، فطلعت أشوفه اتأخر ليه، ليكون بياخد دش وسابني أنا والضيوف، أو يمكن يكون اتحبس في الحمام لأن عندنا مشكلة في أوكرة الحمام".

وتابعت سحر رامي: "ناديت عليه قالي افتحي لي عشان مش قادر أخد نفسي، وقع عليا على السرير، في لحظة، أنا كنت مش عارفة إيه اللي بيحصل، في خلال 5 دقايق راح أقل من 5 دقايق، أنا كنت منهارة، وأصحابي طلعوا لي من تحت، لكن مقدرناش نعمل حاجة".

وأضافت: "حسين مكنش بيعاني من أي أمراض، التشخيص الدكتور قالي جلطة مفاجأة في الشريان التاجي، ومش بتتلحق غير بحقنة الأدرينالين بتتاخد في القلب، وفي خلال 10 دقائق، مكنتش ممكن تتلحق، ولو اتلحقت بتعمل أثار جانبية زي الشلل أو العمى، وإحنا كنا في بيتنا على الطريق الصحراوي، والحالات دي عشان تتلحق لازم يكون هو أصلا في المستشفى".