"رشق القطارات جريمة مش بطولة" مقال بالمنصة الإلكترونية للاوقاف

 قالت وزارة الأوقاف ان البعض مننا يرى  أطفال يرشقون القطارات بالحجارة، ويمكن البعض يتخيل إنها مجرد شقاوة، لكن الحقيقة إن ده فعل خطر جدًا. مش بس بيعرض حياة الركاب للخطر، لكن كمان ممكن يتسبب في إصابات شديدة، زي فقدان عين أو جروح خطيرة. لو فكرت للحظة، لو كان في مكان الركاب شخص غالي عليك، هل هتقبل إنه يتعرض للأذى؟ ديننا بيقول إن سلامة الناس وأرواحهم هي أولويتنا. زي ما قال سيدنا النبي صلى الله عليه وسلم: "لا ضرر ولا ضرار" (رواه ابن ماجه)، يعني مهما كانت نيتك، ماينفعش تضر غيرك.

وتساءلت الأوقاف في مقال منشور بالمنصة الإليكترونية بالوزارة:  لو شفت أطفال في مكان خطر، أو لاحظت إنهم هيقوموا بتصرف زي ده، هل هتقف ساكت؟ هل هتخليهم يكملوا في تصرفاتهم دي؟ إنت مش متفرج، أنت جزء من المجتمع، ومسئول عن حماية غيرك. الإسلام بيحثنا على حماية الناس، مش تعريضهم للخطر. المسلم الحقيقي هو اللي يحرص على سلامة الآخرين، ويكون سبب في حماية حياتهم.

البيت هو أول مكان يتعلم فيه الطفل القيم. أنت كأب وإنتي كأم دوركم كبير في توجيه أطفالكم وتوعيتهم. لو مش هتوجههم وتحذرهم من خطورة التصرفات دي، مين هيوجههم؟ أنت قدوة ليهم، وتصرفاتك بتكون نموذج لهم. خليهم يتعلموا منك إزاي يحترموا حياة الناس ويحافظوا عليها.

التغيير مش هيحصل إلا لما كل واحد فينا يحس بمسئوليته تجاه المجتمع. لما تبدأ تصحح السلوكيات دي في نفسك، وتوجه أطفالك وأهلك، هتساهم في تغيير الواقع. حملة "صحح مفاهيمك" هدفها نشر الوعي وتوضيح المفاهيم الصح، فكن جزءًا من الحملة وشارك في نشر الرسالة دي. التغيير يبدأ منك.