عيالك دول ابوهم مين؟!

بقلم : عمرو الأنصاري

 

كل سنه وانتي طيبه ياامي ، وبخير وصحه وسعاده دايما يارب

انا عارف انه عيدك بس انا ماليش غيرك ومش هلاقي حضن احن من حضنك، افضفض  فيه واشكي همي

انا جاي اشتكيلك من ولادك اللي نسيوا اني اخوهم ..

جاي اسالك عيالك دول ابوهم مين؟!

اخواتي  يااما بقى كل واحد فيهم بيفكر في نفسه بيخونوا بعض وبيجرحوا وبيقتلوا بعض..نسيوا كل حكاياتك اللي علمتيهالنا

نسيوا   قصة الراجل الحكيم  اللي وصى بيها ولاده " الاعداء يقدروا يكسروا عود خشب لكن مايقدروش يكسروا حزمة حطب"

اخواتي نسيوا دروسنا في "الازهر":

 "كل المسلم على المسلم حرام دمه وماله وعرضه"

نسيوا حكايات القسيس من الانجيل"الانسان بنيان الرب ملعون من هدمه"..

نسيوا ان اللي مالوش خير في اهله مالهوش خير في حد وملعون في كل كتاب

عيالك دول ابوهم مين؟!

اخواتي يااما سحلوني وعروني

اخواتي ياما باعوا لحمهم وعروا اختي

بيقسموا في مالك وانتي لسه على وش الدنيا وبيبيعوا في ورثهم للغريب

اخواتي يااما ظلموني وقهروني وذلوني

اخواتي عقوكي وكسروكي وفضحوكي

عيالك دول ابوهم مين ؟!

قلبي يااما بيتقطع وانا شايفك حزينه مكسوره دمعتك على خدك مابتفارقكيش ومش عارف اعمل ايه

لكن اوعدك ياامي اني هفضل بار بيكي ..عمري ماهقبل انه تنكسر عنيكي ..

ملحوظه: شاء القدر ان تتوفى  امي الحبيبه "رحمها الله"التي تعلمت منها الكثير وافتقدها بشده في يوم عيد الام  منذ احدى عشر سنه ولذا

قررت ان اوجه رسالتي السابقه الى الام الكبرى "مصر" التي ستظل حية وباقية ابد الدهر ان شاء الله

كل سنه وانتي طيبه ياامي الغاليه"فوزيه"

كل سنه وانتي طيبه ياامي الكبيره"مصر"