بقلم : أحمد كامل
وبما إنى عاشق للبامية .. فإنني أعلن احتجاجي عما وصلت إليه أسعارها، وأدعو كل محبيها لمليونية احتجاجية تنديدية.
الغريب إن البامية بدأت بسعر 10 جنيه .. آي والله، ودلوقتى بـ27 جنيه .. آي والنعمة، ومش عارف لو الرئيس السيسي ما تدخلش شخصيًا ممكن توصل لكام!!!
مصيبة لتبقى أغلى من اللحمة، وبعد ما كنا بنطلب طاجن بامية باللحمة، نطلب طاجن لحمة بالبامية.. ولسه اللي جاي أحلى.
وبالمناسبة دي بقى.. وللمهتمين بمليونية البامية وتخفيض سعرها، هاذكرلكم الشعب الأرجنتيني عمل إيه لما التجار رفعوا سعر البيض..
إخواتنا في الأرجنتين استيقظوا في يوم فوجئوا بتجـّار الدواجن والبيض اتفقوا على رفع سعر البيض مرة واحدة، وبدون أسباب، دون تفكير في معاناة الشعب.
ولإن الشعب الأرجنتيني شعب متطور وشعب بيفهم وبيقدر يمسك نفسه، ومعندوش عصافير بتصوصو في بطنه زينا، كانوا بيعملوا حاجة لذيذة، المواطن ينزل السوبر ماركت يشوف السعر يرجع البيض مكانه.. بلاها «بيض»، مش هنموت لو مكلناش بيض، الخير كتير.
سيارة توزيع البيض كانت تيجي صباح كل يوم تنزل البيض، أصحاب المحلات يرفضوا.. ليه؟ البيض الموجود زي ما هوَّا، فترجع العربية بالبيض للمزارع، والنهاردة زي امبارح زي بكره.
التجار انتظروا يمكن!! ولسان حال الشعب : لايمكن .
في فترة الانتظار الدجاج خارج الموضوع .. عمال يبيض هيودي البيض فين؟
التجار لما لقوا نفسهم اتورطوا، والبيض كتيييير، ومفيش مشترين، اتفقوا يرجعوا سعر البيض لما كان عليه قبل الارتفاع، لكن الشعب الأرجنتيني طلع أذكى منهم.. رفض يشتري البيض مرة أخرى، حتى يؤدب التجار على ما فعلوا، فعاد التجار وخفضوا من سعر البيض مرة أخرى ولكن الأرجنتينيين رفضوا الشراء أيضًا، التجار اتجننوا.. البيض بيزيد والخساير بتزيد.
وبعد هذا الدرس القاسي اتفق التجار على أن يبيعوا البيض بربع سعره قبل الارتفاع مع تقديم اعتذار رسمي للشعب في الصحف بعدم تكرار ماحدث، وأصبح الشعب الأرجنتيني العظيم فائزًا في معركته مع التجار .
السؤال الآن: هل الشعب المصري لديه إرادة كباقي شعوب العالم الأحرار، أم أن عصافير بطنه هتصوصو برضه؟
كلي أمل أن ينتفض المصريون من أجل عودة البامية لسابق عهدها، أو يتدخل الرئيس السيسي شخصيًا ويصدر قرارًا جمهوريًا بتسعير كيلو البامية بـ6 جنيه.. وتحيا مصر !!