بقلم : د. شوكت المصري
عرفت ازاي أكون ثـورة
عرفت أبكي .. عرفت أضحك
عرفت أصرخ بعِلْو الصوتْ:
أنا العاشق .. أنا المكبوت
أنا الجاني على نفسه
وأنا المجني عليه نفسه
وأنا القاتل .. وأنا المقتول
و(أنا) و(انتِ) "ضمير موصول"
كلام النحو مش قاعدة ولا فارق
إذا بالثورة مات عاشق وعاش معشوق.
***
عرفت ازاي أكون ثورة
ولو مني عليكِ أغير
حلمتْ المستحيل إنتِ
يا سر ثباتي ف التغيير ..
ولا بطلقة ولا بخرطوش
ولا بمليون عبوة غـــــاز
أدمّعْ واترِعبْ وأهربْ
أنا جواك أو أقربْ
أنا سلطانك الخادم
ضعيف ليكِ وبيكِ أقوى
تكوني حوا .. بضلوعي أكون آدم
تكوني "ليلى" في عشقي أكون "مجنون"
تكوني "عزيزة" أتغرّبْ وأكون "يونسْ"
تكوني "مصر" بالثورة أجاوبك وأبقى أنا "تونس"
ده (أنا) و(انتِ) "ضمير موصول"
كلام النحو مش قاعدة ولا فارق
إذا بالثورة مات عاشق وعاش معشوق.
***
عرفت ازاي أغنيلِك
عرفت أبْدِع ف تفصيلك
وأكون سدّك إذا فاضوا
وإذا انحسروا أكون نيلك
عرفت ازاي أجيب حقك
وتتنازلي أكون ضدك
تخاصمي صدقي وتلومي
وبتصالحي اللي بيضلك
***
عرفت ازاي أكون غامض
وأكون مرجع ف تفسيرك
وأضْرِب واعتصم وارسم
وأجهل لك .. وأتعلم
جرافيتي ف أحضانك ..
يسدوا الشارع المفتوح على قلبي
.. أعديلك ..
يقابلني طابور عسكر
ومن ضرب الهوى أسكر ..
وأفوق واسخر من اللي فاكر الحدوتة بالساهل
ده أنا القاتِلْ .. وأنا المقتول
و(أنا) و(انتِ) "ضمير موصول"
كلام النحو مش قاعدة ولا فارق
إذا بالثورة مات عاشق وعاش معشوق.
قصيدة بالعامية المصرية كتبتُها أثناء أحداث محمد محمود الثانية 2013 .. ولم أجد ما أقوله لكم في ظل ما تعانيه ثورتنا المجيدة (ثورة 25 يناير) هذه الأيام سوى هذه الكلمات الخالصات؛ لعلها تستطيع أن تحمل لكم ألمي وأملي الممتزجين حدّ التماهي. "الثورة مستمرة" .. "مكملين" .. لـ "تحيا مصر".