"إلا من تاب وأصلح"

بقلم : عمرو الأنصاري

·      مش معنى ان الجيش انحاز لثورة الشعب يبقى فيه فاتوره لازم ادفعها (!)

  ·      مش معنى ان 30 يونيو ثوره .. تبقى 25 يناير مموله وفوتوشوب(!)..

·      مش معنى ان ثورة يناير قامت ضدك انت ياللي شاركت في ثورة يونيو ..يبقى تحاول تمسحها من التاريخ(!)

       الثورتين بيكملوا بعض وقاموا علشان نفس الاسباب وبيطالبوا            بنفس الحقوق .

 

·      مش معنى ان الشباب بيفتقد الخبره السياسيه .. انك تعين الببلاوي رئيس للوزراء (!)

 

 ·      مش معنى ان الشرطه رجعت لعقلها وانحازت للشعب وحمت ثورته في 30 يونيو..تبقى مثاليه ومافيهاش ضباط فاسدين ..وعقيدتها اتغيرت(!)

حقوق الشهداء والقصاص العادل من قاتليهم..هدفنا (من اول خالد سعيد لاخر شهيد"سلمي" ).

مش هتنازل عن حقوق اللي فقدوا  عينيهم او فقدوا جزء من اعضائهم لمجرد انه هتف بيطالب بحقوقه "سلميا" من اول عمال المحله ايام مبارك الى الان.

 

·      مش معنى انك سلمي وسط اعتصام مسلح تبقى سلمي(!)

 

·      مش معنى اننا بنحترم القضاء ونحفظله هيبته بالامتثال لاحكامه وعدم التعليق عليها ..ان القضاء مافيهوش فساد وفاسدين زيه زي أي مؤسسه في الدوله

"مطلوب ان يطهر القضاه انفسهم بانفسهم باجراءات قانونيه شفافه"

  

·      مش معنى انك عضو حزب النور وبلحيه.. تبقى اكثر اسلاما مني

  او تتحدث باسمه (!)..مش معنى انك سلفي تبقى ..محترم(!)

 

 ·      مش معنى انك نجم فرحت الملايين وموهبه مش هتتكرر ..

انك تتجاوز ،انت مجرد لاعب كره (!)

قدر نجوميتك وراعي ضميرك واعتذر

 

 

·      مش معنى اني مؤيد للسيسي وبدعم الجيش في حربه ضد الارهاب ..يبقى ممكن انسى اللي عروا ست البنات واللي كشفوا العذريه واللي قتلوا متظاهرين سلميين مش هتنازل عن محاكمة طنطاوي وعنان اللي سلموا البلد للاخوان.

 

·      مش معنى ان البرادعي فضل سلامه الذاتي وخلع..

       يبقى خاين وعميل (!)

 

 ·      مش معنى ان الثوره بتحكم ..اننا نتغاضى عن الاعلام العاهر اللي بيقدمه توفيق عكاشه واحمد موسى وكتير غيرهم واللي مايختلفش عن اعلام مصر 25 وغيرها  لمجرد انهم في صفنا (!)

 

 

·      مش معنى انك مضغوط ومرتبك .. انك تعين "الدميري" المسئول عن ماساة  قطار الصعيد وزير نقل ،ووزير طيران خرج من قضية كسب غير مشروع علشان اتصالح وسدد المبلغ(!)

 

·      مش معنى انه ظهرت ادله جديده بتفضح تورط قيادات الاخوان في كتير من الاحداث ومنها مذبحة بورسعيد واقتحام الاقسام..

ان الشرطه كانت ملاك برئ وبعض ظباطها وقياداتها ماتورطوش سواء بالمشاركه او بالتقاعس(!)

  

·      مش معنى ان بتقدملي نفسك على انك مثقف ونخبه ومن كريمة المجتمع اني اصدقك (!)

 

·      مش معنى ان الثوره هي المسيطره دلوقتي يبقى  القانون انتقائي تحاسب وليد شرابي(الاخواني) على الحديث في السياسه في الاعلام وتعمل نفسك مش شايف زكريا شلش رئيس محكمة جنايات الجيزه صديق البرامج التلفزيونيه(!)

 

·      مش معنى انك بتحب الشو وعندك كبت.. ..يبقى تشغلني بخناقاتك البلدي والفاظك البذيئه وسيديهاتك المضروبه.. (!)

 

 ·      مش معنى ان ثورة يناير قامت على مبارك ونظامه وحزبه الوطني .. يبقى كل اعضاء الحزب فاسدين ومش وطنيين ولازم نقصيهم(!)

"في ناس كانت بيتعملها كارنيه الحزب بخمسه جنيه علشان يطلعوا رحله ومايعرفوش عنه حاجه"

 

·      مش معنى انك اولتراس .. يبقى تتوهم انك فوق القانون(!)

  

·  مش معنى ان مبارك خد اخلاء سبيل نتيجة تجاوزه قانونا لمدة الحبس الاحتياطي .. يبقى دولة مبارك راجعه وجمال مبارك هيبقى رئيس مصر(!)

 

 

·  مش معنى انك شاركت في ثورتي يناير ويونيو ومنتمي لاحزاب زي الدستور والوفد وغيرهم.. انك هتقدر تكسب اصوات الناس وتشكل اكثريه في البرلمان القادم(!)

 

       " للانتخابات قواعد اخرى"

 

 

·  مش معنى ان رئيس مصر هورئيس المحكمه الدستوريه وان لجنه الدستور مكونه من فقهاء دستوريين انك هتطلع دستور عظيم(!)

 

 

·   مش معنى انك عاوز تؤكد حسن نيتك للعالم الخارجي.. يبقى تطرح المصالحه مع جماعه مازالت رافعه السلاح وبتقتلك(!)

       "إلا من تاب وأصلح وبين ..ده قانون المصالحة".

 

 

·  مش معنى ان في اخطاء من الجيش او الشرطه..يبقى تفكر تهدم مصر(!)