بهاء الدين محمد عن غناء شيرين: مش عاجبني

رد الشاعر الغنائي الكبير بهاء الدين محمد، على تصريحات المطربة شيرين عبد الوهاب بشأن ندمها على تقديم أغنية "ما تجرحنيش" التي كتب كلماتها.

واستهل بهاء الدين محمد رسالة العتاب التي وجهها لشيرين، بقوله: "مش متعود أرد على أى حد، ولكن لما حد يتجاوز حدوده لازم يقف مكانه ويعرف إنه مهما إتعود يغلط لازم ييجى عند بعض الأسماء ويحاسب ويخلى باله وخاصة لما حد ف كل كارثة يدافع عنها".

ومضى الشاعر الكبير، يقول: "رح أتكلم بإختصار جدا"، مضيفا: "المشهد الأول : أول يوم دخلت #شيرين_عبدالوهاب  مكتبى كانت مع الأستاذ #نصر_محروس اللى هو صاحب الفضل ف تقديمها.. وبعد دقائق من اللقاء لقينا شيرين بتبكى وسألها نصر بتعيطى ليه ردت علشان أنا قاعده مع الأستاذ بهاء".

وتابع بهاء الدين محمد: "والمشهد الثانى:  رشحتها تغنى #كتير_بنعشق ولولا موافقة نصر إحتراما للعشرة اللى بنا ماكانتش ح تغنيها لأنها كانت موقوفه من النقابة".

أما عن ما أسماه "المشهد الثالث"، فقال: "لما فوجئت بمدير أعمالها الرجل اللى أنا بأحبه وبأحترمه لقيته بيكلمنى نيابه عنها ويقولى سمعنى الجديد وده طبعا خطأ لأن اللى بيغنى مهما كان اسمه مش المفروض يغلط غلطة زى دى !!! لأن المشهد ده مش لايق على المشهد الأول".

وأنهى حديثه بالمشهد الرابع والأخير، قائلا: "أغنية ماتجرحنيش أنا لحد الأن مش عاجبنى غُنا شيرين مع إحترامى الكامل لصوتها وأكيد لولا الأستاذ نصر ماكانش ح يتم اللقاء،وماتجرحنيش من أهم أعمالى ومن حقى أدافع عنها نتاج تهور اللى غنيتها".

وأضاف: "وكمان لأول مره ألاقى حد بيحارب نَفسه وبيغلط ف مبدعين إشتركوا ف صناعته.. وعشان أكتب الكلام ده يبقى شيرين غلطانه كالعادة بس كان لازم أقولها ماتعمليش كده تانى وأنتى بتكبرى بس مش ح تعدى حدود حجم بعض الأسماء ولا أعمالهم".

وكانت المطربة شيرين عبد الوهاب قد ردت على العديد من أسئلة متابعيها وجمهورها عبر خاصية "استوري" في حسابها الرسمي بموقع "إنستجرام"، وفي ردها على سؤال نصه: "فيه أغنية ندمتِ عليها؟"، قائلة: "ما تجرحنيش".