إلهام شاهين: "غسلت أمي بإيدي ونمت جنبها بعد وفاتها لحد الصبح"

تحدثت الفنانة إلهام شاهين عن علاقتها بوالدتها الراحلة، قائلة: "أمي كانت كل حاجة في حياتي، وكانت السند والصاحبة والحبيبة وهي اللي بتوجهني في كل خطوة وما تخيلتش أبدا إن هي ممكن تسيبني في يوم من الأيام".

وأضافت خلال حوارها مع الإعلامية يمنى بدوي، ببرنامج بين السطور: "أنا اللي غسلت أمي بإيدي ونمت جنبها بعد وفاتها لحد الصبح وما كنتش خايفة أبدا بالعكس كنت حاسة بسلام رهيب، كنت عايزة أشبع منها لآخر لحظة وأحس بوجودها جنبي لأنها كانت الحماية والأمان بالنسبة لي وفراقها كسرني جدًا وما زلت لحد النهارده بفتكرها في كل لحظة وبحس إن روحها حواليا وبتحميني، وقعدت 10 سنين وأنا ألبس أسود على أمي".

وقالت الفنانة إلهام شاهين: "أنا قسيت على نفسي كتير وجهدت نفسي في الشغل وفي التفكير وفي المسئوليات ونسيت إن لنفسي علي حق، أوقات كنت بضغط على أعصابي عشان أرضي اللي حواليا وعشان شغلي ينجح وكنت بنسى إلهام الإنسانة ومحتاجة إيه".

وعن كاتم أسرارها، أو ما يطلق عليه الصندوق الأسود لأسرارها، أكدت الفنانة إلهام شاهين: "أختي إيناس هي توأمي روحي وبتحس بيا من غير ما أتكلم وبقولها كل حاجة وأنا مطمنة جدا لأنها أكتر واحدة بتخاف عليا وبتحبني بجد من غير أي مصلحة، إحنا عيلة مترابطة جدا وده اللي بيخليني قوية ومستمرة".