محمد رحيم يرد على هجوم رامي صبري.. ويكشف دليل السرقة
رد الملحن والمطرب محمد رحيم على الهجوم الذي شنه المطرب رامي صبري عليه، أثناء مداخلة الأخير مع الملحن عمرو مصطفى في لقاء متلفز.
واستهل محمد رحيم رده على رامي صبري، بقوله: "ردي على صديقي الفنان الكبير رامي صبري بعد اتهامه ليا في وسائل الاعلام اني بهاجم النجاح مع كل الحب والتقدير"، مضيفا: "اولا يعلم الله سبحانه وتعالى اني معنديش أدنى وقت أضيعه في اني ادخل في أي مواضيع نظرا لانشغالي بمجموعة أعمال مهمة جدا إن شاء الله الناس هتشوفها قريب".
ومضى رحيم، يقول: "لكن تعليقا على مشكلتك انت وعمرو مصطفى اللى الحمد لله اتحلت في مداخلة اذاعية وربنا ما يجيبش زعل أبدا بين الأخوات ولكن للأسف اللى حصل ان اسمي تم أقحامه من طرفك بشكل لايليق ونظرا لأن المداخله كانت على اذاعة مشهورة فطبعا اتسمعت من بعض أفراد عائلتي ومنهم بنتي وأكيد قطاع كبير من جمهوري اللى بيحبني وبيحترمني وبيحب أعمالى فوجب اني ارد عليك بكل حب واحترام علشان أوضح واصحح المغالطات اللى حصلت في المداخلة".
وتابع رحيم: "أنت قلت في المداخله بالنص انك سنة 2013 هاجمتني بنفسك علشان انا كنت (بحارب نجاح) كان اخويا الفنان عمرو مصطفى حققه وقت ماقدم أغنيه بشره خير وكأن انا راجل معنديش حاجه اعملها غير اني اهاجم واحارب الناس الناجحين وانت اللى وقفت في وشي! وده طبعا كلام مغلوط ومسئ ولازم اصححه وأبين للناس الحقيقه اللى سكتت عنها سنين احتراما للعشره الطويله والصداقه اللى بتجمعنا كلنا اولا انا الحمد لله مش ناقص نجاح وتاريخ بفضل الله سبحانه وتعالى علشان اهاجم اي حد ناجح ربنا يعلم اني بدعي في صلاتي بالرزق والتوفيق لكل الناس وبتمنى الخير للجميع".
وأضاف رحيم: "اللى حصل ساعتها اني علقت ان لحن بشره خير شبيه إلى حد التطابق ل عملين من اعمالى وهما اغنيه لا كده عاجبين للمطربة الصاعدة ايمان سمير واغنية كل ده يطلع منك للنجمة شيرين وجدي والأغنيتين صدروا سنة (2004) يعني قبل صدور لحن بشرة خير بـ9 سنين على الأقل ونظرا لنجاح بشره خير وفرحتنا كلنا بيها انا قفلت الموضوع تماما ومرضيتش أبين للناس انا بقول كده ليه! ولكن الفيديو اللى تحت ده هو الفيصل اللى هيبين للناس اذا كنت بخترع كلام من دماغي ولا كلامي فعلا صح بناء على علم ودراسه وخبره وانت طبعا راجل فاهم ودارس مزيكا برضه زينا!".
وأكمل رحيم: "كما تم إرفاق لحنين آخرين من أعمالي وهما انا بحب عيونك للفنان عمرو دياب ومشاعر للفنانه شيرين عبد الوهاب واللى حصل اني لقيت نفس اللحنين دول تم استعمالهم في أغان خاصة بيك وحققوا نجاحا كبيرا معاك من غير ما تضع اسمي عليهم على الاقل جنب اسمك وطبعا الفيديو هيوضح المسأله دي جدا حتى لغير المتخصصين وواثق إن الجمهور هيتفاجئ وفي ناس كتير هتستغرب انا ازاي سكتت طول السنين دي والاجابه لأني انسان مسالم ومحترم وعمري ما اسمح لنفسي ارفع قضيه على زميل وأخ ومؤمن بتوارد الخواطر وحسن النيه دائما وطبعا دي مش مني دعوه للتخلى عن الحقوق ولكن العشرة الطيبة والمحبة والصداقة ليها علينا حق".
ويقول رحيم: "والخلاص انك هاجمتني قبل كده أكتر من مرة وما زلت لأني قلت كلمتين (فضفضة) هما من صميم حقي وقوانين الملكية الفكرية واضحة ومفيهاش هزار في بلدنا وفي كل دول العالم وكنت بشوف مجهودي وتعبي بينسب لغيري وبستحمل وبسكت عشرات المرات وللأسف انت اللى زعلان وبتتهمني اني كنت بهاجم النجاح لأ انا قطعا مش بهاجم النجاح لأنني والحمد لله صديق النجاح انا فقط كنت بعلق على استحياء وخجل على ظاهره سلبيه جدا ومتكررة في أسلوب العمل في الوسط الفني وهي ظاهرة استغلال واستحلال مجهود الناس دون وجه حق ونسبته لغير أصحابه الحقيقيين وانا عايز بعد تجربتك الاخيره مع عمرو اللى سببت المشكله دي كلها الناس تحاول تتخيل انا ساكت على ايه بقالي سنين ولكن بعد الاعتداء على اعمالى وافكاري ومجهودي ثم سكوتي وصمتي اطلع بحارب النجاح كمان وكمان اطلع مش عاجب؟".
وأنهى رحيم حديثه، قائلا: "لأ طبعا ده كلام مرفوض تماما وفعلا انا مش هسمح لأي حد يقوله وربنا يسامح الجميع وطبعا انا برد على الملأ لأنه كلامك كان على الملأ فلذا وجب التصحيح والتوضيح مع تأكيدي ان عمرو مصطفى طبعا انا بعشقه وبحبه من قلبي وانت كمان اخويا وبحبك والدليل اني اول مره اتكلم على مواضيع زي دي حدثت منذ سنوات ولكن زي مانت عندك اسره وعندك جمهور تخاف على شكلك قدامهم انا كمان زيك بالظبط مع تمنياتي بالتوفيق والنجاح الكبير للجميع اخوك الموسيقار المصري العالمي المجتهد والمحترم والمحب محمد رحيم".