احمد آدم يكتب : عبقري للبيع أو للبدل
سبحان المعز المذل , رأيت حسني مبارك و قد وضع قدميه في جوز شبشب فرو معتبر لو شافته الحاجه امي في مرحلة ما قبل النضارات لطبخت عليه حلّة ملوخيه معتبرة . و قد امسك في ايديه جرنان الاهرام تقولش قال يعني ايه الاهرام هو نافذة الرئيس علي اخبار مصر ابان وجود فخامته بارض الغربه يا ولداه لا حول الله .
و أصل الحكاية .. انه لما كانت حالة الاكتئاب لا تزال تلازمني بل و الحمد لله امتدت لبعض من اعز اصدقائي مما جعل البؤس دليلي و خليلي هذه الايام فقد اتخذت قرارا اريد ان تعاونوني جميعا فيه , لقد قررت ان اتنحي تماما و نهائيا عن كل موضوع يجيب الغم و الكآبه و ان افتح مواضيع مبهجه تدخل السعاده الي قلبي المعذب و بعد البحث و الفحص و المحص و التفعيص
لم اجد ما يسعدني و يفرفشني اكثر من المعارك و الملابطه و المناهده مما يعني للاسف الاسيف و العنف العنيف استقبالي للشتائم و الزجر و التعنيف لاننا لسه ماعندناش سياسة تقبل الرأي و الرأي الآخر حتي لو كان يلطش و سخيف ع العموم دي ضريبه افكاري السابقة لزمانها و حاقولها اكتر من مره اني اعبر عن رأي الشخصي اللي لازم طبعا يكون سليم ميه الميه و اللي انت لازم تقتنع بيه بدون جدال و تعب قلب و مناهده و بدون ما تشغل مخك و تعمللي فله (من الفلين ) و لازم تتبعه و تبدي اعجابك بذكائي و عمق بصيرتي , انتهي , ما علينا .. اليك تاني تنهيده ....... اقصد تاني مقال اتفضل سن لسانك و جهز قاموس الشتائم و اتفضل خبط و خش :-
عبقري للبيع او للبدل , حواديت احكي , عاوز كوميدي ؟ ح أضحك اللي جابوك لدرجة الوقوع علي القفا ,عاوز تراجيديا ؟ حلاوتك , ح أغم اهلك لدرجة الانتحار , ساسبنس ؟ ح أخلليك انت و عيالك ماتلحقوش تقعدوا ع القصاري _ جمع قصريه _ م الاثارة .
تعوز ادب تلاقيني فشر يوسف السباعي قبل ما يموت مضروبا بالنار في قبرص , مقصات أضرب فشر بروس لي قبل ما يموت مضروبا بالشلوط في لوس انجلوس , روسيات أبطح فشر مصطفي لطفي ملك فتوة الجيزه قبل مايموت م الجوع في القللي , مع العلم ان روسيات جمع روسيه أي دماغ و ليس روسيه أي موززه من موزز روسيا حماهم الله للسياحه و لرفع الروح المعنويه لقاطني شرم الشيخ و الشرومات المجاوره مع العلم أيضا ان شرومات جمع شرم (عشان نبقي واضحين م الاول) .
سكاكين و مقصات أسن , بوابير جاز أعمر , متعدد المواهب زي كتاب عمك عرفه المأذون اللي كان في الاصل منجد
كتاب عجيب .. يمين جواز شمال طلاق و علي سيفه ينزل عصير .
أجيد الطهو , ملفوف القوام , اعزب و أقدس الحياه الزوجيه و اسألوا مراتي التالته ,أمتلك خمسين فدان موالح ايجار قديم
و عربيه نصف عمر بس فراملها شديده و عمارة سبع تدوار بسموحه ع البحر من غير اسانسير و لا سلم و عندي بدلتين واحده ميه ميه و التانيه مش ولابد و لو احتكم الامر ممكن أغني لك علي مسئوليتك .
تدوس علي رجلي الشمال اسقف , تدوس ع اليمين اتشقلبلك علي ورا وأقف لك علي ايديا .
يا شعب مصر ياللي كنت يوما ما شعب طيب , خدني مكان مبارك و انت الكسبان .
لو فضيلتك مسلم تبقي كسبت ثواب الكاظمين الغيظ و العافين عن الناس و الله يحب المحسنين و اهو برضك تبقي أخذت العفو وأمرت بالعرف وأعرضت عن الجاهلين و لو نيافتك مسيحي فاقول لكم احبوا اعداءكم . باركوا لاعنيكم.احسنوا الى مبغضيكم . وصلوا لاجل الذين يسيئون اليكم ويطردونكم .
و لو حاخامتك يهودي يبقي ملعون ابو اللي جابت امك و مش حأقولك أي حاجه بالمره .
و لو انت من عشاق عبقري الكوميديا في الزمن الجميل اسماعيل ياسين تبقي عملت زي نصيحته في آخر الاوبريت الشهير مع الراقصه اللهلوبه كيتي القائل : العفو عند المقدره احسن كتير م الشوشره .
آآآآآآآ م الشوشره .
آآآآآآآآ الشوشره .
اما لو كنت من محبي علاء ولي الدين الف رحمه و نور عليه لتذكرته في الفيلم اللي قام ببطوله جميع ادواره توفيرا للنفقات فقام بدور صلاح عاشور و ابنه الرضيع و أمه الحقنة التي زارت ابوة الناظر الذي هو ايضا علاء و قالتله و هو علي فراش الموت : ياعيني ع الحلو لما تبهدله الايام .
و لو سيادتك لاسمح الله من الصنف العقلاني لقلت ان الاهم من الانتقام و التشفي من مبارك كجسد و روح ذل و حبس و خلافه الاهم هو عودة ما سرقه من اموالنا التي سوف تساهم بشكل فعال في نهضة البلاد و شبرقة العباد و بشبشة الولاد
هذا غير العظه و العبره و الدرس المستفاد . ( انا باقول شعر والا ايه )
و لو صياعتك اقصد سيادتك زي حالات العبد لله و الكثير ممن اعرف من الذين أسرفوا علي أنفسهم و خاضوا في الدنيا ينهلون منها أكلا و شربا في كؤوسن و قزايزن و نسوانن و دخانن ازرقن في شياشن و كوباياتن و كانشاتن و هبوان و غبارتن الي آخر الوان الصنفن و لا ترجو الا عفو و رحمة الله الواسع المغفرة .
فاعلم انك لن تنال هذا العفو علي بلاويك المهببه التي يا ماكترها و التي اقترفتها يداك و رجلاك و عيناك و لسانك و شفتاك الي آخر ما تمتلك من جوارح شاركتك جرائمك .. لن تنال هذا العفو الا لو عفوت و سامحت و تجاوزت .
اما لو كنت من صنف اولاد البلد عينة المعلم سيد حناطة فتوة الجمرك او أنور طيناس ملك الخرده في جبل ناعسه و الذي فقد نصف صوابع يده اليمني اثر انفجار قنبله وجدها وسط الخرده و الذي انفعل بشده حين سألته ذات مساء ذات قهوة في القصعي عن الشهامه و كيفية التعامل مع من جار عليه الزمن من الاعداء, انفعل المذكور لدرجة اني خفت يروح هابدني كرسي من كراسي القهوة في ام رأسي او خالة رأسي في أحسن الظروف و اضيع في الكازوزة ضحية اللماضة و كتر الكلام فرحت أطيب خاطر الرجل و طلبت له فنجان قهوه سادة حسب طلبه و لكنه طلب زجاجة بيبس قبل القهوة و الغريب انه وضع الزجاجه في فمه و لم ينزلها الا بعد ان اصبحت فارغة كفؤاد ام موسي ثم تجشأ بصوت مسموع قبل أن يرتشف من القهوة بمزاج و بشوق شديد و راح قايل :
فيا سيدنا لافندي من غير ما اكلمك بالوحوي ( يقصد بالنحوي ) الضرب في الميت حرام , و اللي خلق الخلق وحياة دي النهار الفضيل , ايدك ... و العشرة دول و عليا الحرام من دراعي انا عمر ما قلبي ما شال حاجه من حد .
انا يافندي ابقي هابدلك الجدع من دول كرسي في دماغه و جايبله أرنبه يقصد ( تربنه ) في النخ ( يقصد المخ ) و هو كمان يكون عامل لي عاهه مستديرة ( يقصد مستديمه ) و اول ما يسلم و يستسلم او الزمن يهده و عهد الله و اللا يتحرق عضمي زي السوجارا دي , امد له ايدي و اجبر اللي انكسر و عشايا انا و هو عليك يا رب .
هو حد آخد منها حاجه من غير مؤاخذه يا فندي غير اللقمه و الهدمه .
اما لو كان يعجبك كلام الشِلَت من نسواننا عينة فردوس محمد و ام احمد مرات بحبح او الست امينة مرات السيد احمد عبجواد التي تساءلت في سذاجة رائعة قائلة : هي يابني الست ملكة انجلترا دي مش برضك ام ؟؟؟
ارادت هذه الام الطيبة التي رمزت لمصر و شعبها الذي كان لا يزال طيبا في هذه الفترة , ارادت ان تتوسط لملكة انجلترا كي تعفو عن الشباب و المعتقلين في المظاهرات وراء سعد .
صور لها عقلها الطيب ان كل ام لازم تكون طيبه و مسامحه , ملكه انجلترا الامبراطورية التي لا تغيب عنها الشمس ماتفرقش عن ام كوثر بياعة السمين في كوم الناضوره .
اما كريمه مختار و نعيمة الصغير رحمها المولي لكانتا سمعتانا احلي وصلة طقطقة و مصمصة شفايف :
لاحول الله يا رب .
خلاص يا جدعان .
تكفي العايب عيبته .
و عفا الله عما سلف .
فلوسنا و حناخدوها و ربك بيرزق الهاجع و الناجع و النايم علي بت ودنه , سيبوه بقي حسابه عند ربه دا برضو كان كبيرنا في يوم م الايام , و اللي يعيبه يعيبنا و اللي يصيبه يصيبنا و بعدين يادي الجدع منك ليه لو بهدلتوه و حاسبتوه و سجنتوه هو و ولاده و المرا ( قصدها سوزان ) تفتكر اي حولي ( قصدها خروف ) , اي حولي م الحكام التانيين لما يقولوله علي امك حايمشي؟؟؟ ابدا , دا حايقولك بكره يبهدلوني زي مبارك و عيال مبارك ,خلليني احسن احرق و اولع ف الناس بجاز وسخ و ياقاتل يا مقتول طالما الخابور لابسني لابس .
و كفايه انو مبارك ماعملش فينا زي ابن المجنونه بتاع ليبيا , عارفه انك حاتتلامض و تروح قايلي انه اصدر اوامر للجيش يضربوا فينا و الجيش ماطاوعهوش , حاقولك يبقي ربنا مش رايد له يعوص ايديه بدم اكتر من كده ثم احنا مش عارفين الكلام دا سليم و لا طق حنك م الجيش و بعدين ماهو و عياله و المرا ( برضه سوزان ) كان ممكن يبلغوا فرار ع السعوديه و الا الاردن في كلمه بس هما قعدوا و واجهوا المصير و دي انا شايفاها تحسب لهم ,ربنا يابني يفك ضيقة كل متضايق .
اما عن الحواديت بتاعت بكاء مبارك و تشبثه بالسرير اللي هو نايم عليه و توسله لمن حوله بعدم حبسه في طره مثل اولاده و صراخ الست سوزان زي اي مرا مصريه من حوش عيسي حرام عليكوا سيبوه في حاله كفايه لحد كدا او حكايه الكهربائي اللي كان بيقوم باصلاح التكييف في جناح 309 الخاص بمبارك و الذي استبقاه ليدردش معاه و سأل عن رأي الكهربائي في حكمه و في شخصه و الست ام ماجد البدويه التي اصرت ان تعبر الحراسه و تروح تتطمن ع الريس و هناك لم تتمكن من السيطره علي عينيها التي فاضتا بالدمع و لسانها الذي لم يتوقف عن الدعاء للمريض بالشفاء والاف السيناويه الذين حاصروا المستشفي حاملين الفاكهه و المشروبات كعادتنا في زيارة المرضي اذا كانت كل هذه الحواديت حقيقيه و حدثت بالفعل فانا لن اعقب , اما اذا كانت مفتعله لزوم استدرار العطف نحو الراجل اللي داخ دوخة الارمله , فأي هزيمه اكبر من هذه؟؟؟ اي عار و اي ذل اكثر من هذا ؟ الراجل قال انا مرا (مش سوزان المره دي) و لسه بيقولها علي رؤوس الاشهاد عاوزين ايه تاني؟؟
ثم ان يا اخي الملوك و الرؤساء و السلاطين برضه مهما كان لازم يكون ليهم نظام خاص في المعامله و العقاب و الحساب
ماينفعش تعامل مبارك زي ما بتعامل العربي بسبس بتاع كازينو الشاطبي , عيب .
مش عارف ليه انا بعد كل اللي حصل و مع كم الشتيمه اللي خدتها منك و من غيرك فانا برضه باحس ان جزء من الاهانه و الذل و البهدله و قلة القيمة اللي بتصيب مبارك جزء منها بيصيبني , بيصيبنا كلنا .
ثم انت بروح الست والدتك جاي بعد عشرات السنين من الصمت و الفساد و الافساد المشترك و ركز علي كلمة المشترك بين الشعب و الحاكم و عاوز تيجي دلوقتي و تعدل الميزان بتطبيق العدل فقط ع الحاكم و اعوانه ؟
لا يا سيدي , طالما حتركب اوتوبيس الرجاله و تعمل لي فيها ثورجي و عاوز تحاسب الناس ,
لا .. حاسب نفسك و اهلك كمان .
في الجنايات اللي بيسكت ع الجريمه شريك برضه و بيتحاسب و يتسجن , شوف كام مره انت و انا و غيرنا سكتنا , شاركنا
كام مره شفت و سمعت ان فلان و لا علان نفخوه في القسم و لا علقوه طياره في امن الدوله ؟
كام مره ظرفنا موظف و لا عسكري او كوم اصطبل اي كونصطبل مرور عشان يطرمخ علي بلاوينا ؟
كام مره نمت ف شغلك ؟
بتلوم مبار ك عشان استغل نفوذه في صالح اولاده و موضوع التوريث ؟ و احنا اللي كان يعرف صول في البحريه كان بيجيب له واسطه يدخل جيش سنه بدلا من تلاته مع غير حاملي المؤهلات بمخالفة القوانين ده لو ماخدلوش اعفاء لو فتح مخه حبتين .
احنا اللي كان بيعرف الفراش اللي واقف بيفتح باب شركة للداخلين كان بيعمل الفراش واسطه لتوظيف عياله فيها .
الشركه بتاعتي و بتاعتك و غيرها كام واحد شغل عياله في نفس شركته بل و في نفس ادارته بالواسطه و مخالفة القواني
ده أنا توقفت عن قراءة اسماء الموظفين علي الابواب و بقيت اشبه عليهم من معرفتي بخلق اهاليهم .
كام و كام , خلليني ساكت احسن و كاتم ع الجرح , لم نفسك و بلاش فضايح و اللي بيته من بتنجان مايروحش يتنقور ع المسقعة .
اما عن الخبر بتاع الحاكم العربي اللي عرض افتداء مبارك و اسرته مقابل 300 تريليون دولار فعلي الرغم من ان العبد لله مش عارف لحد دلوقتي الفلوس اليامه اوي دي تقطع لها كام الف جنيه لكن انا ارفض هذا العرض لو كان حقيقي و اعلم ان فيه كتير منكم موافق عليه بل اعلم مع كامل الاحترام ان كتير و يمكن اغلب اسر شهداء الهوجه يتمني قبول العرض ويتمني الحصول علي دية مسلمة الي اهله , اما انا فأرفض هذا العرض ,ارفض ان يفتدي او يشتري واحد اجنبي اسرة مصرية و يطلع اصيل اكتر مننا يفك الاسير و يرمي لمصر شوية فلوس , ارفض بيع دم الشهداء و عارف انك حاتقول دا كلام انشا ومايجيبش همه و الحي ابقي من الميت الي اخر الكلام دا و يمكن انت عندك حق بالذات في الزمن دا اللي كل شئ انباع فيه و اصبح له تمن لكن انا اعبر عن رأي شخصي .
و عشان اكون عادل فانا احرضك علي رفض العرض الخارجي و قبول العرض المحلي لشراء او مبادلة عبقري مصري (أنا) كما في الاعلان اول المقال و اطمئنك انه علي الرغم من صحتي المعتله فانا اكيد لا احمل 85 عاما كالتي يحملها مبارك علي كاهله و الامراض التي اشكو منها لا تمنعني من خدمتك فأمراضي و عللي تتركز و تنصب في منطقة الدماغ الضارب و العناد منقطع النظير و كلها امراض لا تمنعني من خدمتك و لا تمنعك من تلطيشي .
اما عن لساني المنفلت و الرغي و كتر الكلام و الملابطه فبما ان سيادتك لا زلت تقرأ هذا العبث الذي اكتبه فأكيد انت بيعجبك ما اقول و اكيد انت راجل من الصابرين و لك الجنه و عشان كدا سوف تتحمل العبد لله العبقري .
و لو سيادتك من زائري و قاطني الجيم لعرفت ان عضلات الباي و التراي بتاعتي اكبر بمراحل من بايه و ترايه ( اي مبارك ) أما المجانص و الترابيس بتاعتي فحدث و لا حرج , تمسح مجانصه و ترابيسه بميت استيكه متعاصه حبر شيني اسود غامق و منيل بستين نيله .
و اعلم عزيزي القارئ ان الدنيا اذا اقبلت باض الحمام علي الوتد و اذا ادبرت شخ الحمار ع الاسد و في روايه اخري
اذا ادبرت بال _ من البول _ بال الحمار ع الاسد , فلا تأمن مكر الليالي .
فأنا قد رأيت مبارك في المنصه عام 81 حين كانت الدنيا تبدأ في الابتسام و تدير وجهها اليه , مبحلط و مزقلط فشر دكر بط بيتي مزغط و لا تكاد تحمل رجليه جسمه من التخن و قد احمرت خدوده من الصحة فشر فاروق يا ملكنا يا زين يابو ورد ع الخدين .
و رأيته في مرضه و هو فوق عرشه لم يزل , قاعدا علي ترابيزه بتليفون في مستشفي الماني و قد جلس حوله علي اطراف الكراسي في ادب و كأنهم طلبه صغار جوز دكاترة المان بوشوش حمراء اللهم صلي علي اجدع نبي يدلون بتصريحات عن تحسن صحة الرئيس .
اما الرئيس فقد جلس يرتدي روب كانوبيه صوف رمادي و تحتيه بيجاما فيرنيه لميع حرير طبيعي مخطط مدهب
و قد وضع قدميه في جوز شبشب فرو معتبر لو شافته الحاجه امي في مرحلة ما بعد النضارات لطبخت عليه حلة ملوخيه معتبرة(عرفت بقي اصل الحكاية بتاع اول المقال )؟؟ و قد امسك في ايديه جرنان الاهرام تقولش قال يعني ايه الاهرام هو نافذة الرئيس علي اخبار مصر ابان وجوده بارض الغربه يا ولداه لا حول الله .
رأيته حين عودته من المانيا و قد تنافس الطبلجيه في افتكاس اسمي عبارات التهاني و دموع المنافقين الذين تفوق عليهم بباوي حين اقسم ان مصر كانت خمسه و تمانين مليون يبكون و يدعون الله لشفاء الرئيس .
رأيت مبارك و هو بقدرة قادر يقود و يتقدم الرئيس اوباما داخل البيت الابيض بواشنطن و بأمر من يقول للشئ كن فيكون و بأمر الفوتوشوب فقد تبعهم رؤساء و ملوك العرب و العجم و بلاد لا تركب الافيال .
و حمدت الله المتعال ان اسامه سرايا بتاع الاهرام لم يقنع السيده ميشيل حرم السيد اوباما بالصورة المفبركه المضروبه و ان مبارك هو الرجل الاول في البيت الابيض و حريم البيت الابيض و الا كان الحال انتهي بحصول الاخوين جمال و علاء علي اخ تالت غير ابيض .
رأيت مبارك و هو اقوي من تايسون .
اغني من اغا خان .
اشيك من السلطان حيدر اباد .
و رأيت سوزان ووزراء دولة مصر يتخانقون علي تقبيل يديها .
رأيتها و هي اصبي من هيفاء وهبي .
اشيك من الابراطوره ثريا .
ارقص من دينا او ساميه جمال .
ثم رأيتها و قد حفر الذل و الاسي اخاديد في وجهها الذي توارت ملامحه تحت الكراميش و الكرانيش و ضرب البراطيش.
رأيت مبارك بعد ان دالت دولته و زالت زولته و سقطت عنه دروعه عليلا ذليلا حسيرا مريضا بينما مرعي ابو قورة الذي كان يحلم باليوم اللي حايعزم فيه الصول بكير بتاع قسم اللبان علي كوب شاي و زكي بطيخه الذي كان منتهي امله ان تمر عربه رئيس الحي من شارعهم , رأيتهما يتحكمان و يحكمان في مصير مبارك فين يبات و ماذا يأكل .
رأيت بسيوني ابو جاموس و مدبولي ابو جنديه بمركز ابو قتاته ناحية صهرجت الكبري بميت البيضا .
رأيتهما يتعشيان في الغيط ثم يتجشآن و يحبسان ببراد شاي زرد معتبر قبل ان ينتحي كل منهما بجانب و يقرفص في الغيط ليقضي حاجته في منتهي الانشراح و الراحه و يحمدان الله المتعال ع الانسجام و السماد الطبيعي المجاني اللي حيروق محصول الجوافه . بينما السجين محمد حسني مبارك يستأذن في الذهاب للحمام من النفر عبد المحسن الدسوقي الشهير بجبيصي عسكري الحراسه فسبحان من له الدوام .
سبحان من يغير و لا يتغير .
سبحان المعز المذل .
سبحان المضحك المبكي .
يا رب ...
يامن تمن بالعفو و لا يمن بالعفو عليك .
اشهدك اني قد عفوت عن محمد حسني مبارك عبدك الذي اخطأ و اصاب . اشهدك اني سامحت في حقي و حق اولادي لو املك حق المسامحه .
في اهانتنا و ذلنا .
في قهرنا و تعذيبنا .
في امراضنا و سرطاناتنا .
و في كل ما اصابنا من سوء علي يديه .
غفرت بقلب مسامح و نفس راضيه .
اللهم اشف كل مريض .
و ارحم كل ميت .
و علي رأي امي : فك ضيقة كل متضايق يا كريم
ياللا جدعان .
قبل ما يعقل يا جدعان .
عبقري للبيع يا جدعان .
الا اونا يا جدعان .
عشت يا وطني المفدي , رافعا رايتك تملك ارادتك .