بيومي فؤاد: بشرب سجائر من ورا مراتي

قال الفنان بيومى فؤاد، أنا كنت مستصغر نفسي على الجواز على طول وكنت بتكسف أقول لاي بنت انى معجب بيكى، ولهذا السبب تزوجت على كبر ، وكنت دائما بحب من طرف واحد .

وأضاف بيومى خلال الجزء الثانى من حلوله ضيفا ببرنامج واحد من الناس مع الإعلامي د. عمرو الليثي على شاشة الحياة، أنا في حاجات كتير أخفيها عن مراتى منها إنى بشرب سجاير من وراها، ومن الحاجات اللى بخبيها عليها انى كل سنة كنت بوعدها إنى مش هعمل مسلسلات في رمضان، وأخفي عليها وبعدين بمضي شغل في رمضان، وزوجتى ما تعرفش أنا رايح فين وجي منين، وأنا بطبعى لو حد كلمنى وقالى تعالى عاوزك ما اسئلوش عاوزنى ليه، وأمى هي اللى علمتنى اسبها علي الله وبلاش مقاطعة ، لكنى لا يمكن أكذب، وعمر زوجتى ما اتجسست عليا، والحمد لله لم يتم كشفى في حاجة لحد دلوقتى لان مراتى زعلها وحش اوى والحمد لله ما جربتش لحد دلوقتى.

وأشار بيومى فؤاد أن هناك معجبات كتير بى لانى لطيف، والتقل عندى أنا مولود بيه طبيعى، و بكره الكلام في التليفون، ومعرفش أجيب دباديب، وأنا و مراتى عمرنا ما قولنا لبعض في عيد جوازنا كل سنة وانتى طيبة، وفي أعياد الميلاد اهتمامنا اكتر بولادنا .

وأضاف، أنا دائما عندى حدود وبحب الست اللى بتعمل حدود، وسر السعادة الزوجية في اللى ينفع تطنشه طنشه علشان تبقى لطيف، وعلشان الحياة تستمر ، وكمان علشان لما تقوملك قومه يعرفوا أنه لسبب كبير .