بسمة: شكلنا بالماكياج مختلف.. والناس بتشبه عليّ في الأماكن العامة وبيعرفوني من صوتي

كشفت الفنانة بسمة ان الكثيرين يعرفونها من صوتها قبل ملامحها، قائلة: مش سر إحنا شكلنا بالماكياج مختلف عن بدونه وكتير بدخل أماكن عامة الناس بتشبه علينا وتقول شبه بسمة وعشان كده بيعرفوني من صوتي".

وحول تغير اللوك في مسلسل "طير بينا يا قلبي” قالت لبرنامج "كلمة أخيرة" الذي تقدمه الاعلامية لميس الحديدي على شاشة  ON: "شكلنا بيتغير أكيد من عشر سنوات فاتت وكمان الشعر ولما بنقف في المراية بلاقي الشكل متغير، إما سيكولوجيا أو مادياً أو ملموسا، سواء أوجاعنا بتظهر على وشنا أو تجاربنا وده طبيعي شكلنا يتغير".

وحول عمليات التجميل ورغبتها في تغيير شكلها قالت: فيه حاجات في شكلي عمري ما كنت راضية عنها زي سناني لانها حادة ومعوجة وممكن  تعور وأنا باكل وحاولت أعمل شيء تجميلي فيها لكن لم اكمل في نصف الطريق وقلت ليه أغيرها دلوقتي ما أكيد وانا كبيرة ممكن تقع هركب طقم سنان”.

وحول حبها لتناول الطعام رغم رشاقتها قالت: من ضمن التغيرات في الشكل وزني زادة 10 كيلو جرام خلال عشر سنوات وده  غير في شكلي برضه لكن بحاول احافظ على حد معين لا يمكن تجاوزه لما بقف على الميزان وبضطر اققفل بقي أربعة أشهر مثلاً عشان أخسر ما زاد من وزني خاصة أن جزء من شغلي وعملي هو الشكل ولازم أحافظ عليه برضه خاصة أن طبيعة شغلنا بنخلص تصويرنا في وقت متأخر ويمكن يلخبط  مواعيد الطعام وممكن يلخبط الوزن".

وحول ممارستها للرياضة قالت: "مش بعرف أمارس الرياضة غير المشي والعجل مش بعرف أعمل زي الفنانات الي بيصوروا نفسهم في الجيم وبيمارسوا الرياضة وبقلهم ربنا معاكم”.

 ورداً على سؤال الحديدي: هل تخافين من التقدم في العمر؟ أجابت قائلة: "مش بخاف من السن كتقدم في العمر وما هو  يصاحبه من علامات لاني بعتبرها فصلا جديدا في الحياة لكن أخاف من السن أني أكون معتمدة على حد غيري مهما كان هو مين، والافكار المرتبطة بالمرض لكن لا يقلقني وجود خط حول الشفاه أو خطوط حول العين مع تقدم السن، صحيح ممكن نحاربه وده طبيعي لكن برضه كل خط من هذه الخطوط تعكس تكشيرة أو ابتسامة ليها ذكرى معايا في يوم من الايام لكن في النهاية لست ضد عمليات التجميل المهم أن يكون الشخص راضيا عن نفسه."

وانتقدت تعامل السوشيال ميديا مع تقدم السن بين الرجال والنساء قائلة: "فيه ناس لما بتشوف الرجالة شعرهم أبيض بيقولوا وقار ولكن الست شعرها أبيض يبقى خلاص عجزت وانتهت".

ولفتت إلى أنها تتلقى تعليقات مزعجة على التواصل الاجتماعي قائلة: كتير شفت ده ولكن أكثر ما يضايقني التعليقات المتعلقة بحياتي الشخصية وبرفضها وبعضها بيتحدث عن شكلي وافكاري ولبسي لكن بحب الرد عليهم بالصمت لان الناس دي عاوزة تستفزك عشان تتحول لخناقة ثم تريند وده ما بحبوش.