انهار باكيًا.. أول تعليق لهشام حلمي بكر بعد وصوله مصر لتشييع جثمان والده  

علق هشام حلمي بكر على وفاة والده الموسيقار حلمي بكر، قائلا: "الوضع صعب جدا أنا جالي الخبر وأنا في طريقي للمطار كنت جاي أنقذ والدي ومع الأسف الشديد فشلت".

وواصل باكيا  خلال مداخلة عبر برنامج "كلمة أخيرة" الذي تقدمه الإعلامية لميس الحديدي: "كنت جاي المطار وقبل ما اركب الطيارة بساعة ونصف جالي خبر والدي بدلا من إنقاذه جاي أدفنه أسوأ  28 ساعة عشتهم في حياتي".

وعن مشاعره أثناء الرحلة: "فكرت في كل الحاجات الحلوة اللي كنا بنعملها لأنه كان في كتير حلو، الناس مش مقدرة، الناس عاوزة تحكم عليّ وعلى أبويا، وإحنا كنا راضين بعلاقتنا ببعض وقال هو كنا بنحترم بعضنا البعض، أنا فعلا  أبويا عندي عصبيته وإحنا متقبلين بعض وعشنا طول حياتنا متقبلين بعض طول رحلة الطائرة تذكرت كل الحاجات الحلوة وأنا صغير وباخد العود وأعمل نفسي بلحن".

وأكمل: "كنا نروح نجيب الجرايد من محطة مصر ويصحيني من ورا أمي وكنا ننزل، كان بيحب يقرأ كل جورنال ومجلة في مصر الأيام دي انتهت".

وتابع: "عندي أولادي الثلاثة متأثرين جدا وأنا على الطائرة كانت مشاعري بعيط وزعلان وكل حاجة في نفس الوقت، وراكب طيارة وخايف تفوتني أخبار وأنا على متن الطائرة بعت لأولادي رسالة وقلتلهم أنا أسف على جروب العائلة معلش افتكروا الأيام دي وقد إيه العيلة مهمة وقد إيه لازم نفضل قريبين من بعض، وأن اللي أنا بعمله أيا كان عاوزكم تتربوا على القيم إننا هنكبر ونحتاجكم وأيا كان فكركم راضين مش راضين بتحبونا ولا لأ لما نكون عيلة محتاجة بعض لازم نبقى مع بعض، ونفسي أبقى قدوة ليكم وأنتم بالمثل بالنسبة لأولادكم".

وعن علاقته بوالده، قال "فيه ناس فاكرة إن علاقتي بيه كانت سيئة وده محصلش كنا بنتكلم مرة في الشهر أو  كل ثلاثة أسابيع وأقصى مدة شهرين، لم نختلف نهائيا مؤخرا مش زعلنا من بعض لكن زعلنا على بعض كان بيفكر لأرملته سحر انفلصوا ورجعوا عدة مرات ورجعوا وتزوجوا ولما لمته قبل عامين على عودته لها قال لي: "قالي كل ده علشان أنا بحب ريهام بنتي ومش عايزها تضيع في بيئة غير ملائمة".

ووجه كلمة إلى والده، باكيا: "أنا آسف كان فيه جيش حاول إنقاذك والله العظيم أصحابك وأحفادك وابنك وإخواتك وكل عائلتك كانوا جيش إنقاذ لك، لكن للأسف ماقدرناش وفشلنا في ذلك".

وكشف عن مفارقة حدثت قبل أسابيع  عندما أحيا حفل عيد ابنته الكبرى الثامن عشر من باب الصدفة، وهي أغنية "إنزل يا جميل على الساحة"، التي لحنها للمطرب وليد توفيق، قائلا: "صدفة من غير ترتيب الأغنية اشتغلت وقلت لبنتي دي ألحان جدك وقالت لأصحابها وكانت فخورة".