إسلام زكي يكشف ملابسات "خناقة" حفل تامر حسني

أوضح الملحن إسلام زكي ملابسات ما جرى معه خلال حضوره حفل إطلاق الألبوم الجديد المطرب تامر حسني "عشأنجي" والذي أحياه حسني في الساحل الشمالي.

 

وكشف إسلام زكي حقيقة ما حدث، بقوله: "قبل أي حاجة مبروك للفنان تامر حسني علي الألبوم والفيلم ولكل صناع العمل اللي أنا واحد منهم وحابب أحكي حصل ايه معايا امبارح باختصار للتوضيح فقط عشان الناس اللي شافت الخناقة تفهم ايه اللي حصل منعًا للقيل والقال".

ومضى إسلام زكي، يقول: "أنا سافرت طبعًا وسبت كل حاجة ورايا عشان أحضر الحفلة وأحتفل مع الجمهور وصناع العمل ويبقي يوم حلو نحتفل فيه بشغلنا وبالألبوم خصوصًا لما يكون مع نجوم كبار زي ما أنا متعود دايمًا على النوع ده من الاحتفال بس اكتشفت وأنا داخل الحفلة إن مكاني هو في آخر صف في الحفلة وبدون مبالغة كان ورايا السور وكنت فاكر إني هكون في مكان قريب مخصص لينا أو VIP زي ما متعود أو على الاقل مكان قريب من المسرح عشان يبقى سهل نطلع وقت ما تامر يطلب ده مش عشان أي حاجة تانية".

 

وتابع إسلام زكي: "أنا عن نفسي بحب أتواجد وسط الجمهور وللأسف ده حصل في آخر دقايق من الحفل وكان مستحيل نوصل للـbackstage أو إن تامر يشوفنا أصلا ورغم كدة حاولنا نعدي وسط آلاف البشر عشان نوصل لمكان المسرح وخلاص تامر كان بيودع الجمهور وفجأة الجاردات تشتبك معانا ويسألونا إنتو مين ويحصل تدافع ونتزق عشان ممنوع نكون موجودين خلف المسرح".

وأضاف إسلام زكي: "الموضوع كان مهين جدًا بصراحة وأول مرة أتعرض لموقف زي ده بغض النظر دى غلطة مين بس النتيجة واحدة في الآخر وأنا مش هقبل الإهانة دي احنا في الآخر فنانين و ايحين فرحانين بشغلنا في يوم مهم زي ده مع فنان كبير بحجم تامر حسني وللأسف حتى أغنية حياتنا مشتغلتش في الحفلة ولا نزلت في الألبوم واللي دخل الفيلم سمع منها ٣٠ ثانية فقط عشان الناس اللي بتسألني أنا معنديش أي تفاصيل عن معاد نزول الأغنية وفي الآخر دي وجهة نظر الفنان تامر حسني وأنا ماليش أي تدخل فيها وشكرا".