بقلم : لواء أركان حرب/ جمال عمر
قالوا زمان .. ياما قالولي .. تعيش وتسمع ..والعيشة مرة .. والدنيا مرتع
لا الحال هيفضل زي النهاردة .. ولا فات هيرجع .. قالوا .. وقالولي
زي الغلابة .. وفـ ركن بيتي .. أنا كنت قاعد .. باسلي وقتي ... والدش لعلع
فجأة صحيت على كلمتين ... من واحدة شايطة ... أو .. حرمة صوري
وكانت قاعد ... معرفش ليه ... متغاظ وشكلي .. خايف لافرقع
والدش جايب .. صورة ولمة .. ومذيعة أوعى .. وديكور مغولي
أنا قلت ياللا ... أهي مرة تعرف .. كلام حريم ... ونشوف ونسمع
قال الولية .. بتقول خلاص ... ما عادش ينفع ... عالم .. ذكوري
وبكرة لازم .. الست تعلن وتقول كلامها ... تحكم وترسم .. والكل يسمع
أنا قلت يمكن .. ده فيلم كوميدي ... ولا دي حالة .. تهريج .. ضروري
ما هو برضه لازم .. ستات تهرج .. والكل يضحك .. وبلاش .. نفرقع
وقلت نضحك ... خمسة وننسى ... يمكن تزيد ... حبة .. فـ سروري
أتاريها طلعت ... دكتور في حتى ... بتنادي عايزة ... الحريم يفلسع
ما هي برضة ناقصة ...والهم يكمل .. اشمعنى يعني .. ليزا وسافوري
آخرة سكوتنا .. وتقلدينا ليهم .. حطينا راسنا ... في بق .. مدفع
عايزة الحريم .. تسيب بيوتها .. وتهد بيتها ... وتقول .. ضروري
بتقول كفاية .. الرجالة ترجع .. للبيت وتقعد ... والست تحكم .. وهن أجدع
شغل الحرملك .. تشيل وتحبل .. وسيادته يأمر .. دا كان زمان .. مات الذكوري
ولابد ينسى .. مفيش عذارى ... ده كلام قديم ... مش عاجبه ... يولع
وانا بنتي لازم .. أناديها باسمي ... ما عادش لازم .. دا الأب .. صوري
قالوا زمان .. ياما قالولي .. تعيش وتسمع ..والعيشة مرة .. والدنيا مرتع
لا الحال هيفضل زي النهاردة .. ولا فات هيرجع .. قالوا .. وقالولي
وانا برضه لسة .. فاضلي كلمة .. تاعباني لكن .. الكلمة حكمة .. والحق يوجع
يا ست ياللي ... جاية النهاردة ... تشلي عقلي .. بكلام .. ذكوري
هو انتي ناوية .. تديها بمبة ... ثورة ودعكة .. والدنيا .. تولع
ما تيجي نحكي .. نخد وندي ... ونقول في حكمة .. لو كان ضروري
سألت مرة .. خالتي أم سيد ... رجالة ليه .. ما الست ممكن .. تحكم ونسمع
قالتلي يا بني .. دي الفرخة عايشة .. عشان ما تسمع ... صوت ديك .. جهوري
ولو ما كانشي .. في العشة ديك ... شديد وقادر ... وفراخه طوعه .. والكل يسمع
طب مين يدلع .. ومين يهني ..ومين يحط الكتوكوت فـ بيضة .. وده شيء ضروري
دا الفرخة يا بني .. مخلوقة ناعمة .. وعايزة ديك ... شديد عليها .. ولصوته تسمع
واهو كله منه ... حسك بتمنه ... شديد وتحمي .. والوردة تروي .. والدفع فوري
وإياك تفكر .. إن إنت عنتر .. والحال تبعتر ... وتسيبها سايبة .. ترحل ما ترجع
سألت تاني .. ما هو برضه فرصة ... وكلامها حكمة ... والفرخة دنيا .. يا ست قولي
لو يوم تلاقي .. الفرخة حارنة ... عايزاها ثورة .. على كل راجل ... و الديك تفرقع
قالتلي يا بني ... دي فرخة دايخة ... وماليها عازة ... ولا ديك عايزها .. ولا حتى حولي
بس الصراحة .. باقولها يا بني .. واياكش تزعل ... من الصراحة ... ما الحق يوجع
الغلطة منكوا ... ومعذورة يا بني ... ما لقتش ديك ... وعيبة يا بني ... تقول هاتولي
والعيبة فيكوا .. رجالة تفقع ... والواد ممرقع .. ولا حال بينفع ... ولا شكل يشفع
ديوك ونامت ... في العشة تاهت ... والفرخة لايدة ... ماعادش فايدة .. قالوا وقالولي
واهي دنيا فانية .. ومادام بتنسوا ... للرب حكمة .. خلاص يا ولدي .. خليها .. تولع
وسألت خالتي ... وبعدين يا حاجة ... كيف العبارة ... وازاي راح افرد .. في العشة طولي
قالتلي اسمع .. كلامي وارجع ... للعشة وارفع ... صوتك ولعلع .. والكل يسمع
حملك تشيله ... وبلاش تفلسع ... وتبص برة .. وتنام مكنفش .. وتقول قالولي
وانسى الرزية .. والست دية ... وكلام مفقع .. والدش يولع ... ما الديك .. ذكوري
قالوا زمان .. ياما قالولي .. تعيش وتسمع ..والعيشة مرة .. والدنيا مرتع
لا الحال هيفضل زي النهاردة .. ولا فات هيرجع .. قالوا .. وقالولي