دينا: لسة بخاف من الجمهور وتعرضت لمواقف كثيرة محرجة

روت  الفنانة دينا مواقف محرجة تعرضت لها أثناء قيامها بالرقص، وسقوطها قائلة: "بعض الوقعات بتبقى تلقائية وصدفة لكن بعض منها بيبقى مقصود فذات مرة زمان واحدة كعبلتني عن قصد ورجعلتها قلتلها ليه؟ هتستفيدي إيه؟  قالت بهزر".

روت مواقف أخرى خلال لقاء عبر برنامج "كلمة أخيرة" الذي تقدمه الإعلامية لميس الحديدي على قناة "ON": "مرة إتكعبلت في سلك فيديو وطرت وأنا بطبعي بقع وبقوم حتى لو موجوعة من شدة إحراجي لاني بتكسف أوي من السقوط لازم أقوم وأكمل الفقرة، المهم لما اقع وأنا برقص اقوم  عشان  لازم اقف وأكمل وبعد إنتهاء الفقرة كنت ببدأ أكتشف الآلام وتورمات وكدمات وأصعب الاصابات كنت عندما إنزلقت وأصبت بتمزق أربطة القدم وكنت بحط مسكن وبكمل لأن فيه ناس بتبقى منتظراني في ليلة العمر  هتعب ساعة بس ماضيعش فرحة يوم العمر لاي بني أدم".

أكملت: "أنا بعشق الرقص وهو أكبر حب في حياتي لكن لايفوق حبي لابني علي، ورغم كل المسيرة دي بس لسه بخاف من مواجهة الجمهور وبعمله حساب وببقى قلقانة لسه وانا بطلع المسرح قبل ماشتري اي فستان وعاوزة أعرف راي الناس والرقص هو حياتي وبستمتع  طول الوقت بالرقص وعشان كده بدرب رقص دلوقتي  عشان أفضل أرقص لما تغيب الاضواء".

عن نظامها الغذائي وسر رشاقتها ولياقتها، قالت: " بقالي ثلاثة أو أربعة أيام بجرب نظام جديد وهي أني أوقف كل العيش والالبان والفراخ والبيض وأكل بس سمك ولحمة  وعيش الردة ومربة وشوكولاتة وأيس كريم بس مش باكل التورت ولا الجاتوه وباكل الجبن المطبوخة لكن الرومي منعناها".