تفاصيل مرافعة مرتضى بمجلس الدولة

كتب - محمد عماد

تحدث مرتضى منصور، رئيس نادي الزمالك، خلال مرافعته في الجلسة التي أقامها ضد خالد عبد العزيز وزير الرياضة في مجلس الدولة، بسبب اللجنة المالية المتواجدة في النادي حاليا.

وبدأ مرتضى منصور حديثه: "مجلس الدولة هو مجلس الحريات وهناك حكم صادر في 2008 من هذا المجلس المحترم بناء على دعوى مني ضد المستشار النائب العام والمجلس ألغى قرار النائب العام وقتها بسبب مخالفته القانون وأنا محتفظ بالحكم لأنه تاريخي، وده عشان الناس اللي بتقول إن المحكمة الإدارية ليس لها سلطة لتلغي قرار النيابة".

وقال منصور: "أنا جيت النهارده عشان مؤسسة رياضية يعشقها الملايين يتم تدميرها لأسباب شخصية، أنا استلمت النادي الخزينة فيها 600 جنيه وسلمت محضر تسليم النادي، والموظفين مكانوش بيقبضوا ولما جينا طلبنا حاجتين، بعثت لرئيس الرقابة الإدارية عايز لجنة تفحص عشان الفساد اللي كان موجود ولجنة من المركزي للمحاسبات، وأسفرت التحقيقات عن وجود إهدار مال عام مليار جنيه وكل حاجة غلط عملها ممدوح عباس وفي الآخر سايبينه وبيحاسبوا اللي جاب فلوس".

وواصل: "أنا مقدم ٤ بلاغات للنائب العام ضد عباس ومحدش حقق معاه خالص لكي يحاسبوه، وأنا باسأل محامي الوزارة ليه لم يتم التحقيق مع ممدوح عباس".

وأضاف: "ليه كل يوم أصحا الصبح ألاقي في طلب رفع حصانة عشان بقول رأيي في حاجات ومش بيعجب ناس معينين، وجالي جواب بحفظ كافة البلاغات اللي اتقدمت ضد ممدوح عباس يا نهار اسود إحنا في دولة قانون".

وعرض رئيس القلعة البيضاء على المحكمة التقارير التي تثبت مخالفات الإدارة أيام ممدوح عباس.