المخرج خالد دياب: "برشامة" فيلم فني أولًا وليس مجرد عمل كوميدي

قال السيناريست والمخرج خالد دياب لبرنامج بحب السيما، الذي يقدمه شريف نور الدين على ميجا إف إم، عن فيلم برشامة: "سعيد جدا إن فيلم "برشامة" عجب الجمهور والنقاد، وعمل حالة فنية أجمع عليها الجميع، والنقاد قالوا عنه إنه فيلم أولا، وبعد كده صنفوه إنه كوميدي، وده شيء أسعدني لأنه معناه إن الفيلم مش للضحك فقط".

الفرق بين الفيلم والمسلسل إن الفيلم بيبقى فيه مواقع تصوير كتير، وفيه تنوع بصري، غير المسلسل بيبقى متصور فى لوكيشن داخلى، لكن  "برشامة" كان فيلم مختلف.

صاحب الفكرة الحقيقى لفيلم "برشامة" هو المؤلف أحمد الزغبي، وهو مؤلف هايل وكان قايلى على الفكرة من فترة كبيرة، والحمد الله قدرنا نشتغل عليها بعد موافقة هشام ماجد وتحمس المنتج أحمد دسوقى إنتاجيا، لأنه كان مؤمن بالمشروع جدا

الفنان هشام ماجد أنا بسميه "المايسترو"، وفى فيلم "برشامة" عمل دور فلاح وهو شكله ألماني أصلا، بس مع اللبس واللهجة والدقن وتقمصه للشخصية بقى فلاح أراري!

أتمنى اشتغل مرة تانية مع فريق عمل "برشامة"، مرة واتنين وتلاتة، رغم إن ده صعب وفكرة إنى أعمل جزء تانى من عمل لازم يبقى عندى أفكار أقوى من الجزء الأولانى.

اتفرجت على فيلم "إيجي بست" وشايفه فيلم رائع ويستحق المشاهدة، وكل أبطال العمل عملوا شغل هايل فى الفيلم ده، وموسم عيد الفطر السنة دى حلو جدا.

لو هقول حاجة عن فيلم "برشامة" للمستمعين، هقول إنه فيلم مختلف بصريا، وفيه تجميعة نجوم هايلين، والأبطال بتوعه صعب يتجمعوا تانى مع بعض بسهولة.