عاجل.. ننشر نص اعترافات قاتل الطالب إيهاب أشرف
المتهم بالتخلص من إيهاب أشرف: جمعت مبالغ كبيرة من أقاربي بحجة تشغيلها في الهواتف وخسرتها في المضاربات الإلكترونية
تنشر "بوابة روزاليوسف"، نص اعترافات محمد ع.ال. 25 عامًا، طالب بالسنة النهائية بكلية التربية جامعة المنصورة قسم فيزياء، والمتهم بقتل الطالب إيهاب أشرف، وشطر جسده إلى 3 أجزاء.
وجاء في نص التحقيقات .. كالاتي:
س: متى وأين حدثت الواقعة تحديدًا؟
ج: واقعة القتل حدثت يوم 13/2/2024 حوالي الساعة 7.15 مساءًا في أوضة الدرس اللي أنا مأجرها في الدور الأرضي في قرية 22 الأمل بجوار مدرسة الثانوية وأخفيت الجزء السفلي من جثمان إيهاب بعد ما قطعته ورميته عند كوبري الخُرس ما بين قرية النقعة وقرية 7 ثابت والجزء العلوي رميته تحت ماسورة مياه جنب المصرف اللي معدي من فوقيه كوبري الخلايفة والرأس ومتعلقات إيهاب رميتهم عند كوبري بحر النقعة في آخر قرية 22 الأمل والواقعة كلها بمركز الستاموني
س: من كان برفقتك آنذاك؟
ج: أنا كنت لوحدي
س: ما هي طبيعة علاقتك تحديدا بشخص المجني عليه/ إيهاب أشرف عبد العزيز عبد الوهاب؟
ج: هو كان طالب عندي وبياخد درس عندي من شهر 10 سنة 2023
س: منذ متى تحديدا نشأت بينكم تلك العلاقة؟
ج: من شهر 10 لسنة 2023 لما ابن عمته/ كرم الحسن أحمد وده يبقى صاحبي رشحني له إنه ياخد عندي درس فيزياء
س: وما هي الأماكن التي كان يتردد عليك فيها المجني عليه/ إيهاب أشرف عبد العزيز عبد الوهاب؟
ج: هو كان بياخد عندي درس يوم السبت، والثلاثاء، فيزياء في أوضة الدرس في قرية النقعة، وكان بياخد عندي درس كيمياء يوم الأحد، والأربعاء، في سنتر في قرية المركزية
س: وما هي آخر مرة تردد عليك المجني عليه/ إيهاب أشرف عبد العزيز عبد الوهاب؟
ج: هو آخر مرة كان عندي يوم الواقعة يوم 13/2/2024 لما أنا قتلته في أوضة الدرس اللي في قرية النقعة
س: ومتى انتويت تنفيذ جريمتك بقتل المجني عليه/ إيهاب أشرف عبد العزيز عبد الوهاب تحديدا؟
ج: أنا الفكرة دي جتلي قبل يوم الواقعة بحوالي أسبوع ومكنتش لسه محدد إن أنا هقتل إيهاب وأطلب فدية من أهله بس قبل يوم الواقعة بحوالي أربعة أيام تحديدا يوم الجمعة 9/2/2024 فكرت إن أنا أقتل إيهاب واطلب فدية من أهله وحاولت إن أنا أنفذ الكلام ده يوم السبت وقعدت أهزر معاه بالسكينة اللي أنا كنت شاريها وهو بياخد عندي درس بس خوفت بيني وبين نفسي أنفذ واقتله ولما ابن خالي قابلني يوم الاثنين وسألني عن الفلوس والأرباح اللي كان معاده ياخدها في شهر يناير 2024 فأنا قولت إن أنا لازم بكرة أنفذ مع إيهاب علشان ألحق أطلب فدية ويلحقوا يبعتوهالي علشان أديله الفلوس بتاعته وألحق أسدد الديون اللي عليا
س: وما الباعث على ارتكابك لتلك الجريمة بقتلك المجني عليه/ إيهاب أشرف عبد العزيز عبد الوهاب؟
ج: أنا كنت بمر بضائقة مالية بسبب إن أنا ضيعت فلوسي في تطبيق مراهنات اسمه "one xbet" وكنت سالف فلوس من جماعة قرايبي وكنت مفهمهم إن أنا هشغل فلوسهم في تجارة الموبايلات مع واحد صاحبي مقابل أرباح أعلى من أرباح البنوك بس الحقيقة أنا كنت براهن بيهم في التطبيق ده وخسرت الفلوس دي وخسرت الفلوس اللي أنا كنت محوشها وكان فيه ناس زي ابن خالي له فلوس مستحقة في شهر يناير 2024 وبقية الناس فلوسهم في أغسطس وأنا لما حسبتها لقيت إن أنا مش هقدر أوفي بالفلوس دي فقررت إن أنا أخطف واقتل وأطلب فدية علشان أسدد ديوني وأبدأ من جديد بعد ما حذفت تطبيق المراهنات ده لحد ما استقريت على إن أنا اقتل إيهاب
س: وماهي جملة المبالغ التي قمت بالاستحصال عليها من أقاربك وذويك آنذاك؟
ج: أنا أخدت مبالغ على فترات متقطعة من عمي تقريبا حوالي 140 ألف جنيه ومن ابن خالي مبلغ حوالي 15 ألف جنيه ومن مرات عمي مبلغ 36 ألف جنيه تقريبا، ومن ابنها مبلغ حوالي 22 ألف ومن مرات عمي التانية مبلغ 64 ألف جنيه والاتفاق إن بداية تسليمهم الأرباح على فترات لحد شهر 8 وكنت مفكر إن أنا لما أراهن هقدر إن أجيب نسبة الأرباح لأن كنت في بداية اللعبة كنت بحقق نسبة أرباح كبيرة بس تاني يوم كنت بخسرهم وبعدين حسبت مع نفسي دخلي من شغلي في الدروس الخصوصية لحد ما يجي شهر 8 لقيت نفسي مش هقدر أوفي بكل الأرباح بتاعة الفلوس اللي أنا اخدتها من قرايبي بالإضافة إلى إن ابن خالي كان ميعاد استلامه للفوس كان في شهر يناير وكان المفروض المبلغ اللي هيستلمه حوالي 27 ألف جنيه
س: وما هي الوسيلة التي استخدمتها في إقناع سالفي الذكر لمنحك تلك المبالغ آنذاك؟
ج: أنا فهمتهم إن أنا هشغل فلوسهم في أرباح الهواتف المحمولة وهرجعلهم فلوسهم بالأرباح وقبل كده أخدت من عمي ومرات عمي مبالغ بسيطة زي 2000 جنيه ورجعتلهم بعد 10 أيام الألف عليه 150 جنيهًا فهما حسوا إن الموضوع مربح
س: ومتى تولت لديك فكرة ذلك الباعث تحديدا؟
ج: ده كان تقربيا قبل ارتكاب الواقعة بأسبوع وقبلها بأربعة أيام يوم السبت، أنا كنت ناوي اقتله وهو عندي في الدرس وبعدين معرفتش أجيبها إزاي وخوفت بس يوم الثلاثاء 13/2/2024 قتلته وقطعته أجزاء ورميته علشان أخفي معالم الجثة
س: وما هو طبيعة تطبيق "one xbe" تحديدا؟
ج: هو تطبيق وموقع إلكتروني للمراهنات نزلته من على جوجل كروم وهو عبارة عن مجموعة من المراهنات اللي بتتم على ماتشات كورة أو أي رياضة من الرياضات اللي بتتذاع أو عدد الأهداف اللي بتتسجل وبيحاكي فيها الواقع وجوه التطبيق فيه ألعاب تانية زي الكوتشينة والدومينو على نفس التطبيق ده وأنا كنت بلعب لعبة اسمها “سكراتش كارد” وده عبارة عن بخدش كارت بطريقة معينة وفيها نسبة كبيرة من الحظ ولو طلع التطابق رأسي أو أفقي أو مائل ده معناه مكسب وفي حالة الاختلاف بيكون خسارة وبربط الحساب بتاعي على التطبيق بالحساب بتاعي على فودافون كاش وببدأ أراهن بجزء من المبالغ اللي على حسابي ولما بكسب بينزلي المكسب على حسابي فودافون كاش.