بقلم : هبة فرغلي
تصدرت صورة الراكب البريطاني الذي قام بالتقاط صورة سيلفي مع خاطف الطائرة المصرية الصفحات الأولى في الجرائد الاجنبيه مع عناوين بها نوع من الهرج والاستهزاء بعملية الخطف ودا حقهم الطبيعي وأقل واجب يتعمل مع صورة سيلفي ارسلها خاطف لصديقه أثناء محادثة بينهم علي الواتس،في المقابل الجرائد المصرية والقنوات التليفزيونية - إعلامنا المصري الجميل - احتفوا جميعا بالحادث، ومانشيتات كلها فخر، المصريين اهما حيوية وعزم وقوة، وتفاخروا بوزير الطيران المدني والمؤتمر الصحفي اللي كل ما حد يسأله سؤال يقولوا مقدرش اجاوب لأسباب أمنية، وطلعت الأسباب الأمنية دي هي صور السلفي اللي عمال ياخذها الخاطف والمخطوفين سوا.
المهم انتظرت المساء يأتي، وجلست علي اريكتي واحضرت مناديل بجانبي، وتابعت عودة الركاب المخطوفين وانتظرت دموعي لحظة سردهم لواقعة الخطف، وشاهدت رئيس الوزراء وهو يشد من ازر وزير الطيران ويتمنى العودة بركاب الطائرة المخطوفه بأمان ،وقعدت ادعي ربنا يرجعهم بالسلامة ومضايقه جدا من استهزاء رواد الفيس بوك بعملية الخطف، وعمالة اقول في سري مش عيب التريقه دي دول ياعيني زمان الركاب ربنا يعلم بحالهم، وفجأة وصل الركاب مبتسمين ومبسوطين وحسيت أن لسان حالهم بيقول احنا ايه اللي رجعنا تاني ، وبدأت حالة الاندهاش تسيطر علي ملامح وجهي قلت لما استني رد فعل دكتور ابراهيم سماحة اللي لبسوه في خطف الطائرة، وهو ياعيني مالهوش ذنب ،اكيد دلوقتي هو مضايق، وصدمني رد فعله أكثر من رد فعل الركاب، الدكتور سماحة لا زعلان ولا مضايق بأن اسمه ارتبط بالخطا في عملية الخطف، وعمال يشكر في الركاب وخاصة السيدات كان موقفهم رجولة وان زوجته واثقه فيه وأنها هي اللي قامت بتحضير الشنطه له .
وأخذت اردد يا حلاوة دا الخطف دا طلع حلو قوي ياريتني كنت معاهم ، بس اخيرا دموعي المحبوسة نزلت لما شفت صورة المضيفة متصورة سيلفي مع النجم اللي خطف الطائرة ،مقدرتش بصراحه امسك نفسي من الضحك المصاحب بالبكاء، وافتكرت وانا بشوف صورة المضيفه صورة الوزير في المؤتمر الصحفي اللي كان رافض يفصح عن أي معلومات لأسباب امنية.
وفي النهاية انا عايزة اعرف هي الطائرة دي كانت مخطوفة ولا كانت بتعمل فوتو سيشن لمصر للطيران.