محمد البوغة: هذا السبب سر نجاحي

حوار - ياسمين عباس

محمد البوغه، شاعر غنائي، خريج كلية التجارة، بدأ حياته العملية في مجال كتابة الأغنية منذ أكثر من 10 سنوات، ويتميز "البوغة" بكتاباته لعدة أنواع مختلفة من الأغاني فهناك الرومانسي أو الكلاسيك، وأيضًا الشعبي، بجانب الأغاني الوطنية، مما جعله مميز ولا يشبه غيره من المؤلفين، ومن أشهر أغنياته "إحنا الحياة" لجنات، و"وأنا بين إيديك" لنانسي عجرم، و"عايز أطمن عليك" لوائل جسار، و"زلزال" لمحمود الليثي ... وغيرها الكثير، وكان لبوابة "روز اليوسف" حوار معه حول مشواره الفني في التأليف ومعرفة سر تميزه في كتابة أكثر من نوع للأغنية

- كيف تفصل بين كتابة الأغنية الشعبية والأغنية الرومانسية أو الكلاسيكية ؟

بفصل نفسي تمامًا عن ذوقي الخاص، ومفرداتي الخاصة، وبتعامل بمبدأ "خاطب الناس على قدر عقولهم"، زي بالظبط لما بكتب أغنيه بتتكلم عن إحساس الانثى في لحظه معينه، مش لازم أكون كنت أنثى قبل كده، بس لازم أكون فاهم تركيبة الأنثى ودارس احساسها عشان تقدر تصدقنى لما اتكلم عنها وعن احساسها، وتحس إنى قدرت أعبر عنها زي ما هي شايفه نفسها من وجهة نظرها.

 

- هل بيفيد الشاعر أكتر إنه يكون متخصص في كتابة نوع معين ولا إنه يقدر يدمج بين أكتر من نوع ؟

أكيد الأحسن إنه يقدر يجمع بين أكتر من نوع لإن ده بيميزه عن غيره، زي بالظبط في الكوره اللعيب اللي بيلعب في مركز واحد ممكن يستغنى عنه المدرب في أي وقت لإنه ليه كذا بديل، لكن اللعيب "الجوكر" اللي بيقدر يلعب في كل المراكز أي مدرب يتمنى يضم اللاعيب ده لفريقه.

 

- كيف يتم تسويقك لكتاباتك خصوصًا إنك بتكتب نوعين مختلفين  ؟

أنا الحمد لله بكتب أنواع كتيره مش بس نوعين

على سبيل المثال: لما كتبت "وأنا بين ايديك" لنانسى عجرم، و"عايز اطمن عليك" لوائل جسار  ده كان شكل، ولما كتبت "زلزال" لمحمود الليثى، و"بتعاير" لأحمد سعد ده كان شكل تاني، وفي التترات لما كتبت "أعمل عبيط" تتر مسلسل باب الخلق للفنان محمود عبد العزيز، وفوازير فطوطه 2015 مع الفنان سمير غانم ده كان شكل تالت، ولما عملت أغاني وطنيه زي "وإنت ماشي في مصر" لهاني شاكر، و"يا مصر مين يقدر عليكى" لأحمد سعد ده كان شكل رابع، ولما عملت احتفالات نصر أكتوبر 2015 ككتابة مسرح وأغاني وكان ليا الشرف إني أكون أصغر مؤلف في تاريخ مصر لاحتفالات أكتوبر ده كان شكل خامس.

 

- هل يوجد فرق في التعامل بين مطربي الأغاني الشعبي والكلاسيك؟

أكيد  .. إحنا كبشر كل واحد فينا مختلف عن التاني.

 

- ما هي الأغنية المميزة التي تفضلها من ضمن كتاباتك ؟

مفيش أغنيه معينة لإن كلهم في النهايه جزء مني.

 

- هل تختلف مفردات اللغه في تترات المسلسلات الدرامية خاصة في رمضان عن النوعيات الأخرى من الأغاني  ؟

الفرق في التترات إنك بتشتغل على فكره مش فكرتك هى فكرة مؤلف المسلسل، ومهمتك إنك تلخص مضمون العمل كله في 3 أو 4 دقايق من غير ما تحرق أحداث المسلسل عشان تحافظ على متعة التشويق عند الناس، ولازم تراعي في اختيار المفردات إنها تكون مناسبة لرؤية المخرج للعمل ككل، عشان نكون كفريق عمل كلنا بنكمل بعض.

 

- هل ستشارك في كتابة أي تتر لدراما رمضان 2016 ؟

بدأت بالفعل جلسات تحضير، ولما الأعمال تكمل إن شاء الله أصحاب الأعمال دي هيعلنوا عنها بالطريقه المناسبة ليهم ولخطتهم الدعائيه، لأني بعتبر نفسى فرد ضمن فريق عمل زي ما بيحترموا دوري لازم أحترم أدوارهم.

 

- هناك بعض الفنانين قرروا يخوضوا تجربة غناء المهرجانات  .. ما رأيك في هذه الظاهره  ؟

منقدرش نقول إن دي ظاهرة، لأن الظاهرة هي الشىء اللي بيظهر لوقت قصير وبيختفى بعد كده،
> وهى ولا اختفت ولا فات عليها وقت، فاستمرار الشكل ده من عدمه لسه الأيام هتحدده.

 

- ما الفرق بين كتابة الأغاني الشعبي والمهرجانات  ؟

في فرق في تقطيعة الجمل والمفردات، زيها زي الفرق بين أي شكل أو التاني في الأغاني.

 

- ما هو الجديد الذي تعمل عليه حاليًا وتنوي تقديمه للجمهور قريبًا ؟

بعد نزول أغنية جنات "إحنا الحياه" في فيلم "اللي اختشوا ماتوا"، في انتظار نزول أغنية "كنغر حبنا" بعد أيام في الفيلم اللى بيحمل نفس اسم الأغنية للفنان رامز جلال، وأغنيتين في ألبوم الفنان هاني شاكر بعنوان "شكرا" و"غلطة عمرك".